भज़न 76

परमेशर निं कधि हारदअ

गाज़ै-बाज़ै आल़ेए सैणैं लै बींन अर कतारै संघै असापे गिह

1तूह परमेशर आसा यहूदा गोत्रा दी मशूर अर

तेरी हआ इज़राईला दी खास्सी इज़त।

2तेरअ घअर आसा शालेम1 अर

तूह आसा सियोन धारा बस्सअ द।

3तिधी पाऐ तंऐं दुशमणे कतीर, ढाल़ा, तलबारा

अर दुशमणे जुधा करने सारै चाण चोल़ी।

4हे बिधाता, तूह आसा बडअ महान,

तेरी शोभा आसा इना बडी-बडी ज़ोता का खास्सी।

तिधी हारै तै तेरै दुशमण अर

5बडै-बडै हिम्मती आल़ै जोधै हुऐ तै तिधी रित्तै,

ऐबै आसा तिंयां मौते निंजा च़ैना दी सुत्तै दै,

तिन्‍नों सारअ बल अर तागत हुई बृथा।

6ए याकबे परमेशर, ज़ांऊं तंऐं तिन्‍नां लै एक झ़ाहल़ काढी,

तिन्‍नें रथा दी शुंआर अर घोल़ै हुऐ मरी खतम।

7पर हे परमेशर, सोभी लोल़ी तेरी ई डअर हुई,

ज़ै ताह रोश्शै एछी गई, तेभै निं

ताह आजू कुंण खल़अ हई सकदअ।

8तंऐं दैनअ स्वर्गा का आपणअ नसाफ

तेता शूणीं छ़ुटी पृथूई काम्मणीं अर तेथ हुऐ सोभै नड़क्‍क।

9ज़ांऊं तूह नसाफ करदअ खल़अ उझ़ुअ,

तंऐं बच़ाऊऐ पृथूई दी तिंयां सोभै ज़ुंण रैनै-गरीब हारै-मारै दै थिऐ।

10मणछे रोश्शा करै बी हआ खिरी तेरी ई ज़ै-ज़ैकार,

ज़ुंण जुधा का बच़ै, तिंयां मनाऊंआं ताल्है थैर।

11ज़ुंण बिधाता लै मानत मनी, सह लणी पूरी करी,

तेऊ लै लणी ओर्ही-पोर्ही का सोभी देशा भैंट आणी।

तेऊए डरा हेठै लागा सोभी रहणअ।

12परमेशर करा पृथूई दी राज़ करनै आल़ैओ घमंड च़ूर-च़ूर

अर राज़ै लागा तेऊए डरै काम्मणीं।