Kulvi Outer Seraji Bible
भज़न 51:10
Verse 10 is marked below, with the whole chapter around it. Read from the start
पाप माफी लै अरज़
गाज़ै-बाज़ै आल़ेए सैणैं लै राज़ै दाबेदो भज़न ज़धू नातान गूर तेऊ सेटा लै इहअ खोज़दअ आअ कि बेतशेबा संघै रही किअ तंऐं पाप।
हे बिधाता, मुल्है दै जश,
किल्हैकि तूह झ़ूरा मुल्है सदा।
आपणीं महान झींण करी कर
तूह मेरै पाप दूर।
मेरी बूराई कर पठी खतम अर
तूह कर मुंह मेरै पापा का शुचअ।
हुंह जाआ समझ़ी कि मुंह दी आसा खोट,
मुखा इहअ बी आसा थोघ कि मंऐं किज़ै-किज़ै पाप किऐ।
सह आसा सिधअ तूह ई, एक्कै तूह ई ज़सरै खलाफ मंऐं पाप किऐ,
ज़ेता तूह बूरअ मना मंऐं किअ सह ई!
मंऐं निं तेरअ हुकम मनअ अर सह आसा मेरी गलती,
मुल्है दोश लाणा लै आसा तूह शुचअ अर मेरअ नसाफ करना लै आसा तूह धर्मीं।
मंऐं किअ हुऐ ज़ल्मां ओर्ही पाप,
ज़धू हुंह मेरी माए ओदरै आअ, मुंह दी आसा तधा ई ओर्ही दोश!
तूह हआ तेऊ लै खुश ज़ुंण दिला का शुचअ अर मानदार आसा।
तूह पाआ मेरै मन्नैं ऐबै आप्पै अक्ल।
तूह कर मेरै पाप दूर, तै जाणअ हुंह शुचअ हई,
मुंह धो तूह ज़ुफे डाल़ी करै आप्पै तै हणअ हुंह हिंऊंआं ज़िहअ शेतअ।
मुंह लोल़ी भिई खुशी अर नंद हुई,
तंऐं चोल़ै मेरै हाडकै-हाडकै,
ऐबै लोल़ी ती मुंह भिई खुशी हुई।
तूह निं ऐबै मेरै पापा भाल़अ लागी,
ज़ुंण मुंह दी खोट आसा, तेता कर तूह मुखा आप्पै दूर।
हे परमेशर, मेरै मन्नैं पा तूह सुंबल़ी सोर अर
मेरी आत्मां कर तूह ऐबै शुची अर भरोस्सै करनै जोगी।
मुंह निं तूह आप्पू का दूर करी अर
नां आपणीं पबित्र आत्मां मुखा पोर्ही काढी।
मुंह लोल़ी भिई तेही खुशी हुई ज़ेही तेरै उद्धार करनै करै भेटा,
अर मेरै दिलै कर एही च़ाह पैईदा कि ज़िहअ तूह बोले मंऐं लोल़ी तिहअ ई किअ।
तै दैंऊं हुंह होरी पापी मणछा लै तेरै बधाने शिक्षा,
ताकि तिंयां बी ताह बाखा लै फिरे।
हे परमेशर, मेरी ज़िन्दगी डाह सभाल़ी, अर मुंह बच़ाऊ,
तै करनी मुंह गिह बोली ज़ै-ज़ैकार कि तूह आसा धर्मीं।
हे मेरै मालक, गल्ला करना लै कर तूह मेरी मज़त,
ताकि मेरी खाखा का तेरी बड़ैईए गल्ला निखल़े।
तूह निं पशूओ बल़ीदान च़ाहंदअ,
तेता करदअ हुंह पोर्ही,
नां तूह हूम बल़ी करै खुश हंदअ।
हे परमेशर, तूह हआ तेता लै खुश कि दिला का गलती मनी पछ़ताअ करे,
अह ई आसा सह बल़ीदान ज़ेता तूह मना अर ज़ेता करै तूह राज्ज़ी हआ।
हे परमेशर, ज़ीबाण, एरुशलेम नगरी लै कर झींण अर मज़त,
ऐहा नगरी फेर-फिरदी दुआली कर भिई खल़ी।
तै हणअ तूह सारी हूम बल़ी करै खुश,
तै करनै हाम्हां बी तेरी बेदी
सेटा बधिया का बधिया बल़ीदान।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.