भज़न 52

परमेशरे बशै आसा सोभै गल्‍ला

गाज़ै-बाज़ै आल़ेए सैणैं लै राज़ै दाबेदो खास भज़न, ज़धू दोएग एदोमी राज़ै शाऊला का खोज़ी पाअ त कि दाबेद डेऊअ त आहीमोलके घअरै।

1तम्हैं शूरबीर ज़ुल्म करी किल्है हआ हुल्‍लै-फुल्‍लै दै,

तम्हैं इहअ बी ज़ाणा कि परमेशर करा सदा नसाफ?

2तम्हां हआ कबल्‍ली होरी बरैबाद करने ई सोठ पल़ी दी,

थारी ज़िभ छाम्बा होरी तिछै उस्तरै ज़ेही,

झ़ुठअ बोला तम्हैं हेरा-हेरी।

3तम्हैं झ़ूरा भलै का खास्सअ बूरै करना लै,

शुची गल्‍ला छ़ाडी झ़ूरा तम्हैं शल़ैघा लै।

4तम्हैं शल़ैघी झ़ूरा आपणीं गल्‍ला करै बरैबाद करना लै!

5परमेशरा करनै तम्हैं ऐबै सदा लै बरैबाद,

तेऊ काढणैं तम्हैं हाथा ढाकी थारै घअरा का बागै,

तेऊ शोटणै तम्हैं ज़िऊंदै मणछे संसारा का दूर।

6धर्मीं मणछा छ़ुटणअ इना गल्‍ला भाल़ी दर्छ़णअ,

तिन्‍नां लागणअ इहअ बोली तम्हां लै हास्सदै,

7“भाल़ा, ईंयां आसा तिंयां ज़ुंण परमेशरा आपणीं शरण लणें ज़ैगा निं समझ़दै,

तेता का खास्सअ करा ईंयां आपणीं धन-माया दी भरोस्सअ,

ईंयां समझ़ा ज़ुल्म करनअ ई आपणीं फाज़त।”

8पर हुंह आसा इहै जैतूने बूटा ज़िहअ, ज़ुंण परमेशरे भबने खोल़ै आसा लागअ द,

हुंह करा तेऊए अटल़ झ़ूरी दी भरोस्सअ ज़ुंण मुंह संघै जुगै-जुगै तैणीं सदा रहणीं।

9हे परमेशर, तेरै ई एऊ कामां लै रहणअ मुंह

कबल्‍लै तेरअ शूकर करदै लागी,

मुंह खोज़णअ तेरै सोभी पबित्र लोगा सेटा डेऊई कि तूह किहअ भलअ आसा।