Kulvi Outer Seraji Bible
भज़न 50
बिधाता किज़ू करै हआ खुश
असापो भज़न
परमेशर बिधाता ज़हा का सारअ बल आसा,
सह शादा पुर्बा ओर्ही पछ़मा तैणीं सारअ संसारा।
सियोन नगरी आसा सोभी का बित्ती,
तिधा का निखल़अ परमेशरो धुप्पअ।
म्हारअ परमेशर आसा एछणैं आल़अ, पर सह निं च़ुप्प-च़ुप्पै एछणअ,
तेऊ आजू-आजू हणीं दहंदी-प्लुशदी आग भकी दी,
तेऊ फेर हणीं मारदी ढिश-बागर च़ली दी।
उझै सरग अर उंधै धरती डाहणैं परमेशरे शाजत कि
तिंयां तेऊ आपणीं परज़ो नसाफ करदै भाल़े।
परमेशर बोला इहअ, “मेरै तिंयां भगत करा मुंह सेटा झाल़अ
ज़ुंणी बल़ीदान करी मुंह संघै करार आसा किई दी।”
स्वर्गा खोज़णअ तेऊए बारै कि परमेशर आसा धर्मीं,
सह आसा नसाफ करनै आल़अ आप्पै।
सह बोला इहअ, “मेरै लोगो, शूणां, हुंह बोला तम्हां लै,
इज़राईलीओ, मुंह दैणीं थारै बारै आप्पै शाजत।
हुंह आसा थारअ परमेशर बिधाता।
हुंह निं थारै बल़ीदाने बारै तम्हां लै दोश लांदअ,
नां हूम बल़ी ज़ुंण तम्हैं मुल्है कबल्ली आणा।
हुंह नां थारै खुढा का बल्द बल़ी करना लै बोल्दअ अर
नां थारी भेडा-बाकरीए शाल़ा का बाकरै बल़ी करना लै बोल्दअ,
किल्हैकि बणें सोभै पशू अर
हज़ारो धारा रहणैं आल़ै ज़ीब बी आसा सोभै मेरै ई।
सोभै च़ेल्लू-पखीरू बी आसा मेरै अर
संसारे सोभै ज़िऊंदै ज़ीब बी आसा मेरै ई।
ज़ै हुंह भुखअ बी हंदअ, तैबी निं मुंह तम्हां का मांगणे ज़रुरत आथी,
सारअ संसार अर तेते सोभै गल्ला आसा मेरी ई।
मुंह कै म्हैशे शिखा खाणें ज़रुरत आसा?
कि मुंह छ़ेल्हूओ लोहू लागा झुटणअ?
हुंह आसा परम प्रधान परमेशर,
हुंह च़ाहा तम्हां का इहअ बल़ीदान कि तम्हैं सदा मेरअ शूकर करे,
अर मुल्है आपणीं ज़बान पूरी करे ज़ुंण तम्हैं मानत मनी।
खरीए पलका बोलै तम्हैं मुल्है,
हुंह बच़ाऊं तम्हां आप्पै अर
तै भेटणीं तम्हां मेरी ज़ै-ज़ैकार करनी।”
पर कदुष्ट मणछा लै बोला परमेशर इहअ,
“तम्हैं किल्है फिरा मेरै बधाने बारै खोज़दै?
मेरी करारे बारै किल्है करा तम्हैं गल्ला?
ज़िहअ तम्हां हुंह नैरा, तेता, तम्हैं मंदै निं,
मेरअ हुकम समझ़ा तम्हैं बृथा!
तम्हैं हआ च़ोरा संघै संगत डाहणां लै राज्ज़ी,
अर तम्हैं हआ कंज़रै मणछा संघै साझ़ू।
तम्हैं बोला कबल्लै बूरअ ई,
झ़ुठअ बोल़णैं का बी निं तम्हां झ़िह लागदी!
तम्हैं लाआ आपणैं भाई-बंधा लै बी दोश,
आपणैं सक्कै भाई दी बी शुझिआ तम्हां का खोट।
तम्हैं करा इना एतरी गल्ला, तज़ी बी निं मंऐं तम्हां लै किछ़ै बोलअ,
तम्हैं सोठा इहअ कि हुंह बी हणअ तम्हां ई ज़िहअ!
पर ऐबै समझ़ाऊंणैं मुंह तम्हैं राम्बल़ै करै,
सोभै गल्ला आणनीं मुंह ऐबै थारी आछी सम्हनै बाढै।
तम्हैं किअ हुंह भाल़अ नां भाल़अ!
ऐबै शूणां धैन दैई, तम्हैं करनै मुंह पठी बरैबाद,
तम्हां निं कुंण बच़ाऊंणै आल़अ भेटणअ।
मेरअ शूकर करनअ आसा इहअ बल़ीदान ज़ेता करै हुंह खुश हआ,
ज़ुंण मेरअ हुकम मना तिन्नां बच़ाऊंदअ एछणअ हुंह पाक्कै दी।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.