Kulvi Outer Seraji Bible
भज़न 112
बिधाता दैआ धर्मीं मणछा लै बर्गत
बिधाते करा ज़ै-ज़ैकार।
बिधाता हआ तेऊ मणछा लै खुश ज़ुंण तेऊओ अदर करा अर
ज़ुंण तेऊए हुकम मना।
तेऊए आद-लुआद हणीं देशै बलबान अर
तेऊ भेटणीं परमेशरा का खास्सी बर्गत।
तेऊओ घअर रहणअ सदा भरी अर
सह करनअ तेऊए भलाई लै लोगा सदा आद।
भलै मणछा लै हआ न्हैरै दी बी प्रैश्शअ,
ज़ुंण झणैल़ू, झ़ूरनै आल़ै अर धर्मीं हआ।
तेऊ मणछा लै हआ बर्गत ज़ुंण होरी लै बी ऋण दैआ अर
ज़ुंण बपार करना लै मानदार हआ।
सह भलअ मणछ हआ सदा सफल,
तेऊ डाहा लोग बी सदा आद।
ज़ै तेऊ बेघै बूरअ समाद बी भेटे, सह निं तैबी बी डरदअ,
तेऊओ विश्वास हआ पाक्कअ अर सह रहा बिधाते आसरै।
तेऊ निं किछ़ै हैल़अ-फिकर हंदअ,
तेऊ हआ निहंचअ कि तिन्नें दुशमण जाणैं हारी।
सह दैआ रैनै-गरीबा लै खुल्है हाथै,
तेऊए धर्मीं काम डाहणैं सदा आद।
सह हणअ बलबान अर तेऊओ करनअ सोभी अदर।
कदुष्टे दिलै लागा एता भाल़ी आग,
तिंयां रहा ज़िदै दांदा-कटिल्लदै लागी अर तिहअ ई करै हणैं तिंयां खतम,
तिन्नें आशा हणीं सदा लै खतम।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.