Kulvi Outer Seraji Bible
भज़न 111
बिधाता ज़ुंण किअ, तेता लै करा शूकर
बिधाते करा ज़ै-ज़ैकार1!
मुंह करनअ बिधाते आपणीं परज़े सभा दी,
तत्त-दिला का बिधातो शूकर।
बिधाता भाल़ किहै महान काम किऐ!
ज़ेतरै तेता लै खुश रहा तिंयां दैआ तेथ धैन।
ज़ुंण बी बिधाता काम करा, तेथ हआ प्रतप्प अर तिंयां काम हआ महान ई,
तेऊओ नसाफ करनैओ बल आसा अटल़।
बिधाता निं हाम्हां तेऊए च़मत्कारे महान काम बिस्सर्नै दैंदअ,
बिधाता दैआ जश अर सह आसा झणैल़ू।
ज़ुंण तेऊओ अदर करा, सह निं तिन्नां भुखै डाहंदअ,
सह निं आपणीं करार तिन्नां लै कधि बिस्सरदअ।
तेऊ रहैऊअ आपणीं परज़ा का आपणअ प्रतप्प
तिन्नां लै परदेसी देशे ज़ैगा दैई।
बिधाते कामां दी आसा सत्त अर नसाफ,
तेऊओ बधान आसा शुचअ-पाक्कअ।
तेऊओ बधान आसा अटल़,
किल्हैकि तेथ आसा भलाई अर सत्त।
तेऊ किई आपणीं परज़ा गलामी का आज़ाद,
तेऊ किई तिन्नां संघै अटल़ करार।
सह आसा पबित्र अर सोभी लागा तेऊए डरा हेठै रहणअ।
बिधाते डरा हेठै रहणअ आसा अक्लीओ मूल़,
ज़ुंण तेऊए हुकम मना, तिन्नां एछा सुंबल़ी सोर।
बिधाते हणीं सदा ज़ै-ज़ैकार।
Source notes (1)
- Footnote ज़ै-ज़ैकार इब्रा. बोली दी बोला हाल्लेलुयाह
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.