Kulvi Outer Seraji Bible
भज़न 113
ज़ेभै गरज़ पल़ी, तेभै करा बिधाता मज़त।
बिधाते ज़ै-ज़ैकार करा।
ज़ुंण तम्हैं तेऊए च़ाकरी करा,
तम्हैं करा तेऊए ज़ै-ज़ैकार।
बिधाते ज़ै-ज़ैकार लोल़ी
आझ़ा पोर्ही सारी सदा हुई।
पुर्बा ओर्ही पछ़मा तैणीं करा सोभै
बिधाते नाओंए ज़ै-ज़ैकार।
बिधाता करा सोभी देशा प्रैंदै राज़,
तेऊओ प्रतप्प आसा सारै भ्रमंडा का बी उछ़टअ।
म्हारै परमेशर बिधाता ज़िहअ निं होर कोहै आथी,
सोभी का उछ़टै दी आसा सह ई बेठअ द।
पर सह हआ तिधा का उंधै पृथूई भाल़अ लागअ द।
सह झ़ैऊआ रैनै-गरीबा
माट्टै अर छ़ारे रूल़ी जैंदरा का उझै,
ताकि सह तिन्नां आपणीं परज़े सैणैं
संघै राज़ करना लै साझ़ू हई सके।1
ज़हा बेटल़ीओ हुअ-ज़ाअ निं आथी, तैहा लै दैआ सह लुआद अर तैहा भेटा खुशी।
बिधाते करा ज़ोरै-ज़ोरै ज़ै-ज़ैकार।
Source notes (1)
- Cross-reference आयू. 36:7
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.