भज़न 108

बिधाता आसा हाम्हां बाखा

(भज़न 57:7-11; 60:5-12)

परमेशरा लै राज़ै दाबेदो भज़न

1हे परमेशर, मेरअ दिल करा तेरअ पाक्‍कअ भरोस्सअ!

मुंह करनी गिहा बोली तेरी ज़ै-ज़ैकार!

मुंह बोल़णैं दिल खोल्ही तेरै भज़न।

2ए मेरै मन्‍नां ज़ाग! उझ़ू,

तारा आल़ै बाज़ै अर बींन ज़ागा!

मुंह जाणअ राच भैंदी उझ़ुई।

3हे बिधाता, मुंह करनअ देशा-देशे लोगा जैंदरी तेरअ शूकर,

सोभी लोगा नदरी करनी मुंह गिहा बोली तेरी ज़ै-ज़ैकार।

4हाम्हां लै तेरी अटल़ झ़ूरी आसा सरगा का बी उझै तैणीं,

तेरअ सत्त आसा सारै भ्रमंडै।

5हे बिधाता, तेरअ अदर लोल़ी सारै भ्रमंडै हुअ अर

तेरअ प्रतप्प लोल़ी सारी पृथूई दी शुझुअ।

6मेरी अरज़ शुण अर तूह बच़ाऊ हाम्हां आपणैं महान बला करै,

ज़हा लै तूह झ़ूरा, तिंयां लोल़ी तै बच़ै।

7हे परमेशर, तूह आसा पबित्र अर तंऐं आसा इहअ बोलअ द,

“मुंह हणीं शकेम नगरी बांडदा खुशी अर

मुंह दैणीं सक्‍कोत सऊंऐं मुल्खे ज़ैगा नापी करै मेरी परज़ा लै बांडी।

8गलाद बी आसा मेरअ अर मनिश्शे बी आसा मेरअ,

एप्रैम आसा मेरै मुंडो टोप अर

यहूदा आसा मेरी नसाफ करने छ़ल़ी।

9पर मोआब आसा मेरअ हाथा धोणेंओ भांडअ,

एदोमा लै शोटणअ मुंह आपणैं खूरो पोलल़अ नछ़ैण कि तेऊओ मालक आसा हुंह आप्पै।

पलिश्ती का ज़िती करनी मुंह ज़ै-ज़ैकार।”

10हे परमेशर, बडी-बडी उछ़टी दुआली आल़ी नगरी हुंह कहा पजैल़णअ?

एदोम तैणीं हुंह कहा दैणअ संघी।

11हे परमेशर, तंऐं कै हाम्हैं पठी डाहै शोटी?

ऐबै कै तूह म्हारी सैना आजू-आजू हांढणअ निं आथी?

12हे बिधाता, म्हारै दुशमणा का बच़णा लै कर म्हारी मज़त,

किल्हैकि मणछे मज़त हआ बृथा!

13ज़ै तूह परमेशर हाम्हां संघै होए, तै जाणैं हाम्हैं ज़िती,

ताह हेरनै म्हारै दुशमण हारी।