Kulvi Outer Seraji Bible
भज़न 107
पांज़ूअ निसब
(भज़न 107:1—150:6)
बिधाता आसा आपणीं परज़ा लै भलअ
बिधातो शूकर करा, किल्हैकि सह आसा भलअ!
सह झ़ूरा हाम्हां लै सदा।
तम्हैं ज़ुंण बिधाता आज़ाद आसा किऐ दै,
बिधाते ज़ै-ज़ैकार करना लै बोला ऐहा गल्ला भिई-भिई।
तेऊ आसा तम्हैं थारै दुशमणे हाथा का छ़ड़ैऊई आणै दै।
तेऊ पजैल़ै तम्हैं पराऐ देशा का,
पुर्ब, पछ़म, उतर, दखणा का बापस फरेऊई।
तम्हां मांझ़ै तै कई उज़र रेगीस्तानै शोठुई कल्ही छ़ुटै दै,
तिन्नां का निं किधी नगरी डेऊई रहणा लै बात भेटी निस्सी ती।
तिंयां थिऐ भुखै-नचिशै,
तिन्नैं हेरअ त आपणअ हैअ चोल़ी।
तैहा आफ़ते पलका पाई तिन्नैं बिधाता सेटा पकार,
तेऊ बच़ाऊऐ तिंयां तैहा खरी का।
तेऊ नढैऊऐ तिंयां सुंबल़ी बाता
तैहा नगरी लै ज़िधी तिंयां बस्सी सके।
बिधाता भाल़ हाम्हां मणछा लै किहअ झ़ूरा, सह भाल़ केही झींण करा,
तेता लै करनअ तेऊओ शूकर, ज़ुंण महान काम तेऊ हाम्हां लै किऐ।
ज़ुंण नचिशै थिऐ, तिन्नां लै दैनअ तेऊ रज्ज़ी झुटणा लै,
भुखै लै दैनअ रज्ज़ी खाणां लै।
कई तै तम्हां मांझ़ै मारना लै न्हैरी खुडी कैद किऐ दै,
हाथ-खूर तै शांघल़ी-लोहै करै बान्हीं डाहै दै।
किल्हैकि तम्हैं च़लै परम प्रधान परमेशरे बधाना छ़ाडी उंबल़ी बाखा,
तम्हैं निं तेऊए सलाह मनी।
तम्हैं दझ़ै-प्लुशूऐ गलामी दी धैल़-राच काम करी-करी,
ठोहल़ लागी धरना का उझै उझ़णा लै मज़त करनै आल़अ निं तम्हां लै कोहै भेटअ।
ज़ांऊं तम्हां खास्सी आफ़त पल़ी तैबै जाई पाई तम्हैं बिधाता सेटा लेर-पकार,
तेखअ बच़ाऊऐ तेऊ तम्हैं तैहा खरी का।
तेऊ चोल़ै थारै हाथा-खूरा का शांघल़ी-लोहै पोर्ही,
संघा काढै तेऊ नटिप्प न्हैरै जैंदरा का बागै ज़िधी आजू तम्हां लै मौत थिई।
बिधाता भाल़ किहअ झ़ूरा, सह भाल़ हाम्हां मणछा लै केही झींण करा,
तेता लै करनअ तेऊओ शूकर, ज़ुंण महान काम तेऊ हाम्हां लै किऐ।
किल्हैकि तेऊ चोल़ी कांस्से बडी-बडी प्रऊल़ी अर
लोहे बडी-बडी आगल़ीए किऐ तेऊ ठोर-ठोर।
कई किऐ तम्हां मांझ़ै ऐडै ज़िहै पाप,
संघा रहै तेता पिछ़ू दाह-दुखा दी चाछल़दै लागी।
तिन्नों ज़िऊ निं रोटी खाणां लै बी बोल्दअ त,
तिंयां थिऐ दोत-ऊड़ मरदै तैर।
तैहा आफ़ता मांझ़ै पाई तिन्नैं बिधाता सेटा लेर-पकार,
तेऊ बच़ाऊऐ तिंयां तैहा खरी का।
सह करा आपणैं बैणा करै नरोगै,
तेऊ बच़ाऊऐ तिंयां तैहा डुघी खात्ती का ज़ेथ तिंयां पल़ै दै थिऐ।
बिधाता भाल़ किहअ झ़ूरा, सह भाल़ हाम्हां मणछा लै केही झींण करा,
तेता लै करनअ तेऊओ शूकर, ज़ुंण महान काम तेऊ हाम्हां लै किऐ।
तेऊओ शूकर करना लै करनअ बल़ीदान,
गिहा बोली अर ज़ै-ज़ैकार करी खोज़णअ तेऊए महान कामें बारै सोभी का ज़ुंण तेऊ किऐ।
कई तै तम्हां मांझ़ै ज़ुंण समुंदरै ज़हाज़ा दी बपार करी
आप्पू ज़िऊंणां लै ढब्बै खटा तै।
तिन्नां का बी शुझुअ कि बिधाता किज़ै सका करी,
तिन्नैं भाल़ै डुघै समुंदरै बिधाते महान काम।
ज़ांऊं सह हुकम करा, सरगै च़ला ढिश-बागर,
समुंदरा का लागा बडी-बडी उछ़टी छ़ाल्ली उझ़दी,
अर समुंदरै हांढदै ज़हाज़ा लागा उछ़टै झ़लारै,
संघा डुबा उंधै थाल्लै तैणीं,
एही आफ़ता जैंदरी चुटा बपार करनै आल़ैओ हैअ।
तिन्नां फिरा घेरअ अर तिंयां बधल़िआ शराबी ज़िहै,
तिन्नें हआ तेभै सारी बिक्री बृथा।
तेही आफ़ता जैंदरी पाई तिन्नैं बिधाता सेटा लेर-पकार,
तेऊ बच़ाऊऐ तिंयां तैहा खरी का।
सह करा बडी-बडी ढिश-बागरी शांत अर
समुंदरे बडी-बडी छ़ाल्ली बेशा तेऊ डरै च़ुप्पी।
तेता भाल़ी हुऐ तै तिंयां बपारी बी खुश,
बिधाता पजैल़ै तिंयां राज्ज़ी-राम्बल़ै ज़हाज़े आडै ज़िधी तिन्नां पुजणअ थिअ।
बिधाता भाल़ किहअ झ़ूरा, सह भाल़ हाम्हां मणछा लै केही झींण करा,
तेता लै करनअ तेऊओ शूकर, ज़ुंण महान काम तेऊ हाम्हां लै किऐ।
ज़ेभै बिधाते लोगो झाल़अ होए, तेभै खोज़णीं सोभी नदरी तेऊ ईंयां महान गल्ला,
सैणैं सेटा करनी बिधाते बड़ैई।
बिधाता सका बगदी गाडा बी शुक्कअ रेगीस्तान करी अर
बडै-बडै पाणींए छ़ोआ बी शकेऊई।
सह सका रज़दी-पज़दी ज़ैगा बंज़र करी,
ज़ै तिधी बस्सै दै लोग कदुष्ट हई पाप करे।
बिधाता सका उज़र रेगीस्ताना पाणींओ सअर बणाईं,
अर शुक्की रुखी ज़ैगा सका पाणींए छ़ो काढी।
ज़ुंण भुखै होए, तिंयां सका तिधी बस्सी,
कि तिंयां आप्पू लै तिधी नगरी बसाओए।
तिंयां सका तिधी खेच खटी अर दाखे बाग लाई,
अर भांती-भांतीए साल-फसल पज़ेरी।
बिधाता दैआ आपणीं परज़ा लै बर्गत अर तिन्नें हआ खास्सी आद-लुआद,
बिधाता निं तिन्नें डागै-चैणैं बी घटणैं दैंदअ।
हई सका कि केभै तिन्नां लै दाह-दुख खरी पल़े,
च़ाऐ तिंयां गणी करै धख ज़िहै ई बच़े।
पर बिधाता लआ तिन्नां का आप्पै बदल़अ ज़ुंणी तिंयां हंतै अर हारै-मारै,
संघा पजैल़ा तिन्नां इहै करबैऊंणैं रेगीस्तानै ज़ेथ केस्सी डेऊणा लै बात बी निं भेटदी।
बिधाता छ़ड़ैऊआ रैनै-गरीबा आप्पै संघा बशैल़ा तिन्नां उछ़टै दी,
तिन्नें आद-लुआद बढेरा सह भेडा-बाकरीए हेल़्ही ज़ेही।
धर्मीं मणछ हणैं एता भाल़ी खुश,
पर कदुष्ट मणछे खाखा हणीं बंद।
ज़हा अक्ल होए, तेऊ दैणअ इना गल्ला दी धैन,
तेऊ हेरनअ ऐहा गल्लो बच़ार करी कि बिधाता किहअ झणैल़ू आसा।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.