Kulvi Outer Seraji Bible
भज़न 109
बिधाता का मज़त मांगणा लै अरज़
गाज़ै-बाज़ै आल़ेए सैणैं लै राज़ै दाबेदो भज़न
हे बिधाता, हुंह करा तेरी ई स्तोती, तूह निं ऐबै च़ुप्पी रही!
कदुष्ट अर कपटी मणछे गोटअ हुंह फेरा-फेर,
तिंयां पाआ मेरै बारै झ़ुठी फुआह।
तिंयां करा थोघै बाझ़ी मेरी बूराई,
तिंयां एछा एही बाझ़ी मुंह संघै झ़घल़दै।
हुंह झ़ूरा तिन्नां लै एतरअ कि हुंह करा तिन्नें भलै लै प्राथणां,
पर तिंयां करा कबल्लै मेरै घैंचल़।
तिन्नैं किअ मेरी भलाईए बदल़ै मुल्है बूरअ ई,
हुंह डाह तिन्नां लै झ़ूरी अर तिंयां डाह मुंह संघै ज़ीद!
तूह कर इहअ कि मेरै तिंयां दुशमण लोल़ी तै कहा कदुष्ट मणछे बशै पल़ै,
तिन्नां लै छ़ाड इहअ मणछ ज़ुंण तिन्नों दाऊअ करे।
ज़ेभै तिन्नों नसाफ हणअ, तेभै लोल़ी तिंयां दोशी निखल़ै।
तिन्नें प्राथणां बी लोल़ी तिन्नां लै पाप गणी।
तिंयां लोल़ी आधी अमरा मूंऐं अर
तिन्नें पदबी लोल़ी कहा होरी भेटी!
तिन्नें लान्हैं सुन्हैं लोल़ी छ़ुटै-मुक्कै अर
तिन्नें बेटल़ी लोल़ी बिधबा हुई।
तिन्नें लान्हैं लोल़ी टुकरै मांगदै हुऐ अर
तिंयां लोल़ी तिन्नें बरैबाद हुऐ दै घअरा का ज़ैगै-ज़ैगै ठुल़्दै लागै।
तिन्नें ज़ैदात लोल़ी पठी रैहण डुबी,
तिन्नें कमाई लोल़ी कुंणी परदेसी पठी पाई।
तिन्नां लै निं कोही झींण लोल़ी किई,
नां तिन्नें छ़ुटै-मुक्कै दै लान्हैंओ कुंण हेर-सभाल़ करनै आल़अ लोल़ी हुअ।
तिन्नें आद-लुआद लोल़ी पठी मूंईं,
आगली पोस्ती दी निं तिन्नों नाअं ई लोल़ी रहअ।
हे बिधाता, ज़ुंण पाप तिन्नें दादै-बाबै किअ, तेता डाहै तूह आद,
तिन्नें ईजा-बाबो पाप निं माफ करी आथी।
हे बिधाता, तूह करै कबल्लअ तिन्नों पाप आद करी,
पृथूई दी निं कोही मणछा आजू तिन्नें बारै थोघ हुअ।
तिंयां मणछ तै बेघै नर्दैई,
तिंयां मारै तै रैनै-गरीबा हंती-हंती,
तिंयां रहा तै तिन्नें पिछ़ै पल़ी ज़सरी मज़त करनै आल़अ कोहै निं हंदअ त।
तिंयां झ़ूरा तै होरी लै फिटक दैंदै, ऐबै लोल़ी सह फिटक तिन्नां लागअ,
होरी लै बर्गत दैणा लै निं तिंयां खुश हंदै ई आथी तै! ऐबै निं तिन्नां लै बर्गत दैणैं आल़अ कोहै लोल़ी भेटअ।
फिटक दैणअ हआ त तिन्नां लै झिकल़ै बान्हणैं ज़ेही शोभा,
सह फिटक लोल़ी त ऐबै तिन्नें आपणैं पेटै पाणीं ज़िहअ
अर तिन्नें हाडकै दी तेला ज़िहअ रप्पअ!
तिन्नें फिटका करै लोल़ी तिंयां आप्पू ई फेरा-फेर गोठुऐ,
सह लोल़ी तिन्नें कुछी गाची ज़िहअ पिड्डअ शाचअ।
हे बिधाता, मेरै दुशमणा लोल़ी अह ई बदल़अ भेटअ,
ज़ुंण थोघै बाज़ी मुल्है बूरअ बोला।
पर हे म्हारै मालक बिधाता, तूह आसा पबित्र, मेरी मज़त लऐ तूह करी ज़ेही तंऐं ज़बान आसा दैनी दी,
मुल्है कर तूह आपणीं महान झींण प्रगट, संघा लऐ मुंह बच़ाऊई।
हुंह आसा गरीब, मेरै आसरै लै निं कोहै आथी,
मंऐं हेरअ पठी हैअ चोल़ी।
हुंह च़ाल्लअ उडदी छ़ैल्ली ज़िहअ मुक्की,
हुंह आसा रैट्टै ज़िहअ करोल़्हदअ लागअ द।
भुखै चुटी ऐबै मेरी ज़ांघा बी अर
पेटे आंजा लरुगी पठी अर मेरी खाल्हल़ी शाची हाडकै दी ल़पट्ट।
लोग लागा मुंह भाल़ी हास्सदै,
तिंयां करा हाथ अर मुंडा करै शारअ करी मेरअ सुहांग।
हे बिधाता, मेरै परमेशर, तूह कर मेरी मज़त,
मुंह बच़ाऊ, किल्हैकि तूह झ़ूरा मुल्है खास्सअ।
होरी का बी लोल़ी थोघ लागअ कि
सह आसा तूह बिधाता ज़ुंण मुंह बच़ाऊआ।
तिंयां ता दैआ मुल्है फिटक, पर ऐबै दै तूह मुल्है बर्गत!
मुंह हंतणैं आल़ै लोल़ी हारी करै शर्मिंदै हुऐ अर
हुंह ज़ुंण तेरअ दास आसा, मुंह लोल़ी नाच़णै जोगी खुशी भेटी।
तिन्नां कर तूह फेरा-फेर इहै शर्मिंदै,
ज़िहै तिन्नैं झिकल़ै बान्हीं आपणीं देही आसा बुदरी दी।
हे बिधाता, मुंह करनअ तेरअ खास्सअ शूकर,
मुंह करनी तेरी खास्सै मणछा जैंदरी तेरी बड़ैई।
किल्हैकि तूह बिधाता हआ रैनै-गरीबा संघै खल़अ,
तूह बच़ाऊआ तिन्नां आप्पै तिन्नां का ज़ुंणी तिंयां मारी आसा लाऐ दै।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.