Kulvi Outer Seraji Bible
भज़न 10
मज़त मांगणा लै अरज़ करनी
हे बिधाता, तूह किल्है हुअ हाम्हां का दूर?
खरीए पलका किल्है लुक्कअ तूह?
कदुष्ट हुऐ शरेरै, तिन्नैं लाऐ रैनै-गरीब हारी-मारी,
ज़ुंण खल़ाक्की तिन्नैं होरी लै आसा ढोही दी, तिंयां लोल़ी तेथ आप्पू ई शाचै।
कदुष्ट करा आपणैं बूरै खैला लै घमंड,
तिंयां मांणक्करै मणछ निं तेरी कदर करदै अर तिंयां दैआ ताह बिधाता लै फिटक।
कदुष्ट मणछ आसा इहै घमंडी कि
तिंयां निं ताह इहअ बी समझ़दै कि तूह बिधाता बी आसा होए।
कदुष्ट निं आपणीं बात छ़ाडदै,
नां तिंयां ताह बिधातो नसाफ समझ़दै
तिंयां दैआ तिन्नें दुशमणा लै बी धमकी।
तिंयां बोला आप्पू लै इहअ,
“हाम्हां निं कुंण हारी सकदअ अर नां हाम्हां लै आफ़त सकदी पल़ी!”
तिंयां करा सिधी झ़ुठी, फिटक अर धमकी आल़ी गल्ला,
तिन्नें खाखा का निखल़ा सिधी बृथा अर उपद्रभे ई गल्ला।
तिंयां रहा किधी गराऊंऐं लुक्की,
कहा नर्दोश मणछे हत्या करना लै ताखुई,
ज़सरी मज़त करनै आल़अ कोहै निं होए, तिंयां रहा तिहै मणछा ज़ाच़दै लागी।
तिंयां हआ भुखै सिहा ज़िहै शकार करना लै झ़ाकल़ै रहै दै लुक्की,
तिंयां हआ रैनै-गरीबा न्हैल़ै-भाल़ै लागै दै
संघा निंयां तिन्नां आपणैं ज़ज़ाल़ा दी चैल़ी घिशी-तल़िंगी!
रैनै-गरीब आणै इनै छेऊई अर
तिन्नें ज़ोरा सेटा निस्सअ तिन्नें च़ल्हुई।
तिंयां बोला इहअ, “परमेशर निं किछ़ै धैन दैंदअ!
तेऊ आसा आछी बुदरी डाही दी अर तेऊ का निं शुझदअ कि हाम्हैं किज़ै करा।”
हे परमेशर बिधाता, ऐबै दै तूह इना कदुष्ट मणछा लै सज़ा,
रैनै-गरीबा बाखा निं पिठ डाहै फरेऊई।
कदुष्ट मणछ निं तेरी इज़त करदै,
तिंयां बोला इहअ पै, “परमेशर निं हाम्हां लै सज़ा दैंदअ!”
पर तूह हेरा भाल़ी, ताखा जाआ खरी अर आफ़ता शुझुई,
तूह हआ हर बगत मज़त करना लै तैर्हुई रहअ द।
रैनै-गरीब लआ तेरी शरण अर
छ़ुटै-मुक्कै दै लान्हैं निं तूह कल्ही छ़ाडदअ।
हे बिधाता, बूरै अर कदुष्ट मणछो बल कर तूह खतम,
ज़ुंण कदुष्ट काम तिन्नैं किऐ, तेता लै रहअ तिन्नां तेभै तैणीं सज़ा दैंदअ लागी,
ज़ेभै तैणीं तिन्नैं इहै काम छ़ाडै निं।
ए म्हारै बिधाता, तूह आसा सदा-सदा लै राज़अ,
ज़ुंण होर देश ताह छ़ाडी होरी देबते पूज़ा करा,
तिंयां हणैं तेरी ज़ैगा का खतम।
हे बिधाता, तंऐं हेरी भोल़ै लोगे अरज़ शूणीं।
ताह दैणअ तिन्नां लै आप्पै हैअ।
ताह करनअ छ़ुटै-मुक्कै अर रैनै-गरीबो नसाफ आप्पै,
ताकि धरतीए मणछ आजू कधि बी
होरी डरैऊंदै नांईं लागे।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.