Kulvi Outer Seraji Bible
भज़न 9
ज़ितणा लै करा बिधातो शूकर
गाज़ै-बाज़ै आल़ेए सैणैं लै मुतलबैण रागा दी राज़ै दाबेदो भज़न
महान बिधाता, मुंह करनी दिला का तेरी ई ज़ै-ज़ैकार,
ज़ुंण महान काम तंऐं आसा किऐ दै, तिंयां खोज़णैं मुंह सोभी का।
ताह पिछ़ू मनाऊंणी मुंह खुशी,
तूह परम प्रधान परमेशर बिधाता आसा सोभी का बडअ, मुंह बोल़णैं तेरै ई भज़न।
ज़ांऊं तूह प्रगट हआ, मेरै दुशमणा लागा डरै पिछ़ू हटणअ,
तिंयां बधल़िआ तेभै धरनीं संघा हआ तिंयां मरी हक्क।
तूह करा मानदार अर शुचअ फैंसलअ
अर तंऐं किअ मेरअ नसाफ।
तंऐं दैनी होरी सोभी देशा लै चतैनगी
अर कदुष्ट मणछ किऐ तंऐं खतम,
तिन्नों निं तंऐं नाअं-नशाण बी डाहअ।
म्हारै दुशमण हुऐ सदा लै खतम,
तंऐं किई तिन्नें बडी-बडी नगरी खतम अर
तिंयां निं आजू कहा आद बी डाहणैं कि एथ बी रहा हंदअ होए कुंण।
पर तूह बिधाता आसा सदा लै राज़अ अर
तूह आसा राज़गाद्दी प्रैंदै नसाफ करदअ बेठदअ द।
तूह आसा राज़अ धर्मीं अर
तूह दैआ संसारे सोभी लोगा लै नसाफ।
रैनै-गरीबा लै शरण आसा तूह बिधाता ई,
किल्हैकि आफ़तीए पलका लुक्कणा लै ज़ैगा आसा तिन्नां का तूह बिधाता ई।
ज़हा का ताह बिधाते बारै थोघ आसा, तिन्नां हआ तेरअ भरोस्सअ,
ज़ुंण ताह सेटा एछा, तेऊ निं तूह कल्ही छ़ाडदअ।
बिधाता, तूह करा सियोन धारा का राज़! हाम्हां बोल़णैं तेरै भज़न
ताकि सोभी देशे लोगा का तेरै महान कामें बारै थोघ लागे।
तूह निं हत्या करनै आल़ै लै सज़ा दैणीं बिस्सरदअ,
ज़ुंण रैनै-गरीब ताह सेटा लेर-पकार पाआ,
तिन्नें शूणां तूह ई।
हे बिधाता, तूह कर मुल्है झींण!
भाल़, मेरै दुशमणै आणअ हुंह हारी-मारी!
तूह आण मुंह मौते दुआरा का छ़ड़ैऊई!
ताकि हुंह एरुशलेम नगरीए लोगा सेटा डेऊई
तिन्नां सोभी गल्ला खोज़ूं ज़ेता लै हुंह तेरी ज़ै-ज़ैकार करा।
मुंह रहणअ तिधी खुश किल्हैकि तंऐं बच़ाऊअ हुंह।
पराई ज़ातीए लोगै ज़ुंण खात्ती ती खण्हीं दी, तिंयां पल़ै तेथ आप्पू ई,
ज़ुंण ज़ज़ाल़ तिन्नैं होरी लै डाहअ त छ़ैई, तेथ शाची तिन्नें आपणीं ई ज़ांघा।
हे बिधाता, तंऐं हेरअ नसाफ करी अह गल्ल प्रगट करी कि तूह आसा धर्मीं राज़अ,
पर कदुष्ट मणछ शाचै तिन्नें आपणैं ई कामां करै।
कदुष्ट मणछ डेऊणैं सोभै जम्परी ई,
ज़ुंण देश ताह नांईं मंदै, तिन्नां लै बी आसा मौत ई।
रैनै-गरीब निं सदा बिस्सरी डाहणैं,
नां तिन्नें आशा सदा लै खतम हणीं।
हे बिधाता, ऐबै एछ, मणछ निं लोल़ी ज़ितै,
देशा-देशे लोग लोल़ी तेरी दालता दी एछी झ़ुकै,
अर तिधी लोल़ी तंऐं आप्पै नसाफ किअ।
तिन्नां मणछा लोल़ी तेरी डअर पल़ी,
तिन्नां का लोल़ी ज़ाण्हुंअ कि तिंयां आसा मणछ ई।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.