Kulvi Outer Seraji Bible
सैणीं गल्ला 9
ज्ञैना धैने बात
अक्ली बणाअं आपणअ घअर
अर तेता लै लाऐ तैहा सात थाम्ह।
तैहा काटै घरासणी लै रिठ-बाकरै,
दाखे रसा दी राल़ै तैहा मसालै संघा हेरी धाम बणाईं।
तैहा छ़ाडी आपणीं दासी लोगा लै छ़ांदै करदी,
तिन्नैं लाई धारठी प्रैंदै खल़्हुई नगरीए लोगा लै हाक्का, तिन्नैं बोलअ इहअ,
“ज़ुंण ऐडै अर भोल़ै मणछ आसा
तिन्नां लै बोला अक्ल इहअ,
‘तम्हां सोभी लै आसा छ़ांदअ,
एछा, तम्हैं खाआ धामा लै शिखा अर मसालै आल़अ दाखो रस बी झुटा।
ज़ै तम्हैं ज़िऊंणअ च़ाहा, तै छ़ाडा ऐडी संगत पोर्ही।
तैहा बाता हांढा ज़ेसी समझ़ बोला।’”
असली अक्ल
ज़ुंण सुहांगा करनै आल़ै मणछा लै शिक्षा दैआ, तेऊ पल़ा आप्पू ई शर्मिंदै हणअ!
ज़ुंण कदुष्ट मणछा नैरदअ लागा, तेऊ पल़ा उल़्टी टाभ शुणनी!
सुहांगा करनै आल़ै मणछा नैरदै निं लागी,
तेऊ डाहणीं तम्हां लै तैहा गल्ले ज़ीद,
पर ज़ै तम्हैं अक्ली आल़ै मणछा नैरे,
तेऊ करनअ तेता लै थारअ अदर।
शिक्षा बी दैणीं तेऊ लै ज़हा अक्ल होए,
तै एछणी तेऊ लै होर बी अक्ल।
बोल़णअ हआ धर्मीं मणछा लै ठीक,
सह बढाऊआ तेता करै आपणअ ज्ञैन।
बिधाते डरा हेठै रहणअ आसा अक्लीओ मूल़,
परम पबित्र परमेशरे बारै थोघ करनअ आसा समझ़।
अक्ली करै हणीं थारी लाम्मी अमर
अर तम्हैं ज़िऊंणै खास्सी साला।
अक्ली करै हणअ थारअ ई नफअ,
पर ज़ै तम्हैं अक्लीओ सुहांग करे, तेतो घाटअ बी लागणअ तम्हां ई खाणअ।
ऐडे बात
ऐडअ हणअ आसा एही नसकली बेटल़ी ज़िहअ,
ज़ुंण ज़िभा लै शाचा पार पर थोघ निं तैहा का किछ़ै हंदअ।
सह बेटल़ी रहा आपणैं दुआरे डेहल़ै,
अर नगरीए उछ़टी ज़ैगा बेशी।
संघा रहा तेस्सी बाती एछदै हांढदै लै हाक्का लाई-लाई,
इहअ बोल्दी लागी,
“ज़ुंण ऐडै अर भोल़ै मणछ आसा
तिन्नां लै बोला अक्ल इहअ,
च़ोरीए पाणीं दी लागा मिठ,
अर लुक्की करै रोटी खाणां लै लागा सुआद।
ज़ुंण एही ऐडी गल्ला शूणां तिन्नां का निं थोघ हंदअ कि एसे घअरै डेऊई आसा आजू तिन्नें मौत।
ज़ुंण तेसे घअरै डेऊई बी मुक्कै तिंयां आसा तैहा ज़ैगा गऐ दै पुजी ज़िधी मणछ मरी करै डेओआ।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.