Kulvi Outer Seraji Bible
सैणीं गल्ला 10
सुलैमाने अक्लीए गल्ला
सुलैमानै आसा एही सैणीं गल्ला किई दी:
ज़ै शोहरू अक्ली आल़ै हुऐ, तेता करै हआ ईजा-बाबा बी खुशी,
पर ऐडी लुआद चोल़ा तिन्नों दिल।
कदुष्ट मणछै डाही दी ज़ैदाता करै निं किछ़ै नफअ हंदअ,
पर मानदारी सका थारी ज़िन्दगीए फाज़त करी।
धर्मीं मणछा निं बिधाता भुखै डाहंदअ,
पर कदुष्ट मणछे दिला-मन्नें निं सह सफल दैंदअ हणैं।
ज़हा कामां लै ज़ैंईं लागा, सह हआ दाल़जी
पर ज़ुंण मैन्थ करा सह हआ सेठ।
ज़हा अक्ल हुई, सह झाल़ा गरमींए1 धैल़ै साल-फसल,
पर ज़ुंण तेभै घणीं निंजा सुत्ती रहा, तेऊ लागा बादा का शर्मिंदै हणअ।
धर्मीं मणछा सराहा सोभै,
पर कदुष्ट मणछै हआ आपणीं खाखा उपद्रभे बोल च़ोरी डाहै दै।
धर्मीं मणछा करा लोग मरी करै बी आद,
पर कदुष्ट मणछा जाआ नढैऊऐ बिस्सरी।
ज़हा अक्ल हुई सह शूणां-मना बी,
पर ज़िभा-ज़िभी शाचणैं आल़अ ऐडअ मणछ हआ पठी बरैबाद।
मानदार मणछ रहा राज्ज़ी-राम्बल़ै अर निहंचै,
पर ज़ुंण उंबल़ी बाता डेओआ सह हआ बरैबाद।
ज़ुंण शुची गल्ला खोज़णा लै मुंहैं निं निखल़दअ, सह करा होरी बी दुखी,
पर ज़ुंण गल्ला मुंहैं दैआ बोली सह करा मेल़-ज़ोल़ करनैओ काम।
धर्मीं मणछे बैण हआ ज़िन्दगीए सोबल़ा ज़िहै,
पर कदुष्ट मणछै हआ आपणीं खाखा उपद्रभे बोल च़ोरी डाहै दै।
ज़ीद डाही हआ झ़गल़ै पैईदा,
पर ज़ुंण झ़ूरी डाह सह करा होरीए ज़ुल्म बी माफ।
अक्ली आल़ै मणछो जाआ गल्ला ई का थोघ लागी,
पर ऐडै मणछा लै लागा पिठी कोल़ै बाही सज़ा दैणीं।
अक्ली आल़अ मणछ शिखल़ा ज़ेतरअ हई सका तेतरअ ज्ञैन,
पर ज़ेभै ऐडअ मणछ गल्ला करा, तेभै हआ आफ़त ई खल़ी।
सेठो धन हआ तेऊ लै फेरा-फेर बडी उछ़टी दुआली आल़ी नगरी ज़िहअ,
गरीबी करा दाल़जी बरैबाद।
धर्मीं मणछा जाआ ज़िन्दगी भेटी,
पर कदुष्ट मणछ करा आपणअ धन पाप करना लै खतम।
ज़ुंण नैरी समझ़ाऊई करै समझ़ी जाआ, तिन्नां भेटा ज़िन्दगी,
पर ज़ुंण नांईं समझ़दै, तिंयां पेठा कबाता।
ज़ुंण मन्नैं ज़ीद डाहा अर होठा का बोला कि हुंह आसा राम्बल़अ! इहअ मणछ आसा झ़ुठअ।
ज़ुंण झ़ुठी गल्ला छिंगा सह आसा ऐडअ ई।
ज़िधी खास्सी गल्ला हआ, तिधी हआ पाप,
ज़हा मणछा का अक्ल हआ, सह निं खास्सी गल्ला करदअ।
धर्मीं मणछो बैण हआ च़ोखी च़ंदी ज़िहअ,
पर कदुष्ट मणछे सोठ आसा बृथा।
धर्मीं मणछे बैणा करै हआ कई मणछो भलअ,
पर ऐडै मणछ बाहा आपणीं ज़ांघा आप्पै खराल़ी! किल्हैकि तिन्नां निं अक्ल आथी।
सह आसा बिधाते बर्गत ज़ुंण मणछा सेठ बणाआं,
थारी आपणीं मैन्था करै निं तम्हैं सेठ हंदै।
ऐडै मणछा लागा पाप करनैओ मज़अ,
पर समझ़कार मणछ हआ अक्ली करै खुश।
धर्मीं मणछा भेटा तिहअ ई, ज़िहअ सह च़ाहा,
पर कदुष्ट मणछ ज़ेता का डरा, तेऊ लै एछा सह ई आफ़त।
ज़ांऊं ढिश-बागर एछा, कदुष्ट मणछ फरल़ाईआ दूर,
पर धर्मीं मणछ रहा पाक्कै टेक्की।
ज़ै ज़ैऊंकर मणछा का ज़ै कुंणी काम ढेऊअ,
तेऊ का ज़ाण्हिंआं सह मिल्लअ खाणैं अर आछी लै धूँ लागणै ज़िहअ।
बिधाते डरा हेठै रही हआ लाम्मी अमर,
पर कदुष्ट मणछ जाआ छ़ेक्कै मरी।
धर्मीं मणछ हआ आशा डाही खुश,
पर कदुष्ट मणछा निं आशा डाही बी किछ़ै भेटणअ।
धर्मीं मणछे करा बिधाता फाज़त,
पर कदुष्ट मणछा करा सह खतम।
धर्मीं मणछे आसा अटल़ ज़िन्दगी,
कदुष्ट मणछ निं धरती दी रहणैं तिंयां मरनै।
धर्मीं मणछ करा अक्ल डाही गल्ल,
पर उंबल़ी गल्ला करनै आल़ेए ज़िभ पाणीं काटी।
धर्मीं मणछ ज़ाणा नरम गल्ला करी,
पर कदुष्ट मणछे गल्ला हआ दुजै लै पात्थरै बाहणैं ज़ेही।
Source notes (1)
- Footnote गरमींए लऊंणींए ऋता
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.