Kulvi Outer Seraji Bible
सैणीं गल्ला 8
अक्ल आसा महान
शूणां, अक्ल आसा शाददी लागी दी,
समझ़ आसा हाक्का लांदी लागी दी।
अक्ल आसा धारा प्रैंदै
अर च़फै खल़ी।
नगरीए प्रऊल़ी ज़ेसी सोभै नगरी भितरी एछा,
सह आसा तिधी खल़्हुई ज़ोरै-ज़ोरै इहअ बोल्दी लागी दी,
“लोगो, हुंह लाआ तम्हां सोभी मणछा लै हाक्का,
मेरी आसा तम्हां लै अरज़।
ऐणैं मणछो, सैणैं हणअ शिखल़ा,
ऐडै मणछो, तम्हैं करा अक्ल।
मेरी नमोल गल्ला शूणां,
मुंह खोज़णीं तम्हां का सुंबल़ी अर भली गल्ला।
किल्हैकि हुंह खोज़ा शुची गल्ला
झ़ुठी गल्ला करनै का आसा मुंह नफरत।
मुंह खोज़णीं तम्हां का धर्मीं गल्ला,
तेथ निं एक गल्ल बी उंबल़ी या कबाता पाणै आल़ी आथी।
समझ़कार मणछा लै आसा ईंयां गल्ला सान,
ज़ुंण मणछ ज्ञैन च़ाहा, तेऊ लै आसा ईंयां आज़री।
तम्हां का च़ंदी होए नां होए पर मेरी शिक्षा लऐ आप्पू का डाही,
च़ोखै सुन्नैं का खास्सअ आसा आप्पू का ज्ञैन डाहणअ भलअ।
अक्ल आसा किम्मती रत्ना का बी खास्सी किम्मती,
अक्ली बराबर निं संसारै किछ़ै च़ीज़ आथी।
हुंह आसा अक्ल अर मुखा आसा सोर,
मुखा आसा ज्ञैन अर भलै-बूरे समझ़।
बिधाते डरा हेठै रहणअ हआ
बूराई संघै ज़ीद डाहणीं।
शरेरी गल्ला, घमंड कदुष्ट गल्ला अर उंबल़ी गल्ला का आसा मुंह नफरत।
सुंबल़ी सोर अर सुंबल़ी बुध दैआ हुंह ई,
समझ़ अर बल बी आसा मुखा ई।
राज़अ बी करा मुंह अक्ली करै राज़,
अर मुंह ई करै बणाआं तिंयां धर्मीं बधान।
सोभी बज़ीरा, कार-करिंदै अर
पृथूईए सोभी पांच़ा लै करा हुंह ई नसाफ करना लै मज़त।
ज़ुंण मुंह अक्ली बाखा झ़ूरा, तिन्नां लै झ़ूरा हुंह बी,
ज़ुंण मानदारी संघै मुंह लोल़ा, तेऊ जाआ हुंह भेटी।
हुंह सका तम्हां सेठ अर मशूर,
खास मणछ अर सफल बणाईं।
ज़ुंण तम्हां मुखा भेटणअ,
सह आसा च़ोखै सुन्नैं-च़ंदी का बी किम्मती।
हुंह हांढा तैहा बाता
ज़ेथ धर्म अर नसाफ आसा।
ज़ुंण मुल्है झ़ूरा तिन्नां लै दैआ हुंह ज़ैदात,
तिन्नें घअरै भर्हिया खज़ानै।
बिधाता आसा हुंह सोभी का आजी बणाईं दी,
खास्सी साला पैहलै ज़ेतरै बी तेऊ काम किऐ तेता का आजी बणाईं हुंह।
ज़ात सोभी का आजी बणाईं बिधाता हुंह ई
संसारे शुरूआत हणैं का आजी आसा हुंह ई बणाईं डाही दी।
ज़धू मेरअ ज़ल्म हुअ, तधू नां ईंयां सात समुंदर थिऐ,
नां ईंयां पाणींए सोबल़ा आथी ती।
ज़धू मेरअ ज़ल्म हुअ,
तधू निं ईंयां उछ़टी-उछ़टी ज़ोता बी टकैल़ी आथी ती।
सोभी का आजी बणाईं बिधाता हुंह ई,
अह धरती, संसार अर तेते हर कणीं बी बणाईं तेता बाद ई।
ज़धू बिधाता भ्रमंड,
अर समुंदरा प्रैंदै सरग टकैल़अ, तधू बी थिई हुंह तिधी।
ज़ेभै बिधाता सरगै बादल़ टकैल़ै
अर डुघै समुंदरा दी सोबल़ा फुटी, तधू बी थिई हुंह तिधी।
ज़धू बिधाता समुंदरे पाणीं लै सिअं लाई
अर ज़धू पृथूईए आथरी दी सूत खिंच़अ, तधू बी थिई हुंह तिधी।
हुंह ती तधू बिधाता संघै कारीगीरा ज़ेही मज़त करदी लागी दी,
अर हर धैल़ै हआ त बिधाता मुंह करै खुश,
अर हुंह बी थिई बिधाता सेटा खुश।
हुंह ती बिधाते बसाऊऐ दै संसारा करै खुश,
अर मणछा संघै संगत ती मेरी मौज़।
लान्हैंओ, ऐबै बोला हुंह तम्हां खारकै लै मेरी गल्ला शूणां,
ज़िहअ हुंह बोला, तम्हैं करा तिहअ ई तै रहणैं तम्हैं खुश।
ज़ुंण हुंह खोज़ा, तेता शूणां,
अक्ल करा, इना गल्ला निं पिठी पिछ़ू लै करी।
ज़ुंण मणछ मेरी गल्ला शूणां,
ज़ुंण मेरै दुआरै धैल़ एछा अर मुंह न्हैल़ै रहा बेशी,
तिंयां रहणैं सदा खुश।
किल्हैकि ज़हा हुंह भेटा, तेऊ भेटा ज़िन्दगी,
अर बिधाता हआ तेऊ करै खुश।
पर ज़हा हुंह नांईं भेटी, सह बाहा आपणीं ज़ांघा खराल़ी,
अर ज़ुंण मुंह संघै ज़ीद डाहा, सह झ़ूरा आपणीं मौता लै।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.