Kulvi Outer Seraji Bible
सैणीं गल्ला 7
विश्वास घाती आसा ऐडअ
मेरै लान्हैंओ, ज़िहअ हुंह बोला, तेता शूणां राम्बल़ै करै
ज़िहअ हुंह बोला, तेता निं कधि बिस्सरी।
ज़िहअ हुंह बोला, तम्हैं करै तिहअ ई, तेता करै ज़िऊंणै तम्हैं
अर मेरी शिक्षा डाहै आप्पू का एही, ज़ेही तम्हैं आपणीं आछिए फाज़त करा।
मेरी शिक्षा डाहै आप्पू का गुंठी बान्हीं दी मुंदल़ी ज़ेही,
अर तेता डाहै आपणैं दिलै सदा डाही।
अक्ली डाहा तम्हैं आप्पू संघै धर्म बैहणी ज़ेही
अर सुंबल़ी सोर लोल़ी थारी पाक्की साथण हुई।
तिन्नां निं तम्हैं बगैनी बेटल़ीए ज़ज़ाल़ा दी शाचणैं दैणअ
ज़ुंण च़ंदरी तम्हां लै मिठी-मिठी गल्ला करा।
च़ंदरी बेटल़ी
एकी धैल़ै त हुंह आपणैं घअरै
तीरू बाती बागा बाखा भाल़अ लागअ द।
मुखा शुझुऐ तेथ बागै कई ऐणैं मणछ,
पर तिन्नां जैंदरी त एक खारकअ मणछ बेघै ऐडअ।
सह मणछ त तेऊ घअरे कणोडै बाती तैहा बाता हांढदअ लागअ द,
ज़हा घअरै एही च़ंदरी बेटल़ी रहा ती।
अह गल्ल हुई सान्हां,
ज़ाथी गअ त न्हैरअ बी हई।
तेखअ निखल़ी सह बेटल़ी तेऊ सेटा तेसे घअरा बागै,
तैहा तै झिकल़ै बी कंज़री बेटल़ी ज़िहै बान्हैं दै।
सह बेटल़ी आसा बी ती कंज़री ई,
सह थिई ठुल़गर अर आपणैं घअरै निं सह टेक्कदी ई आथी ती।
केभै हआ ती सह कणोडै रही दी कहा भाल़ी,
केभै रहा किधी च़फै बेठी अर केभै रहा बज़ारै कहा न्हैल़ी लागी।
तेखअ भाल़अ मंऐं कि तैहा दैनी तेऊ खारकै मणछा लै च़ुंज़ी-माख्खी अर मल़्हैची,
संघा लागी तेऊए आछी कोहरअ भाल़ी इहअ बोल्दी,
“आझ़ किअ मंऐं मेल़-ज़ोल़े बल़ीदान,
आझ़ हुई मेरी मानत पूरी।
तैही आई हुंह ताह सेटा लै घअरा का बागै
हुंह ती ताह ई लोल़ी लागी दी अर ऐबै आसा तूह मुंह सेटा इधी।
मंऐं आसा आपणैं पलगा प्रैंदै बेल-बूटै आल़ी बाछे च़ादर छ़ैई दी,
ज़ुंण मिसर देशा का आसा आणी दी।
मंऐं आसा बछ़ाऊणैं दी सैंट, अगर, दाल़चिनी
अर खुशबूदार मसालै छ़ल़िकै दै।
ऐबै च़ाल्ल तूह मुंह संघै हाम्हां झ़ूरनअ एकी-दुजै लै सारी राची,
हाम्हां करनी दोत्ती तैणीं मौज़।
किल्हैकि मेरअ मर्ध निं घअरै आथी
सह आसा किधी दूर देशा लै डेऊअ द।
तेऊ आसा घअरा का ढब्बैओ भरी थैल्लू निंयं द,
दूई हबतै तैणीं निं सह बापस घअरै पुजदअ।”
इना एही-एही लोभणैं आल़ी गल्ला करी किअ तैहा सह मणछ आपणैं बशै,
अर मिठै मत्रै चैल़अ सह तैहा आपणैं ज़ज़ाल़ा दी।
सह ऐडअ मणछ लागअ तैहा पिछ़ू इहअ हांढदअ,
ज़िहअ काटणै आल़ै पिछ़ू गाभू हांढा,
अर ज़िहअ हरन खल़ाक्की प्रैंदै आपणअ खूर डाहा।
तेऊ का निं इहअ थोघै कि खिरी बिन्हणअ तेऊओ काल़ज़अ कतीरा करै।
सह खारकअ मणछ आसा इहै च़ेल्लू ज़िहअ ज़ुंण च़ुनणें तैणीं झ़टपटै ज़ुआल़ै पेशा,
तेऊ का निं इहअ थोघ लागदअ कि एथ आसा आजू मेरी मौत!
लान्हैंओ, धैन दैई शूणां,
कि हुंह तम्हां लै किज़ै बोला!
थारअ दिल निं लोल़ी एही बेटल़ी दी लागअ,
एही बाता निं भूली करै बी डेऊई।
किल्हैकि एही बेटल़ी किऐ खास्सै मणछ बरैबाद
अर केतरै लोग गऐ इना पिछ़ू ज़ानीं का खतम हई।
एही बेटल़ीए घअरा बाखा डेऊणअ आसा जम्पर,
सह बात पजैल़ा तैहा ज़ैगा ज़िधी मणछ मरी करै डेओआ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.