Kulvi Outer Seraji Bible
सैणीं गल्ला 6
ऐडै निं रहा
लान्हैंओ, ज़ै तम्हैं कहा इहै पाखलै मणछे ज़मानत लए,
ज़ुंण आपणअ ऋण नांईं भरी सकदअ,
तै आसा सह तम्हैं ज़बान दैनी दी
तम्हैं शाचणैं आपणीं ई ज़िभे बैणा पिछ़ू।
ऐबै हुअ तम्हां होरीए ज़मानती पिछ़ू,
ज़हा संघै करार आसा किई दी
तेऊ मणछे च़रणैं पल़ी सह मनैऊंणअ कि
सह ताल्है तेता का छ़ुटकारअ दैए
एऊ कामां लऐ तम्हैं तेभी करी,
तेभै तैणीं नां बेशी नां सुत्ती।
तम्हैं लऐ एता का इहै बच़ी ज़ेही हरन अर
च़ेल्लू-पखीरू शकारी का बच़ा।
ज़ैऊंकर निं हणअ
आरो दल़िदरीओ, इना गल्ला शिखल़ा चिटा का,
तिन्नों काम-काज़ भाल़ी करा अक्ल,
चिटो नां कुंण राज़अ हंदअ
अर नां तिन्नां का कामां कराऊंदअ मेट हंदअ!
तैबी झाल़ा तिंयां ज़ेठै-शाहल़े गरमीं दी आप्पू लै ज़िणस
ताकि हिंऊंदै तिन्नां का खाणां लै होए।
दल़िदरीओ, तम्हां केभै तैणीं रहणअ लाम्मै पल़ी?
तम्हां केभै तैणीं रहणअ निंजा सुत्ती?
दल़िदरी सोठा इहअ, “थोल़ी घल़ी लऊं होर सुत्ती,
अज़ी लणअ हिक्का प्रैंदै हाथ दोछ़ी सुत्ती!
एक सताअ लणअ निंजो होर दैई!”
सुत्ती रहणैंओ थोघ लागणअ तेऊ का तेभै
ज़ांऊं गरीबी तेऊ पिछ़ू छ़ूरी पाई च़ोरा ज़ेही पल़णीं।
कबध खटणै आल़ै कदुष्ट मणछ
रिंगा फेरा-फेर उंबल़ी गल्ला करदै,
तिंयां करा सानै-कानै गल्ला
ताकि तिंयां होरी लै धोखअ दैए।
तिंयां सोठा आपणैं दिलै हर बगत उंबल़ी गल्ला,
अर कबल्लै करा उपद्रभ खल़ै।
तिंयां इहै मणछा लै एछणी केभै नच़ानक आफ़त,
कि सह हणअ हेरा-हेरी खतम अर तेऊ निं बच़णा लै बात भेटणीं।
छ़ह गल्ला आसा एही ज़ेता का बिधाता नफरत करा,
एही आसा ईंयां सात पै ज़ेता बिधाता नांईं मंदअ:
पैहलअ इहअ मणछ ज़ुंण घमंड करी दुजै लै आछी पेच़ा,
दुजअ इहअ ज़ुंण आपणीं ज़िभा का झ़ुठअ बोला,
चिअ ज़ुंण नर्दोश मणछे हत्या करा,
च़ौथअ ज़ुंण आपणैं मन्नैं बूरी गल्ला सोठा,
पांज़ूअ ज़ुंण कबध करना लै ठुर्ही डेओआ,
छ़हुअ सह ज़ुंण झ़ुठी शाजत दैआ,
अर सातुअ सह मणछ ज़ुंण भ्रैहरू मांझ़ै झ़गल़अ पाआ।
कंज़रैई का रहै दूर
लान्हैंओ, तम्हैं करा तिहअ
ज़िहअ थारै ईज-बाब खोज़ा बोला,
तिन्नें शिक्षा डाहै सदा गांठ दैणैं ज़ेही आद
अर गल़े हारा ज़ेही आप्पू का सदा।
तिन्नें गल्ला करै शुझणीं ताखा आजू बात,
सुत्तदा हणीं तेता करै तेरी फाज़त
अर ज़ागदा करनी तिन्नां शिक्षा ताह संघै गल्ला।
किल्हैकि तिन्नें शिक्षा आसा लाटूए प्रैश्शै ज़ेही,
तिन्नों नैरनै-समझ़ाऊंणैं करै लागा ज़िन्दगी ज़िऊंणेंओ थोघ,
ताकि तम्हैं कंज़री बेटल़ी का दूर रहे
अर पराई बेटल़ीए लोभणैं आल़ी गल्ला दी नां शाचे।
हेरनी-शुणनी भाल़ी निं तम्हैं तैहा लै लोभणूंई,
तैहा निं लोल़ी तम्हैं आपणीं आछी करै मोहै,
किल्हैकि कंज़री बेटल़ी सका एकी रोटी पिछ़ू बी थारी हई
पर कंज़रैई करै सका तम्हैं पठी बरैबाद हई।
इहअ निं हई ई सकदअ कि
कुंण आपणीं हिक्का प्रैंदै ज़ल़दै कोयलै डाहे अर तेऊए झिकल़ै नां दझ़े!
इहअ बी निं हई सकदअ कि
ज़ल़दी ल़्हूली दी हांढी कसरै खूर निं दझ़े!
ज़ुंण पराई बेटल़ी सेटा डेओआ तेऊए हआ एही ई दशा,
होर ता होर ज़ुंण तैहा छ़ूंए बी, सह बी निं सज़ा का बच़ी सकदअ।
ज़ुंण आपणैं पेटे भुख बशैल़णा लै च़ोरी करा
एही निं लोग तेऊ लै किछ़ बी बोल्दै,
पर तज़ी बी ज़ै तेऊ च़ोरो थोघ लागे, तेऊ लागणअ सात गुणा हुआह भरनअ
अर सह हणअ सोभी गल्ला का रित्तअ।
पर ज़ुंण पराई बेटल़ी संघै रहा-बस्सा सह आसा ऐडअ ई,
सह करा आप्पू आप्पै बरैबाद।
तेऊ मार बी पल़णीं अर बेइज़ती बी हणीं
अर सह कल़ंक बी रहणअ तेऊ सारी अमरा।
किल्हैकि ज़ीद-मिश अर रोश्शै हआ मणछ कांणअ,
तेखअ निं तैहा बेटल़ीए मर्धै तेऊ मणछा लै झींण लाई करी।
एता पिछ़ू निं तेऊ किछ़ै डांड या हुआह ढाकी लाअ,
सह मणछ तेऊ लै सारी ज़ैदात बी दैए, तैबी निं सह मंदअ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.