Kulvi Outer Seraji Bible
सैणीं गल्ला 5
कंज़रैई करने आफ़त
मेरै लान्हैंओ, मेरी अक्लीए गल्ला दी दैआ धैन
अर ज़ुंण हुंह समझ़ दैआ तेता शूणां कान लाई।
एता करै एछणी तम्हां सुंबल़ी सोर
अर थारी गल्ला का जाणअ तेखअ ज़ाण्हुंई कि तम्हां का आसा ज्ञैन।
किल्हैकि हई सका कि बगैनी बेटल़ी होए च़ाऐ मखीरा ज़ेही मिठी,
अर तेसे माख्खू होए च़ाऐ घिऊ ज़िहै,
पर तेतो नतिज़अ आसा इहअ कि सह निं तम्हां लै
नागदौणा ज़ेही कल़बिश अर दाह का सुआई किछ़ै छ़ाडदी।
सह पजैल़ा तम्हां सुरगै,
ज़ैहा बाता सह बेटल़ी हांढा, सह आसा मौता बाखे बात।
एही बेटल़ी निं तैहा बाता हांढदी ज़ेथ ज़िन्दगी आसा,
सह आसा च़ंदरी अर तैहा का निं आप्पू ई का थोघ हंदअ कि तैहा लै किज़ै आसा हंदअ लागअ द।
लान्हैंओ, मेरी गल्ला शूणां,
मेरी इना गल्ला निं तम्हैं कधि बिस्सरी आथी।
एही बेटल़ी का रहै तम्हैं दूर ई!
तम्हैं निं तेसे दुआरे डेहल़ा नेल़ बी डेऊई!
इहअ करै हणअ थारअ आपणअ ज़ुआनीओ अदर खतम
अर आपणीं बाकी ज़िन्दगी बी करनी तम्हां इहअ करै नर्दैई लोगे बशै।
तेखअ पाणीं थारी ज़ैदात बी बगैनै,
अर ज़ेथ तम्हैं मैन्थ हणीं किई दी सह च़ीज़ हणीं होरीए।
ज़ांऊं खिरी तम्हां ज़ोर-ज़ाहण निं रहणैं,
तेभै बोल़णअ तम्हां दाह धका दी मुंडै हाथ लाई इहअ,
“मंऐं सैणें शिक्षा किल्है निं बोल़ी आद डाही?
ज़ुंण मुंह नैरा-समझ़ाऊआ तै, मंऐं तिन्नें किल्है निं शूणीं।
मेरै गूरूए शिक्षा दी निं मंऐं धैन दैनअ,
मुंह हुअ त तेथ आपणअ मन्न लाणअ।
ऐबै च़ाल्लअ हुंह पठी बरैबाद हई,
ऐबै निं हुंह सभा दी लोगा का मुंह रहैऊंणै जोगी रहअ।”
तम्हैं झुटै सिधअ आपणैं ई कुहै का पाणीं!
मतलब सिधअ आपणीं ई बेटल़ी लै झ़ूरै।
तम्हैं निं एही सोबल़ा ज़िहै लोल़ी हुऐ ज़ेता का कज़ोहै बेटल़ी झुटा,
तिन्नां संघै बस्सी हुई दी लुआदा करै हणअ थारअ ई घाटअ!
आपणीं सोबल़ो पाणीं डाहा तम्हैं आप्पू लै आपणीं बेटल़ीए तैणीं,
अह निं होरी बेटल़ी लै बांडणां लै आथी।
खारकी अमरा लोल़ी तेरी लाल़ी ताल्है भरी कुहै ज़ेही बर्गत हुई,
तूह रहै तैहा ई संघै खुश अर मगन।
सह लोल़ी ताल्है हरनी ज़ेही लोभणैं आल़ी हुई,
तेसे हिक्का भाल़ी लोल़ी तेरअ शाह हरअ फिरअ
अर तम्हैं लोल़ी एकी-दुजै लै खास्सै झ़ूरै।
ए मेरै शोहरूआ, तूह होरीए बेटल़ी भाल़ी किल्है पल़ा ज़ाहै-मोहै?
अर होरी बेटल़ी संघै किल्है मल़्हैछिया?
किल्हैकि बिधाता का हआ सोभै गल्ला शुझदी लागी दी कि तम्हैं किज़ै करा,
तम्हैं ज़िधी बी डेओए, सह हआ भाल़अ लागअ द।
कदुष्ट मणछे पाप आसा तिन्नां आप्पू लै फाही,
तिंयां शाचणैं आपणैं ई पापा करै बूणै दै ज़ज़ाल़ा दी।
तिंयां मरनै किल्हैकि तिंयां निं आपणैं बशै आथी,
तिन्नें ऐडै खैला निंणै तिंयां आप्पै मौता बाखा।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.