Kulvi Outer Seraji Bible
सैणीं गल्ला 16
मणछ सोठा कई गल्ला,
पर ज़िभा का बैण भराऊणैं आल़अ हआ बिधाता।
मणछ सोठा इहअ कि ज़ुंण तेऊ किअ सह ई आसा ठीक,
पर बिधाता तोला तेऊओ मन्न।
सोभै गल्ला छ़ाडा बिधाता सेटा,
तेऊ करनी थारी गल्ला सफल।
ज़ुंण बी च़िज़ा बिधाता बणाईं, तेतो आसा किज़ै नां किज़ै मकसद,
इधी तैणीं कि कदुष्ट मणछ आसा बनाशे धैल़ी लै।
घमंडी लै करा बिधाता नफरत,
तिंयां निं सज़ा का बच़ी सकदै।
ज़ै तम्हैं मानदार अर शुचै-पाक्कै रहे, तै छ़ाडणीं बिधाता तम्हां लै माफी,
ज़ै तम्हैं ज़िहअ बिधाता बोले तिहअ ई करे, तै निं थारअ किछ़ै बूरअ हणअ।
ज़ै बिधाता तम्हां करै खुश होए,
तै सका थारै दुशमणा संघै बी मेल़-ज़ोल़ हई।
धोखै करै खास्सी कमाई का आसा,
मानदारी दी खटअ द धख ज़िहअ ई भलअ।
मणछ सोठा आपणैं मन्नैं खास्सी गल्ला,
पर असली दी कहा बाता लागा डेऊणअ, तेता खोज़ा बिधाता आप्पै।
राज़े खाखा का निखल़ै दै बैण हआ सुरगा बाखा,
तेऊओ फैंसलअ हआ ठीक ई।
बिधाता च़ाहा कि हर तराकल़ी अर बाटा दी निं लोल़ी धोखअ हुअ,
लणैं-दैणैं लै निं लोल़ी कोहै ठगै।
राज़अ निं बूराई मंदअ ई,
किल्हैकि तेऊए राज़ा दी हआ नसाफ तै रहा सह बणी।
राज़अ च़ाहा शुची गल्ला शुणनअ,
ज़ुंण शुचअ बोला, तेऊओ साथ बी हेरा तेखअ सह दैई।
अक्ली आल़अ मणछ करा राज़ै खुश डाहणें कोशिश,
किल्हैकि ज़ै राज़ै रोश्शै गई एछी, तै सका कुंण नां कुंण मरी बी।
ज़ै राज़अ खुश होए अर तम्हां लै राज्ज़ी होए,
सह हणअ तम्हां लै बरसाती ज़िहअ, अर तम्हैं रहणैं तै ज़िऊंदै।
अक्ल भेटणीं हआ सुन्नैं का बी राम्बल़ी,
अर समझ़ एछणी हआ च़ंदी का भली।
भलअ मणछ हांढा तैहा बाता, ज़ेथ बूराई निं हंदी,
तैही डाहणअ धैन कि तम्हैं कैहा बाता च़ाल्लै, तेता करै सका थारी ज़िन्दगी बच़ी।
ज़हा मणछा ठोहल़ च़ाल्ली दी होए लागी अर
ज़ुंण मणछ बरैबाद आसा हणैं आल़अ, तेता का आजी एछा तेऊ घमंड।
मानदार रही गरीब रहणअ आसा
कहा लुटी-घशिट्टी करै सेठ हणैं का भलअ।
ज़ुंण बोल़णैं का आजी बच़ार करा, सह हआ सफल,
ज़सरअ भरोस्सअ बिधाता दी आसा, सह रहा सदा खुश।
सैणैं अर अक्ली आल़ै मणछा लै बोला सोभै समझ़कार,
मिठअ बोल़णैं आल़अ सका होरी बी सखाऊई।
अक्ल आसा एही सोबल़ ज़ुंण ज़िन्दगी दैआ,
पर कबुधी मणछा भेटा तेऊए ऐडी गल्ला लै सज़ा।
अक्ली आल़अ मणछ करा गल्ला करनै का आजी बच़ार,
ज़ुंण सह बोला, तेता करै भेटा होरी बी शिक्षा।
झणैल़ू बैण हआ मखीरा ज़िहै,
सुआद बी मिठअ अर शाह बी फिरा हरअ।
एक बात हआ एही बी ज़ुंण मणछा का भली ज़ाण्हिंआं,
पर सह सका मौते दुआरै बी पजैल़ी।
मज़दूरे भुख ई कराऊआ तेऊ का खास्सी मैन्थ
किल्हैकि तेऊए भुख करा तेऊ कामां करना लै मज़बूर।
उपद्रभी मणछ सोठा कि तेऊ किहअ करै पै करनै होर तंग,
तिन्नें हआ खाखे बैण बी आगीए लुपल़ै ज़िहै दहंदै।
कदुष्ट मणछ पाआ एही फुआह,
ज़ेता करै आफ़त बी पल़ा अर साथ-संगत बी चुटा।
कदुष्ट मणछ दैआ आपणैं साथी-संघी लै बी धोखअ,
संघा निंयां तिन्नां बरैबादी बाखा।
ज़ुंण तम्हां लै सानै-कानै गल्ला करा,
तिन्नें मन्नैं हआ किज़ै नां किज़ै छ़ल़-कपट।
धर्मीं मणछो पुआज़अ आसा लाम्मी अमर,
अर पल़ू हआ शोभा दैणैं आल़अ मुगट।
बल रहैऊंणै का आसा सबर डाहणअ भलअ,
अर आपणअ मन्न बशै डाहणअ हआ सारी नगरी ज़ितणैं का बी भलअ।
लोग पाआ पुछ़णा लै परच़ी कि बिधाता किज़ै च़ाहा,
पर बिधाता छ़ांटा तेता मांझ़ै एक आप्पै।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.