Kulvi Outer Seraji Bible
सैणीं गल्ला 15
बिधाता हआ सोभी भाल़अ लागअ द
राम्बल़ै करै गल्ला करी हआ रोश्श बी ठांढअ,
पर कल़ुई गल्ला पाआ होर बी खास्सअ खरोल़।
अक्ली आल़अ मणछ ज़ाणा लोगा का ज्ञैन खोज़ी,
पर कबुधी मणछा का निखल़ा ऐडी ई गल्ला।
बिधाता हआ सारै दी भाल़अ लागअ द कि संसार किज़ै करा,
सह भाल़ा हाम्हां कि हाम्हैं भलअ करा कि बूरअ।
झणैल़ू गल्ला करनी हआ तेऊ बूटा ज़ेही ज़ेता का ज़िन्दगी भेटा,
पर उंबल़ी गल्ला करै हआ शाह बी धिठअ।
ईजा-बाबा लै नशूंण हणअ आसा कबुध ई,
पर ज़हा सोर-समझ़ हुई, सह मना तिन्नें सोभै गल्ला।
भलै मणछ जाआ सेठ हई,
पर कदुष्ट मणछ हआ एकी धैल़ै ज़रूर दाल़जी।
ज्ञैन खोज़ा तिंयां ई ज़हा का अक्ल हुई,
ऐडै का निं किछ़ै हंदअ।
ज़ेभै भलै मणछ अरज़ करा, बिधाता हआ तेता लै खुश,
पर कदुष्ट मणछे बल़ीदाना लै करा सह नफरत।
ज़ुंण भलअ करा तेऊ लै झ़ूरा बिधाता बी,
पर कदुष्ट मणछे च़ाल-च़लणा का हआ तेऊ नफरत।
ज़ुंण सुंबल़ी बाता का कबाता पेठा, तेऊ भेटणीं घोर सज़ा
अर ज़ुंण नैरी-समझ़ाऊई लै ज़ीद डाहा, सह मरा छ़ेक्कै।
ज़ेऊ संसारै मणछ मरी करै पुजा, तिधी बी हआ बिधाता भाल़अ लागअ द,
तेऊ का हआ इहअ बी थोघ कि थारै दिलै किज़ै आसा।
सुहांगा करनै आल़अ मणछ निं नैरी समझ़ाऊई मंदअ,
सह निं अक्ली आल़ै मणछा का सलाह लंदअ।
ज़ै दिलै खुशी हुई तेता करै सह जाआ मणछे मुंहैं शुझुई,
पर ज़ै दिल चुटअ, तेता करै हआ आत्मां बी दुखी।
ज़हा सोर समझ़ हुई, सह च़ाहा शिखल़णअ,
पर कबुधी मणछ जाआ ऐडी गल्ला करै ई रज्ज़ी।
गरीब मणछे ज़िन्दगी हआ कठण,
पर खुशी दिले मणछे ज़िन्दगी हआ मौज़।
सेठ हई आफ़ता दी पल़णै का आसा,
बिधाते डरा हेठै दुखी रहणअ भलअ।
नफरत करनै आल़ै घअरै शिखा खाणैं का आसा,
तेऊ घअरै शुक्की भाज़ी करै रोटी खाणीं ठीक ज़ुंण इज़त करा!
रोश्शा करै हआ झ़गल़ै पैईदा,
पर सबर डाही हआ मेल़-ज़ोल़।
ज़ैऊंकर हणअ हआ कांडे झ़ाकल़ा बाती हांढणअ,
पर मानदार मणछा निं किछ़ै आफ़त पल़दी।
अक्ली आल़ी लुआदा करै हआ बाब खुश,
पर ऐडअ मणछ निं आपणीं ईजो अदर करदअ।
कबुधी मणछ हआ आपणीं ऐडी गल्ला लै खुश,
पर ज़हा सोर-समझ़ हुई, सह हांढा आज़री बाता।
राम्बल़ी सलाह करै हआ हर काम सफल,
एता बाझ़ी हआ सारी तरकिबा बृथा।
ज़ै मोक्कै दी राम्बल़अ ज़बाब दैनअ,
तेता करै हआ सोभ लोग खुश।
अक्ली आल़अ मणछ हांढा तैहा बाता, ज़ेथ तेऊए ज़िन्दगी सफल हआ,
सह निं तैहा बाता डेऊंदअ ज़ेथ तेऊए ज़िन्दगी बरैबाद हआ।
ज़ुंण घमंडी आसा, तेऊओ घअर निं बिधाता हणैं दैंदअ,
पर बिधबा बेटल़ीए ज़ैदात डाहा सह बच़ाऊई।
कदुष्ट सोठा लै करा बिधाता नफरत,
शोभली गल्ला करनै आल़ै मणछा लै हआ सह खुश।
मांण करनै आल़अ पाआ आपणैं टबरा लै बी आफ़त,
पर ज़ुंण रेशपत लणैं-दैणैं का नफरत करा, तेऊए अमर हआ खास्सी।
भलअ मणछ करा गल्ला करनै का आजी बच़ार,
पर कदुष्ट दैआ हेरा-हेरी ज़बाब, संघा हआ आफ़त खल़ी।
ज़ेभै भलै मणछ बिधाता का अरज़ करा, तिन्नें हेरा सह शूणीं,
पर कदुष्ट मणछा का रहा सह दूर ई।
प्रैश्शअ मुंह भाल़ी हआ दिल खुश
अर खुशी दैणैं आल़ै समादा शूणीं फिरअ शाह हरअ।
ज़ुंण नैरी-समझ़ाऊई लै धैन दैआ,
सह हआ अक्ली आल़अ मणछ।
ज़ुंण शिक्षा नांईं मंदअ, सह करा आप्पू लै आप्पै घात,
पर ज़ुंण नैरी-समझ़ाऊई करै समझ़ा, तेऊ एछा अक्ल।
बिधातो अदर करी एछा अक्ल ई,
ज़ै तम्हां अदर लोल़ी, तै लागा शरीफ हणअ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.