Kulvi Outer Seraji Bible
सैणीं गल्ला 17
बिधाता परखा मन्न
शांती दी शुक्की रोटी खाणीं आसा तेऊ घअरै धामा खाणैं का भली,
ज़ेथ कबल्लै झ़गल़ै हआ पल़ै दै।
अक्ली आल़अ दास बी करा आपणैं मालके तेऊ शोहरू प्रैंदै राज़ ज़सरअ अदर निं हंदअ,
अर तेऊ दासा भेटा तिन्नें ज़ैदाता दी बी हेस्सअ।
ज़िहअ सुन्नैं अर च़ंदी आरनैं आगी दी परखा,
तिहअ परखा बिधाता मणछो मन्न।
कदुष्ट मणछ दैआ कदुष्ट ई गल्ला दी धैन,
झ़ुठअ मणछ बी दैआ झ़ुठी ई गल्ला दी धैन।
ज़ुंण गरीब मणछो सुहांग करा, सह करा तेऊ बिधाते बेइज़ती ज़ुंणी तिंयां बणाऐं,
ज़ुंण कसरी खरी लै हास्सा सह निं सज़ा का बच़ी सकदअ।
प्रोढे शोभा हआ तिन्नें पोचै,
अर लान्हें शोभा हआ तिन्नें ईज-बाब।
ज़हा मणछे इज़त हुई, तिंयां निं झ़ुठी गल्ला बोल्दै,
अर ऐडै का निं बृथा बैण बोल़णैं का सुआई किछ़ै हंदअ।
कई मणछ सोठा इहअ कि रेशपत करा च़मत्कार करनै आल़ी मणीं ज़िहअ काम,
तिन्नों विश्वास आसा इहअ कि एता करै सका किछ़ बी हई!
ज़ै तम्हैं इहअ च़ाहा कि लोग लोल़ी तम्हां लै झ़ूरै, तै लागा तिन्नें गलती लै माफी दैणीं,
ज़ै गलती आद डाही, तेता करै पल़ा साथ-संगती बी फूट।
अक्ली आल़अ मणछ जाआ एकी बारी ठोल़ शूणीं समझ़ी,
पर ऐडअ मणछ निं शौआ बारी डांगै खाई बी समझ़दअ।
कदुष्ट आदमी निखल़ा आपणैं सैणैं लै उपद्रभ करना लै आजू,
पर तिन्नां मारदी एछणी नर्दैई सैना।
कबुधी मणछ ऐडै कामां करदै भेटणैं का भलअ आसा
सह भाल्लण भेटणीं भली ज़सरअ बच़अ आसा लुक्कअ द।
ज़ुंण भलाईए बदल़ै बूरअ करा,
तेऊ घअरा का निं बूराई दूर हंदी।
झ़गल़े शुरूआत हआ बडै दरैऊआ दी लाऐ दै रोक्के संधा ज़ेही, ज़ेता का धख-धख पाणीं चुहंदअ लागा,
सह संध लागा किहअ करै बंद करनी, नांईं ता हआ आफ़त खल़ी।
नर्दोश मणछ दोशी बणाणअं अर कदुष्ट मणछ छ़ाडणअ!
इना दुही गल्ला का करा बिधाता नफरत।
ऐडै मणछो शिक्षा लणा लै च़ंदअ किज़ू दैणअ
ज़ै तिन्नां शिखल़णअ ई निं आथी।
साथी रहअ सदा साथी,
ज़ेभै आफ़त पल़ी, तेभै च़ोरा रिश्तैदार बी मुंह।
ज़हा सोर-समझ़ निं हुई,
सह मणछ लआ होरीए ऋणा पिछ़ू ज़मानती।
ज़ुंण पाप करना लै झ़ूरा, सह झ़ूरा आफ़त खल़ी करना लै,
ज़ुंण कबल्ली सेखी फणाटा, सह पाआ आप्पू लै आफ़त।
ज़ुंण बूरअ सोठा अर बूरअ बोला,
तेऊ निं आप्पू बी भलअ हंदअ, तेऊ लै पल़ा आफ़त ई।
ज़ुंण शोहरू ऐडी गल्ला करा,
तिन्नें हआ ईजा-बाबा बी दुख ई दुख।
ज़ै मन्न खुश हुअ, तेता करै रहा मणछ नरोगअ,
ज़ै दिल चुटअ, सह दैआ हाडकै बी चजेऊई।
कदुष्ट पांच़ ढाका गलत फैंसलै करना लै रेशपत,
संघा पांच़ी बी हआ उंबल़ी।
अक्ली आल़अ मणछ भाल़ा कि कुंण काम आसा समझ़कारी आल़अ,
पर ऐडै मणछा हआ सारै दी टोस्सा लागी दी।
ऐडअ मणछ दैआ आपणैं बाबा लै दुख अर
आपणीं ईजा लै शोग।
नर्दोश मणछा लै डांड पाणअ अर
भलै मणछा लै सज़ा दैणीं निं दुहै गल्ला ठीक आथी।
ज़ुंण खास्सी गल्ला निं करदअ, तेऊ हआ सबर,
अर ज़ुंण शांत रहा सह हआ समझ़कार।
ऐडै मणछा लै बी सका समझ़कार अर अक्ली आल़अ बोली,
पर ज़ै सह शांत रहे अर आपणीं ज़िभ च़ुप्पी डाहे।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.