Kulvi Outer Seraji Bible
होशे 13
खिरी इज़राईलो नसाफ
एक ज़मानअ त इहअ कि एप्रैम गोत्र ज़ेभै बोला थिअ, इज़राईले होर गोत्रा छ़ुटा ती डरै काम्मणीं, एप्रैम त इज़राईला मांझ़ै सोभी का खास। पर ज़ांऊं एप्रैमी लोगै बाल देअए पूज़ा करी पाप किअ, तेता करै हुअ तिन्नों बनाश। ऐबै आसा एप्रैम मुल्खे लोग होर बी खास्सै पाप करदै लागै दै। तिंयां बणाआं आप्पू लै आपणीं च़ंदी करै देअए मुहुर्ती। तेता बणाणां लै लाआ तिंयां मणछ आपणअ दमाग अर समझ़। तिंयां सोभ मुहुर्ती आसा सज़ाण कारीगीरै बणाईं दी। तिंयां बोला इहअ, “इना मुहुर्ती लै करा बल़ीदान, अर बाछ़ूए मुहुर्ती लै दैआ माख्खू!” तैही उडणैं ईंयां लोग दोत्ती धूँईं ज़िहै झ़ट च़ारै अर ईंयां शुक्कणैं दोत्ती पल़ी दी ओशा ज़िहै हेरा-हेरी। तिंयां हणैं किशा ज़िहै ज़ेता बागरी ताटी का दूर फर्ल़ाऊआ अर तिंयां उडणैं धुंघरा बाती धूँआं ज़िहै।
बिधाता बोला इहअ, “हुंह आसा थारअ परमेशर बिधाता ज़ुंणीं तम्हैं मिसर देशा का आणै काढी। तम्हैं निं होरी देअए च़ाकरी करदै लागी। मुखा सुआई निं तम्हां कोह बच़ाऊई सकदअ। मंऐं किई शुक्कै-रुखै रेगीस्तानै थारी हेर-सभाल़।1 पर ज़ांऊं तम्हैं रज़दी-पज़दी ज़ैगा पुजी रज्ज़ी खाणां लै भेटअ, तेखअ हुऐ तम्हैं शरेरै अर हुंह बिस्सरअ तम्हैं पठी। तैही पल़णअ मुंह तम्हां लै सिहा ज़िहै चुटी। मुंह रहणअ बाता तम्हां लै च़राघा ज़िहै तम्हां ढाकणें ताका बेशी। मुंह ब्रूज़णै भाल्लणी ज़िहै ज़ुंण आपणैं लुक्कै दै बच्च़ै लोल़ी हआ लागी दी। मुंह पाणै तम्हैं धेल़ी-च़िरी। तम्हैं खाणैं मुंह भुखै सिहा ज़िहै तिधी। मुंह पल़णअ तम्हां मारदै बणें ज़ीबा ज़िहै चुटी।
“इज़राईलीओ! थारअ करनअ मुंह बनाश। तम्हां निं कुंण बच़ाऊंणै आल़अ भेटणअ। तम्हैं तै आपणैं राज़ेए आसरै कि तेऊ हेरनै तम्हैं सोभी नगरी दी बच़ाऊई, पर सह निं किछ़ करी सकअ! तम्हां प्रैंदै राज़ करनै आल़ै पांच़ बी निं तम्हां बच़ाऊई सकै! तम्हैं पाई ती मुखा मांग कि होरी देशा ज़िहै लोल़ी तम्हां बी आप्पू प्रैंदै पांच़ अर राज़ै। पर इना मांझ़ै निं तम्हां कोह बच़ाऊई सकै।2 रोश्शै दैनै मंऐं तम्हां लै राज़ै, पर ऐबै आसा मुंह इहअ कोप फिरअ द कि मुंह करनै तम्हां का तिंयां राज़ै दूर!3
“मंऐं आसा एप्रैमे पाप-दोश लिखी अर सभाल़ी डाहै दै, तिन्नें पाप आसा मंऐं लिखी-जोखी हाल़्है डाहै दै। तिन्नां उझ़णै सूंणें दाह लागी दी बेटल़ी ज़िहै शूल़। तिंयां आसा कमुर्ख लान्हैं ज़िहै, अह आसा तिन्नों ज़ल्म हणैंओ बगत पर तिंयां निं माए ओदरा का बागै निखल़णअ ई च़ाहंदै! हुंह निं तिन्नां जम्परी डेऊणैं का छ़ड़ैऊंदअ, नां हुंह तिन्नां मरनै का बच़ाऊंदअ। ओ मौत, तूह आण आपणीं माहा मरी! जम्पर, तूह आण बनाश! हुंह निं ऐबै आपणीं परज़ा लै झींण करदअ।4 च़ाऐ इज़राईल होरी देशा जैंदरी फल़दी बुटी ज़िहअ सफल किल्है निं होए, पर मुंह बिधाता छ़ाडणीं रेगीस्ताना का पुर्बा बाखे तात्ती बागरी। तेता करै शुक्कणीं तिन्नें पाणींए गाडा अर कुहै पठ। तिन्नें किम्मती भढार लुटणैं पठी। राज़धानी सामरी नगरी बस्सै दै इज़राईली किअ मुंह बिधाता लै द्रोह करी पाप, तिन्नां लागणीं तेता पिछ़ू सज़ा भुगतणी। तिंयां मरनै जुधा दी तिन्नें लान्हैं मारनै धरनीं फणाटी करै, तिन्नें सुंदी बेटल़ीए डाहणैं पेट फाल़ी।”
Source notes (4)
- Cross-reference बधा. 8:11-17
- Cross-reference 1 शमू. 8:5,6
- Cross-reference 1 शमू. 10:17-24; 15:26
- Cross-reference 1 करि. 15:55
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.