Kulvi Outer Seraji Bible
होशे 12
“एप्रैमी लोग हआ होरी भाल़ै लागै दै कि तिंयां तिन्नें मज़त करे। अह आसा बागरी पिछ़ू ठुर्हनै ज़िहअ बृथा। तिंयां आसा पुर्बा बाखे तात्ती बागरी ढाकदै लागै दै! तेतो नतिज़अ निखल़ा इहअ कि तिंयां बोला होर बी खास्सअ झ़ुठअ अर तिंयां करा कबल्लअ उपद्रभ। तिंयां करा अश्शूर देशा संघै करार अर तिंयां मांगा जैतूनो तेल दैई मिसर देशा का मज़त।”
बिधाता लाऐ यहूदे लोग दालता दी खल़ै करी तिन्नों दोश खोज़ी। तेऊ लाई याकबे आद-लुआदा लै सज़ा दैई ज़ेही तिन्नैं बूरी ज़िन्दगी ज़िऊई। तेऊ दैणअ तिन्नां लै ज़िहै तिन्नैं पाप किऐ तिहअ ई फल बापस। पैईदा हणैं का आजी गअ याकब माए ओदरै आपणैं बडै भाई एसाबा संघै झ़घल़दअ लागी। ज़ांऊं याकब ज़ुआन हुअ, तेऊ किअ परमेशरा संघै झ़गल़अ।1 तेऊ किअ स्वर्ग दूता संघै झ़गल़अ अर ज़ितअ बी। तेऊ मांगी लेर-पकार पाई परमेशरा का बर्गत। बेतेल हुऐ याकबा परमेशरे दर्शण अर तिधी किई परमेशरै तेऊ संघै गल्ला।2 सह त परमेशर बिधाता ज़ुंण स्वर्गे सारी सैनो मालक आसा, ज़हा हाम्हैं बिधाता नाअं बोली करै ज़ाणा। ऐबै तम्हैं ज़ुंण याकबे आद-लुआद आसा, तम्हैं रहा परमेशरे आसरै, संघा फिरा तेऊ बाखा बापस। आप्पू मांझ़ै करा धर्म अर नसाफ। सबर डाही रहा परमेशरा न्हैल़ै लागी।
आजू बिधातो नसाफ
बिधाता बोला इहअ, “तम्हैं आसा इहै बपारी ज़िहै ज़ुंण तराकल़ी तोलणां लै हेर-फेर करा। तम्हैं झ़ूरा लोगा ठगणा लै। एप्रैमी लोगो, तम्हैं मारा एही डिंगा, ‘हाम्हैं आसा सेठ, हाम्हैं हुऐ धन-माया आल़ै। हाम्हां लै निं कोह इहअ दोश लाई सकदअ कि हाम्हैं हुऐ ठगी करी सेठ!’ पर हुंह आसा थारअ परमेशर बिधाता ज़ुंणीं तम्हैं मिसर देशा का आणै, तम्हां लै करनअ मुंह इहअ कि तम्हां पल़णअ भिई खिम्भा दी बस्सणअ ज़िहै तम्हैं तिह-थैरे पैहलै रेगीस्तानै रहा तै।3
“मंऐं किई गूरा संघा गल्ला, तिन्नां का रहैऊऐ मंऐं कई सुपनै। तिन्नां गूरा बाती दैनी मंऐं तम्हां लै चतैनगी। तज़ी बी करा गलाद मुल्खै बस्सै दै लोग बृथा मुहुर्तीए पूज़ा! तेते पूज़ा करनै आल़ैओ हणअ बनाश। गिलगाल बस्सै दै लोग करा देअआ लै बल्दो बल़ीदान! तिन्नें बेदी हणीं बाहै दै खेचै झाल़ै दै पात्थरे रूल़ा ज़ेही।”
म्हारअ दाद-बाब याकब ठुर्हअ त अराम देशा लै, तिधी रहअ सह गलाम कि तेऊ आप्पू लै बेटल़ी भेटे। सह रहअ लाबान नाओंए मणछे घअरै तेऊए भेडा-बाकरी च़राऊंदअ।4 बिधाता छ़ाडअ आपणअ गूर इज़राईली मिसर देशे गलामी का काढदअ अर आपणैं गूरा करै किई तेऊ तिन्नें फाज़त।5 पर एप्रैमी लोगै ठैऊई बिधाता लै खास्सी रोश्श। तिन्नें घोर पापा लै पाणै बिधाता तिंयां मारी। ज़ुंण तिन्नैं परमेशर बेइज़त किअ, तेते बदल़ै लणी परमेशरा तिन्नां लै सज़ा दैई।
Source notes (5)
- Cross-reference मूल. 25:26
- Cross-reference मूल. 28:10-22; 32:24-26
- Cross-reference लेब. 23:42,43
- Cross-reference मूल. 29:1-20
- Cross-reference लुआ. 12:50
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.