Kulvi Outer Seraji Bible
होशे 11
द्रोही परज़ा लै बी करा परमेशर झींण
बिधाता बोला इहअ,
“ज़धू इज़राईल लान्हअ थिअ,
हुंह झ़ूरअ तेऊ लै कि सह आसा मेरअ शोहरू अर
मंऐं शादअ मेरअ शोहरू कि मिसर देशा का निखल़े।1
पर ज़ेतरअ हुंह तेऊ लै बोला त, तेतरअ डेओआ त सह मुखा दूर!
मेरी परज़ा करा तै बाल देअआ लै बल़ीदान,
तिंयां करा तै मुहुर्ती सेटा धूप ज़ाल़ी तेते पूज़ा।
सह त हुंह ज़ुंणीं एप्रैम होछ़ी उझै हाथै ढाकी नढैऊअ!
तिंयां तै मंऐं आपणीं बाह दी ढाकै दै,
पर तिन्नैं निं समझ़अ कि तिन्नें हेर-सभाल़ करनै आल़अ त हुंह।
मंऐं नढैऊऐ तिंयां आपणीं झींण अर झ़ूरीए राश्शी करै,
हुंह त तिन्नां लै इहै मणछा ज़िहअ ज़ुंणीं तिन्नें कैल़ै का जूँ पोर्ही खोल्हअ
संघा दैनअ उटअ फिरी तिन्नां लै खाणां लै।
“इज़राईली हणैं भिई गलाम ज़िहै तिंयां मिसर देशे गलामी दी आसा तै। पर एभकी बारी हणअ तिन्नां प्रैंदै राज़ करनै आल़अ अश्शूर देश। तिन्नें नगरी दी हणअ जुध अर तिन्नें बडी-बडी प्रऊल़ी पाणीं ढोल़ी। एता करै हणीं मेरी परज़ा बरैबाद किल्हैकि तिन्नैं किई आपणीं मन्न-मरज़ी। मेरी परज़ा ती मुंह छ़ाडी कबाता ई डेऊणे हठ ढाकी दी। तिंयां बोला मुल्है परम प्रधान परमेशर, पर असली दी निं तिंयां मेरअ अदर करदै।
एप्रैम, हुंह किहअ करै डाहूं ताह शोटी?
इज़राईल, एतरअ हणैं बाद बी निं हुंह निं ताह छ़ाडी सकदअ!
हुंह निं ताह दुशमणा का सभाल़ी सकदअ!
हुंह निं तेरअ अदमा अर सबोईम नगरी ज़िहअ बनाश करी सकदअ।
मेरअ दिल निं इहअ करना लै बोल्दअ!
हुंह झ़ूरा ताल्है बेघै खास्सअ।2
एप्रैम! मुंह निं ताल्है आपणअ कोप दैणअ पल़णै,
मुंह निं मेरी इज़राईली परज़ो भिई बनाश करनअ।
किल्हैकि हुंह निं मणछ आथी हुंह आसा परमेशर।
हुंह आसा सह पबित्र ज़ुंण तम्हां जैंदरी रहा।
ऐबै निं मुंह तम्हां सेटा रोश्शा संघी एछणअ।
“खिरी लागणअ मेरी परज़ा मुंह पिछ़ू हांढदै। ज़ांऊं मुंह बिधाता तिन्नें दुशमणा लै सिहा ज़ेही क्रुंगा पाणीं, मेरी परज़ा एछणअ डरदी-काम्बदी पछ़मा बाखा का फिरी। तिंयां एछणैं मिसर देशा का च़ेल्लू अर अश्शूर देशा का पालल़ी ज़िहै डैअ बाही। तिंयां पजैल़णैं मुंह तिन्नें घअरै भिई बापस। अह गल्ल डाही मंऐं बिधाता बोली।”
इज़राईल अर यहूदा लै दोश
बिधाता बोला इहअ, “मेरी एप्रैमी परज़ा बोला हर बगत झ़ुठअ। इज़राईली दैआ मुल्है धोखअ। यहूदे लोग आसा अज़ी बी मुंह पबित्र परमेशरा लै द्रोह करदै लागै दै! तिंयां आसा मुहुर्ती पूज़णा लै शुचै-पाक्कै।
Source notes (2)
- Cross-reference लुआ. 4:22; मोत्त. 2:15
- Cross-reference बधा. 29:23
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.