Kulvi Outer Seraji Bible
होशे 14
खिरी बस्सणअ इज़राईल भिई
इज़राईलीओ, आपणैं परमेशर बिधाता बाखा फिरा बापस! थारै पाप करनै पिछ़ू हुऐ तम्हैं बरैबाद। बिधाता सेटा लै एछा बापस संघा करा तेऊ सेटा एही अरज़, “बिधाता, ज़ीबाण म्हारै सोभ पाप कर माफ, म्हारी अरज़ शुण, हाम्हां करनअ ताल्है शूकर सह हणअ हाम्हां बाखा ताल्है बल़ीदान। अश्शूरी निं हाम्हां बच़ाऊई सकदै। तिन्नां घोल़ै करै निं म्हारी फाज़त हंदी ज़ेते शुंआरी हाम्हैं जुधा लै डेओआ। ऐबै निं हाम्हां मुहुर्ती लै कधि बोल़णअ कि तिंयां आसा म्हारै दईब। बिधाता, तूह करा छ़ुटै-मुक्कै दै लान्हैं लै झींण।”
बिधाता दैणीं इज़राईला लै नऊंईं ज़िन्दगी
बिधाता बोला,
“मेरी परज़ा किअ मुल्है विश्वास घात, पर मुंह छ़ाडणीं तिन्नां लै माफी।
मुंह झ़ूरनअ तिन्नां लै दिला का खास्सै अर
मुंह निं तिन्नां लै ऐबै रोश्श करनै।
मुंह दैणीं मेरी इज़राईली परज़ा लै बर्गत
ज़ेही शुक्की-रुखी ज़ैगा दी बरसात पल़ा।
तिंयां खिलणैं सुरघे फूला ज़िहै,
तिंयां हणैं लाबानोन बणें केल़ुई ज़िहै
ज़ेते ज़लैल़ै धरनीं डुघै हआ राझ़ै दै।
तिंयां हणैं इहै बूटा ज़िहै ज़ेता का नऊंईं टिरा टिर्खणी,
तिन्नां दैणीं जैतूने बूटा ज़ेही शोभा।
तिन्नां का हणीं लाबानोन बणें केल़ुई ज़ेही बधिया बास्स लागी दी।
मेरी परज़ा लणी भिई मुंह सेटा शरण।
तिंयां हणैं नाज़ा ज़िहै खास्सै अर तिंयां खिलणैं दाखे बेला ज़िहै,
तिंयां हणैं मशूर ज़िहअ लाबानोन मुल्खो दाखो रस मशूर आसा।
मेरी एप्रैमी परज़ा हणीं सदा लै मुहुर्ती का दूर।
तिन्नें अरज़ शुणनी मुंह अर तिन्नें फाज़त बी करनी मुंह।
हुंह आसा तिन्नां लै बडी कैलीए हरै बूटा ज़िहअ।
तिन्नां लै बर्गत दैणैंओ मूल़ आसा हुंह।”
सार
ज़हा अक्ल होए, सह जाणअ इना गल्ला समझ़ी कि इधी किज़ै आसा लिखअ द। तेऊ हेरनी ईंयां गल्ला भुझ़ी बी। बिधाते बात आसा आज़री अर धर्मीं मणछ हांढा तैहा बाता। पर पापी बधल़िआ ठोहल़ लागी धरनीं किल्हैकि तिंयां हआ कबाता पेठै दै।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.