Kulvi Outer Seraji Bible
एस्तेर 9
यहूदी मारै आपणैं दुशमण
क्षयर्ष राज़ेए नाओंऐं ज़ुंण हुकम पैहलै ज़ारी हुअ थिअ, तेर्हा फागणै तै लाऐ दै तेते साबै यहूदी खतम करी। यहूदीए दुशमण बी थिऐ एही आशा रहै दै कि तिंयां हणैं सफल, पर ज़ांऊं सह धैल़ी पुजी तेथ पल़ी तिन्नां उंबल़ी मार। ज़हा-ज़हा देशै क्षयर्ष राज़ैओ राज़ थिअ, तिन्नां नगरी किअ यहूदी आप्पू मांझ़ै एक्कअ अर ज़ुंण बी तिन्नां मारदै आऐ, यहूदी पल़ै तिन्नां मारदै चुटी। इहअ करै निं तिन्नों मकाबलअ कोहै करी सकै अर तधा बाद लागै ओर्ही-पोर्ही होरी देशे लोग बी यहूदी का डरदै। सोभी मुल्खै क्षयर्ष राज़ेए कार-करिंदै, अफसर अर राज़पालै किई हथू यहूदीए मज़त, किल्हैकि तिंयां थिऐ मुर्दकाई का डरै दै। तेथ त सोभी का थोघ गअ द लागी कि राज़ै आसा मुर्दकाई सोभी का बडी पदबी दी बशैल़अ द अर सह थिअ होर बी खास्सअ बलबान हंदअ लागअ द। इहअ करै किअ यहूदी आपणैं दुशमणा संघै ज़िहअ तिंयां च़ाहा तै तिहअ। यहूदी रहै तलबारा पाई तिन्नां लै ताखुई संघा काटै-फणाटै तिंयां ज़िहै नां किहै।
राज़धानी शुआ नगरी बी पाऐ यहूदी कोई पांज़ शौ मणछ मारी। तिन्नां मरनै आल़ै मांझ़ै तै यहूदीए दुशमण हमदाते शोहरू हमाने दस शोहरू: परशानदाता, दलपोन, असपाता, परोता, अदालिया, अरीदाथा, परमाशता, अरीसाई, अरीदाई अर बैजाता। पर तिन्नैं निं तिन्नें ज़ैदात लुटी।
तैहा धैल़ी ज़ेतरै बी लोग राज़धानी शुआ नगरी मारै, तिंयां खोज़ै राज़ै का पठी गणी करै। तेखअ बोलअ क्षयर्ष राज़ै राणीं एस्तेरा लै, “सिधी राज़धानी शुआ नगरी पाऐ यहूदी हमाने शोहरू संघी पांज़ शौ मणछ मारी! तै होरी मुल्खै झ़ाणीं तिन्नैं किज़ै-किज़ै किअ होए! ऐबै होर किज़ै च़ाहा तूह? सह बी जाणअ ताह भेटी। तूह खोज़ ओर्ही ताह होर कै लोल़ी? तेता बी दैंऊं हुंह ताल्है।”
एस्तेरै दैनअ ज़बाब, “माहा राज़अ, ज़ै तेरी ज़ाज़त आसा, तै दै राज़धानी शुआ नगरी यहूदी काल्ला बी तिहअ ई करनै ज़िहअ तिन्नैं आझ़ किअ। तूह कर इहअ हुकम कि हमाने दस शोहरूए ल्हासा डाहा चेचा दी छ़ड़ाऊई।” क्षयर्ष राज़ै किअ राज़धानी शुआ नगरी तिहअ ई हुकम ज़ारी ज़िहअ एस्तेर राणीं बोलअ त। हमाने शोहरूए दस ल्हासा डाही नगरीए च़फै चेचा दी छ़ड़ाऊई। च़ौदा फागणै हुऐ यहूदी राज़धानी शुआ नगरी भिई कठा संघा पाऐ चअन शौ होर मणछ मारी पर तिन्नें ज़ैदात निं तिन्नैं तैहा धैल़ी बी लुटी।
होरी मुल्खे नगरी-नगरी बी हुऐ यहूदी तिहै ई कठा अर इहअ करै बच़ाऊई तिन्नैं आपणीं ज़ान। तिन्नैं पाऐ तेर्हा फागणे धैल़ी आपणैं दुशमणा मांझ़ै पझत्तर हज़ार मणछ मारी। पर तिन्नैं निं तिन्नें ज़ैदात लुटी आथी। दुजै धैल़ै च़ौदा फागणै निं तिन्नैं किधी काट-मार किई, तिन्नैं लाई तैहा धैल़ी खुशी दी धामा। पर राज़धानी शुआ नगरीए यहूदी रहै तेर्हा अर च़ौदा फागणै दुही धैल़ी दुशमणा मारदै लागी, तिन्नैं मनाऊंईं तेते खुशी पंद्रा फागणै अर तैहा धैल़ी लाई तिन्नैं धामा। तधा बाद हुअ गट्टै-गराऊंऐं रहणैं आल़ै यहूदी मांझ़ै च़ौदा फागणो थैर शुरू। तैहा धैल़ी मनाऊंआं तिंयां खुशी संघा बांडा एकी-दुजै लै शकन भोज़न।
पूरीम नाओं थैर
एता बाद दैनी मुर्दकाई तिन्नां सोभी देश अर मुल्खै बस्सै दै यहूदी लै च़िठी लिखी ज़ेथ क्षयर्ष फारसी राज़ैओ राज़ थिअ। च़िठी दी बोलअ तेऊ सोभी यहूदी लै इहअ कि हर साल मनाऊंऐं च़ौदा अर पंद्रा फागणै खुशीओ थैर ज़रूर। इना दूई धैल़ी आसा यहूदी आपणैं दुशमणा का ज़ितै दै, ऐहा गल्ला डाहै आद कि एऊ भिन्नैं आसा म्हारअ दुख-शोग खुशी दी बधल़ुअ द। ऐहा धैल़ै दैऐ भोज़ संघा बांडै एकी-दुजै लै शकन भोज़न अर रैनै-गरीबा लै बी दैऐ। ज़िहअ मुर्दकाई लिखी दैनअ, यहूदी किअ तिहअ ई अर इहअ करै पल़अ एऊ थैरा हर साल मनाऊंणेओ रबाज़।
आगागे आद-लुआदा का हमदातो शोहरू हमान थिअ यहूदीओ दुशमण, सह च़ाहा त यहूदी पठी खतम करनअ। यहूदीए बरैबादी लै काढी ती तेऊ परच़ी पाई धैल़ी। पर एस्तेर डेऊई राज़ै सेटा संघा बझ़ैल़अ हुकम ज़ारी करनै कि हमानै ज़ुंण यहूदी मारने च़ाल आसा, सह लोल़ी तेऊ लै उंबल़ी तेऊ ई लै पल़ी, हुअ बी तिहअ ई अर हमान अर तेऊए शोहरू डाहै चेचा दी राश्शी करै छ़ड़ाऊई। तैही पल़अ च़ौदा-पंद्रा फागणे थैरा नाअं पूरीम। अह बोल पल़अ इब्रानी बोलीए पूर बोला का मतलब परच़ी। मुर्दकाईए च़िठी अर यहूदी संघै ज़ेही-ज़ेही हुई-बिति, यहूदी बणाअं आजू आपणीं आद-लुआद अर आजू तिन्नां संघै ज़ुल़णै आल़ै होरी सोभी लै पाक्कअ सूल कि सोभै लऐ हर साल एऊ थैरा तिन्नां ई धैल़ी ज़रूर मनाऊंईं ज़िहअ मुर्दकाई च़िठी दी खोज़अ द आसा। तिन्नैं किई एही गल्ल पाक्की कि सोभी देश अर सोभी नगरी रहणैं आल़ै यहूदी लोल़ी पोस्ती दर पोस्ती लोल़ी आजू बी अह पूरीम थैर आद डाहअ अर ज़रूर मनाऊंअ।
अबिहेले शोहरी एस्तेर राणीं अर यहूदी मुर्दकाई लिखी ती अह दुजी च़िठी होर। एता करै च़ाहा ती राणीं तैहा गल्ला दी पाक्की मोहर लाणीं कि तिहअ ई लोल़ी हुअ, ज़ुंण पूरीम थैरे बारै मुर्दकाई पैहलै ती च़िठी दैनी दी। अह च़िठी लिखी ती सोभी यहूदी लै अर एते नकला दैनी सोभी एक शौ सताई मुल्खा लै ज़ेथ क्षयर्ष फारसी राज़ैओ राज़ थिअ। एतो मकसद थिअ इहअ कि सोभै यहूदी राज्ज़ी-राम्बल़ै रहे अर तिंयां पूरीम थैरा आप्पू अर आजू तिन्नें आद-लुआद तिन्नां ई धैल़ै मनाओए अर ज़िहअ राणीं एस्तेर अर यहूदी मुर्दकाई तिन्नां लै खोज़अ अर तिन्नैं आप्पै शोग अर खुशी मनाऊंणेओ सूल बणाईं डाहअ त। पूरीम थैरो सूल पाक्कअ करना लै किअ राणीं एस्तेरै हुकम ज़ारी अर तेते बारै डाहअ इतिहासे कताबा दी लिखी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.