Kulvi Outer Seraji Bible
एस्तेर 8
यहूदी किअ आपणैं दुशमणो मकाबलअ
क्षयर्ष राज़ै दैनी तैहा ई धैल़ी यहूदीए बैरी हमाने सारी ज़ैदात एस्तेर राणीं लै। तेखअ खोज़अ एस्तेरै राज़ै का इहअ कि मुर्दकाई आसा तेसो भाई अर तधा बाद करा त मुर्दकाई राज़ै सेटा डेऊई। राज़ै ज़ुंण सरकारी मोहरा आल़ी मुंदल़ी हमाना लै दैनी ती, सह दैनी राज़ै हमाने गुंठी का खोल्ही मुर्दकाई लै। राणीं एस्तेरै डाही हमाने घअर अर ज़ैदाते ज़िम्मैंबारी मुर्दकाई का सभाल़ी।
तेखअ डेऊई एस्तेर भिई राज़ै सेटा, सह पल़ी तेऊए खूरा सेटा उटी बाखा संघा लागी लेरा लांदी। तैहा किई राज़ै का अरज़ कि ज़ुंण आगागी हमानै यहूदी मारनैओ ज़ज़ाल़ त छ़ैअ द, तेता राज़अ रोक्के। राज़ै किअ आपणअ सुन्नेंओ राज़दंड तैहा बाखा लै संघा उझ़ुई राणीं एस्तेर खल़ी तेखअ लागी इहअ बोल्दी, “माहा राज़अ, ज़ीबाण, ज़ै तूह मुखा खुश आसा, ज़ै ताखा राम्बल़अ ज़ाण्हिंए, तै कर इहअ हुकम ज़ारी कि हमदाता आगागीए लुआद हमानै ज़हा च़िठी दी राज़े नाओंऐं सोभी मुल्खै यहूदी पठी खतम करने बारै हुकम आसा ज़ारी किअ द, सह लोल़ी रद्द हुअ। मेरै आपणैं लोगा लै एछणैं आल़ी अह आफ़त निं हुंह ज़िरी सकदी! अह बरैबादी हुंह किहअ करै सका भाल़ी कि मेरै आपणैं नातै-रिश्तैदार पाणै मारी?”
तेखअ बोलअ क्षयर्ष राज़ै राणीं एस्तेर अर मुर्दकाई यहूदी लै, “हमाना लै हेरी मंऐं एऊ कदुष्ट कामां लै फांसी दैई ज़ुंण तेऊ यहूदी लै करनअ सोठअ त अर तेऊए सारी ज़ैदात हेरी मंऐं एस्तेरा लै दैई। पर ज़ुंण हुकम राज़ै ज़ारी किअ अर ज़ेथ राज़ेए मोहर लागी जाआ, तेता निं बदल़ी सकदै। पर तम्हैं सका यहूदी लै मेरै नाओंऐं एक होर हुकम ज़ारी करी च़िठी लिखी अर तेता सका मेरी मोहर लाई सोभी ज़ैगा पजैल़ी।”
ईंयां गल्ला हुई त्रेई ज़ेठै। मुर्दकाई शादै राज़ेए काईथ संघा बझ़ैल़ी भारता पोर्ही कूश देशा तैणीं सोभी एक शौ सताई मुल्खै बस्सै दै यहूदी, राज़ेए कार-करिंदै अर राज़पाला लै ज़िहअ मुर्दकाई हुकम किअ, तेऊ साबै च़िठी लिखणैं। तेते नकल दैनी सोभी मुल्खे बोली-भाषा दी लिखी अर यहूदी लै दैनी तिन्नें आपणीं बोली दी लिखी। मुर्दकाई लिखी सह च़िठी क्षयर्ष राज़ेए नाओंऐं संघा लाई तेथ राज़ेए सरकारी मोहर। तेता पजैल़ै छ़ाडै दूत बागरी ज़िहै छ़ेक्कै ठुर्हनै आल़ै घोल़ै प्रैंदै हर मुल्खा लै।
इना च़िठी दी थिअ राज़ैओ इहअ हुकम ज़ारी किअ द कि यहूदी लै आसा हर नगरी कठा हई आपणीं ज़ान बच़ाऊंणे ज़ाज़त। ज़ै कुंण अस्त्र-शस्त्र पाई यहूदी मणछ, बेटल़ी-माठै मारदै एछे, तेता लै सका यहूदी तिन्नां पोर्ही बी मारी अर तिन्नें ज़ैदात बी सका यहूदी लुटी। अह हुकम आसा तिन्नां सोभी मुल्खा लै ज़िधी क्षयर्ष फारसी राज़ैओ राज़ आसा अर इहअ करने ज़ाज़त आसा ऐहा साला तेर्हा फागणे ई धैल़ी लै। ज़ुंण अह हुकम ज़ारी किअ, एते नकला बी पजैल़ी सोभी देशै अर मुल्खै खुल्ही ई ताकि सोभै यहूदी तैहा धैल़ी लै आपणैं दुशमणे मकाबलै करदै अर बदल़ै लणा लै तैर्हुई रहे। राज़ेए एऊ हुकमा पजैल़ै डेऊऐ डाक पजैल़णैं आल़ै सरकारी दूत बागरी ज़िहै छ़ेक्कै ठुर्हनै आल़ै घोल़ै प्रैंदै बेशी हेरा-हेरी ज़ुंण हुकम राज़धानी शुआ नगरी का ज़ारी हुअ त।
तेखअ डेऊअ मुर्दकाई राज़ेए मैहला का, तेऊ त राज़ैओ सुआब बान्हअ द, मुंडै त तेऊए सुन्नेंओ मुगट, घेरी त निलै अर बैंज़णीं रांगो बाछो च़ोल़अ बान्हअ द। शुआ नगरीए लोग लागै खुशी दी नाच़दै अर ज़ोरै-ज़ोरै ज़ै-ज़ैकार करदै। यहूदी बी हुई बेघै खास्सी खुशी अर तेखअ मुक्कअ तिन्नों हैल़अ फिकर अर तेखअ च़ेतअ तिन्नैं कि तिन्नें हुई ज़ीत। ज़हा-ज़हा नगरी अर मुल्खै राज़ै ज़ारी किअ द सह हुकम पहल़अ, तिधी-तिधी हुई यहूदी नाच़णै जोगी खुशी, तिन्नैं लाई तैहा खुशी दी धामा। तिन्नां मुल्खे होर लोग बी बणै यहूदी किल्हैकि तिंयां थिऐ ऐबै यहूदी का डरै दै।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.