ज्ञैन

ज्ञैन

सुलैमान राज़ै खोज़ै दै ज्ञैन

भेत

लिखणैं आल़अ: राज़अ सुलैमान

सन: 940 का 931 ईसा आजी

एही निं ऐहा कताबो थोघ आथी कि अह कुंणी आसा लिखी दी, पर ऐहा कताबो 1:1 करा सुलैमान राज़ै बाखा शारअ किल्हैकि सह बोला एथ इहअ कि सह आसा राज़ै दाबेदो शोहरू। अह कताब करा ऐहा गल्‍ले लोल़ तोप कि मणछे ज़िन्दगीओ किज़ै मतलब आसा? मणछा केथ दी सका राज्ज़ी-मौज़ी अर नंद-खुशी दी रही? मणछे ज़िन्दगी दी किज़ै गल्‍ल आसा एही ज़ेता करै तेऊओ भलअ हआ? पर इना गल्‍लो नचोल़ निखल़अ इहअ कि सोभै गल्‍ला आसा एही बृथा ज़िहअ बागरी पिछ़ू पल़णअ बृथा हआ।

अह कताब दैआ हाम्हां मणछा लै एही समझ़ाई, ज़ै मणछ बिधाते डरा हेठै रहंदी ज़िन्दगी नांईं ज़िऊए, तै आसा सह बृथा। हाम्हां का च़ाऐ केतरी बी धन-माया, ज़ैदात होए या हाम्हैं किहै बी राज्ज़ी-मौज़ी होए, हाम्हां का ज़ेतरी बी खास्सी अक्ल-बुध होए, पर ज़िन्दगी मुक्‍कदी ज़ाण्हिंआं इहअ कि सारी ज़िन्दगी डेऊई बृथा। ज़िन्दगी ज़िऊंणेंओ असली मतलब आसा इहअ कि हाम्हैं लोल़ी तेही ज़िन्दगी ज़िऊई ज़िहअ बिधाता च़ाहा।

अह कताब खोज़ा हाम्हां का इहअ कि कई गल्‍ला हआ ज़िन्दगी दी होरी गल्‍ला का खास। ज़िहअ कि ऐडै का आसा अक्ल भली। बिधाता च़ाहा इहअ कि मणछ काम-काज़ करदै, खांदै पिंदै, बैह करी अर साथी-संघी संघै राज्ज़ी-मौज़ी रहे। सोभी लै आसा अह गल्‍ल ज़रूरी:

ज़ुंण बी मंऐं तम्हां लै खोज़अ, तेतो नचोल़ आसा एचल़ी कि तम्हैं रहणअ बिधाते डरा हेठै अर तेऊओ शुणनअ ज़िहअ बोलअ तिहअ हुकम, किल्हैकि हाम्हैं आसा तेऊ एते ई तैणीं बणाऐं दै अर इहअ ई लागा हाम्हां करनअ। ज़ुंण बी हाम्हैं किअ तेतो करनअ खिरी बिधाता नसाफ, च़ाऐ भलअ होए या बूरअ, च़ाऐ सह हाम्हैं किज़ै च़ुप्प-च़ुप्पै होए किअ द।

(12:13,14)

कताबे बांड

ज़िन्दगी ज़िऊंणेंओ मतलब लोल़णअ 1:1—2:26

सोभी गल्‍लो हआ एक बगत 3:1-8

अक्ल करनी, किल्हैकि सदा निं मौज़ हंदी 3:9—6:12

इहअ निं कोही का थोघ हंदअ कि आजू किज़ै हणअ 9:1—11:6

ज़िहअ बिधाता च़ाहा तेही ज़िन्दगी ज़िऊंणीं 11:7—12:14

नचोल़ 12:9-14