Kulvi Outer Seraji Bible
ज्ञैन 1
ज़िन्दगी आसा बृथा
दाबेद राज़ैओ शोहरू एरुशलेम नगरी का राज़ करदअ, सह थिअ बेघै अक्ली आल़अ, तेऊ आसा इहअ बोलअ द:
“सोभ गल्ला आसा बृथा!
ज़िन्दगी ई आसा बृथा ई बृथा!
ज़ाथी आसा सोभै गल्ला बृथा।
सारी ज़िन्दगी संसारै एतरी मैन्थ करी,
मणछा किज़ै पुआज़अ भेटा?
एक पोस्ती मुक्का अर
दुजी पोस्ती एछा, पर
संसार रहा सदा ज़िहअ कै तिहअ ई!
धैल़अ रहा निखल़दअ अर डुबदअ लागी,
तेऊ हआ तेथ बाखा फिरनेओ छ़ेक्कअ लागअ द
ज़िधा का तेऊ भिई निखल़णअ अर कबल्लअ हआ तेऊओ तिहअ ई काम।
बागरी फिरा दखणा बाखा लै,
तेखअ फिरा उतरा बाखा लै,
अह रहा एही ई भिई-भिई
उंधै-उझै फिरदी लागी!
सारी गाडा नाल़ी पोछिआ सारी समुंदरै,
पर सह निं कधि भर्हदअ
सह पाणीं पुजा हटी फिरी तिधी
ज़िधा का गाडा नाल़ी लै सोबल़ निखल़ा।
सोभी गल्ला करै फिरा रुंज़ू,
ईंयां गल्ला केही लाई खोज़ी!
नां भाल़ी-भाल़ी आछी रज़दी,
अर नां गल्ला शूणीं-शूणीं कान भर्हदै!
ज़ुंण हई आसा गअ द,
सह हणअ आजू भिई।
ज़ुंण काम करी आसा हेरअ द, सह ई करनअ भिई!
सारै संसारै निं नऊंअ किछ़ बी आथी।”
कई मणछ सका इहअ बोली,
“हे आरा इधी हुई बै नऊंईं गल्ल!”
पर नां, सह गल्ल बी आसा पराणैं ज़मानैं तधू हई मुक्की दी
ज़धू हाम्हैं हुऐ बी नांईं तै आथी।
पराणैं ज़मानैं हुई-बिति दी गल्ला निं कोहै आद डाहंदअ,
ज़ुंण गल्ला आझ़काला आसा लागी दी हंदी, तिंयां बी निं लाई कोही आद डाही!
खास्सी अक्ल बी आसा बृथा
ईंयां गल्ला बोली मंऐं तधू, ज़धू हुंह एरुशलेम रहा त अर हुंह थिअ तधू इज़राईलीओ राज़अ। सारी अक्ल लाई किई मंऐं सोभी गल्ला समझ़णें कोशिश कि पृथूई दी किज़ै-किज़ै हआ। तै लागअ मुखा थोघ कि परमेशरै आसा मणछा लै बडअ दुखी करनै आल़अ काम दैनअ द कि तिंयां करे। हुंह लागअ तिन्नां सोभी कामां भाल़अ ज़ुंण संसारै हआ, तै भाल़अ मंऐं कि ईंयां सोभै काम आसा बृथा, ज़िहअ बागरी पिछ़ू पल़णअ बृथा हआ।
ज़ुंण कुंगल़अ आसा,
तेऊ निं तम्हैं आज़रै करी सकदै,
ज़ै किज़ै च़ीज़ तिधी नांईं आथी,
तेता निं गणी सकदै।
तेखअ लागअ हुंह आप्पू संघै एही गल्ला करदअ, “हुंह हुअ बडअ मशूर मणछ, ज़ेतरै राज़ै बी मुखा आजी एरुशलेम राज़ किअ, हुंह हुअ तिन्नां सोभी का खास्सअ अक्ली आल़अ, मुखा आसा थोघ कि अक्ल अर ज्ञैन असली दी किज़ै आसा।” तेखअ लागअ हुंह ऐहा गल्ला लोल़अ कि ज्ञैन अर ऐडी गल्ला, अक्ल अर कबुधी दी किज़ै फरक आसा। ज़िहअ बागरी पिछ़ू पल़णअ बृथा हआ, तेही आसा अह गल्ल बी बृथा!
किल्हैकि खास्सअ ज्ञैन बी दैआ दुख,
अर खास्सी अक्ल बी बढेरा फिकर ई।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.