Kulvi Outer Seraji Bible
ज्ञैन 4
तेखअ भाल़अ मंऐं इहअ कि एऊ संसारै आसा सारै दी लोग हंती आणै दै, लोगा आसा लैल़ा-पकारा लागी दी पर तिन्नें आशू टुशणैं आल़अ निं कोहै आथी! ज़ुंण तिन्नां हंतणैं आल़ै आसा, तिंयां आसा बलबान। मंऐं काढअ एतो इहअ नचोल़ कि ज़िऊंदै मणछा का खास्सै खुश आसा तिंयां मणछ ज़ुंण मरी आसा गऐ दै! भलै भाग आसा तिन्नें ज़ुंणी अज़ी ज़ल्म ई निं लअ, किल्हैकि तिंयां बच़ै एऊ संसारै इना घोर आफ़ता भाल़णैं का।
तेखअ भाल़अ मंऐं इहअ कि लोग करा साथी-संघीए मांणै आप्पू सफल हणां लै खास्सी मैन्थ! अह गल्ल बी ज़ाण्हुंई मुखा बृथा ई, ज़िहअ बागरी पिछ़ू पल़णअ बृथा हआ।
ऐडै डाहा आपणीं बाहा हिक्का प्रैंदै दोछ़ी
ज़ुंण तिन्नां मौता बाखा निंयां।
तैही बोला हुंह शांती दी हआ मुठी भितरी ढब्बै बी
दुही हाथै कामां दी बल़ैघुई रहणैं का बधिया,
ज़ेथ बागरी ढाकणैं ज़ेही मैन्थ लागा करनी।
तेखअ शुझुई मुखा एऊ संसारै एक होर गल्ल ज़ुंण बृथा आसा: कई हआ संसारै पठी कल्ही, तिन्नें नां लुआद हंदी, नां भाई-बैहणी हंदी! तज़ी बी रहा तिंयां खास्सी मैन्थ करदै लागी, तिन्नें आछी निं धन-माया करै केही रज़दी! तिंयां निं इहअ बी सोठदै, “म्हारी अह एतरी हम्या किज़ू लै आसा? हाम्हैं कहा लै आसा धन-माया कठा करदै लागै दै?” अह गल्ल बी आसा बृथा अर थोघै बाझ़ी दुखी ज़िन्दगी ज़िऊंणीं!
कल्ही रहणैं का हआ दूई ज़ण्हैं भलै किल्हैकि तिंयां सका सफल हणां लै एकी दुजे मज़त करी। ज़ै तिन्नां मांझ़ै एक ज़ण्हअ धरनीं पल़े, दुजअ सका तेऊ खल़अ झ़ैऊई। पर ज़ै कुंण कल्ही ज़ण्हअ धरनीं पल़े, तेऊ लै हणीं आफ़त अर तेऊए मज़त कुंणी लाई करी? ठांढै-शेल़ै सका दूई ज़ण्हैं कठा सुत्ती नैत्तै-तात्तै रही, पर कल्ही ज़ण्हअ किहअ करै च़ाल्लअ नैत्तै रही? एकी ज़ण्हैं सका कुंण च़िक्की-मारी बी, पर दूई ज़ण्हैं सका तेऊओ मकाबलअ करी। चिई लुल़ी करै पल़ैई दी राश्शी निं तेही झ़ट च़ारै चुटदी।
हई सका कि कुंण खास्सअ गरीब अर अज़ी खारकअ ई होए, पर ज़ै तेऊ अक्ल होए, सह आसा तेऊ ऐडै प्रोढै राज़ै का खास्सअ राम्बल़अ ज़ुंण होरीए सलाह निं मंदअ! सह खारकअ राज़ै-बज़ीरे खिंबा का नांईं बी होए अर कैदी या गरीबी मांझ़ा का बी होए आअ द, सह सका तज़ी बी राज़अ बणी। हुंह लागअ संसारे सोभी लोगे बारै सोठदअ, मंऐं भाल़अ इहअ कि तिन्नां ई मांझ़ै बेशणअ एक खारकअ मणछ आजू राज़े ज़ैगा। तेऊए परज़ा आसा एतरी खास्सी कि तिन्नां निं गणी बी सकदै। पर तेऊ डेऊणैं का बाद निं आजू कोहै तेऊ किऐ दै कोही कामां लै शाबाश करदअ! अह गल्ल बी ज़ाण्हुंई मुखा बृथा ई, ज़िहअ बागरी पिछ़ू पल़णअ बृथा हआ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.