Kulvi Outer Seraji Bible
ज्ञैन 8
अक्ली आल़ै मणछा ई हआ ऐहा गल्लो थोघ कि फलाणीं गल्लो किज़ै मतलब आसा। अक्ल डाहा तिन्नों मुंह प्रैश्शअ अर नां तिंयां भृहुंई गांठ डाहंदै पाई।
राज़ैओ हुकम लणअ मनी
ज़िहअ राज़ै बोलअ, सह करनअ तिहअ ई, नां तांऊंल़ै हई बिधाता लै झ़ुठै सोह खाणैं। धखी का निं राज़ैओ बरोध करनअ, नां तेऊ संघै हठ करनी, किल्हैकि ज़ुंण राज़ै सोठी हेरअ, सह करा तिहअ ई। किल्हैकि राज़ैओ बैण हआ बधान, तेऊ लै निं कोहै इहअ बोली सकदअ कि तंऐं इहअ किल्है किअ। राज़ैओ हुकम मनणै आल़ै बच़ा सज़ा भुगतणै का। ज़हा अक्ल हुई सह शिखल़ा ऐहा गल्ला कि किज़ै लागा करनअ अर केभै लागा करनअ। किल्हैकि सोभी गल्ला करनैओ हआ एक साब अर बगत, मणछा लागा कई दाह-दुख ज़िरी काढणैं। इहअ थोघ निं कोही का हंदअ कि आजू किज़ै आसा हणैं आल़अ अर नां कुंण ऐहा गल्ला खोज़ी सकदअ। शाह निखल़णैं का निं कोहै ढाकी सकदअ अर नां कुंण मरने धैल़ी रोक्की सकदअ। सह आसा इहअ जुध ज़ेता का कोहै मणछ निं बच़ी सकदअ। नां हाम्हैं तेता ठगी सकदै अर नां ठुर्ही सकदै।
संसारै हणैं आल़ी इना सोभी गल्ला लै किअ मंऐं राम्बल़ै करै बच़ार कि कई मणछ भेटा राज़ करना लै संघा हंता तिंयां होरी सोभी लोगा ज़िहै नां किहै!
ज़ै कदुष्टा लै सज़ा निं भेटी सह पाआ होरी बी कबाता
तेखअ भाल़अ मंऐं इहअ बी कदुष्ट मणछो हआ क्रिया-कर्म बी बडी इज़ती संघै! तिंयां ई रहा तै पबित्र ज़ैगा कबल्लै एछदै लागी अर तैहा ई नगरी हआ तिन्नां बडअ खूब अदर ज़ेथ तिंयां ज़ुल्म करा! अह गल्ल बी ज़ाण्हुंई मुखा बृथा।
कई मणछ किल्है रहा ज़ुल्मा प्रैंदै ज़ुल्म करदै लागी? किल्हैकि ज़ुल्म करनै आल़ै निं छ़ेक्कै सज़ा भेटदी। तिंयां पापी करा शौआ बारी ज़ुल्म अर तज़ी बी ज़िऊआ तिंयां खास्सी अमरा! तिंयां बोला इहअ पै,
“ज़ुंण बिधातो हुकम मने
अर भलअ करे
सह हणअ सोभी गल्ला लै सफल,
पर ज़ुंण पाप करे अर
बिधाता नकदरै समझ़े
सह नां सफल हणअ अर नां खास्सअ ज़िऊंणअ।”
एक नथोघी गल्ल भाल़ी मंऐं होर बी कि भलै मणछा संघै करा लोग इहअ बभार ज़ुंण कदुष्ट मणछा संघै लोल़ी त किअ, अर ज़ुल्म करनै आल़ै कदुष्ट मणछो हआ इहअ अदर कि तिंयां ई आसा होए असली धर्मीं! तै बोलअ मंऐं कि अह गल्ल बी आसा बृथा।
तै बोला हुंह इहअ कि राज्ज़ी-मौज़ी रहणअ, किल्हैकि एऊ संसारै निं मणछा लै खाणैं-पिणैं अर मौज़ करनै का सुआई किछ़ै राम्बल़अ आथी। एऊ साबै सका तै हाम्हां तैहा मैन्था संघै खुशी भेटी ज़ुंण बिधाता हाम्हां लै एऊ संसारै आसा दैनी दी।
हुंह लागअ अक्लीए लोल़-तोप करदअ अर इहअ हेरअ-भाल़अ कि एऊ संसारै मणछा लै किहअ बोझ़ आसा। मंऐं भाल़अ इहअ कि लोग हआ नथोघै कामां लै राची-धैल़ी लागै दै। मुखा ज़ाण्हुंअ इहअ कि सोभी गल्लो थोघ निं कोही का हंदअ कि बिधाता एऊ संसारै किज़ै आसा लाअ द करी। ज़ुंण सोभी का खास्सै अक्ली आल़ै मणछ बी आसा, तिंयां बी बोला कई गल्ला असली दी निं तिन्नां का बी किछ़ै थोघ आथी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.