Kulvi Outer Seraji Bible
2 इतिहास 9
शेबा देशे राणीं पुजी राज़ै सुलैमाना सेटा मिलदी
(1 राज़ै 10:1-13)
शेबा नगरीए राणीं शूणीं बिधाते बारै राज़ै सुलैमाने मशूरी, सह आई एरुशलेम नगरी लै सुलैमाना का कठण सुआला पुछ़दी कि तेऊ परखे। तैहा आणअ आप्पू संघै आपणैं कार-करिंदैओ बडअ दल एरुशलेम नगरी लै। सुलैमाना लै आणै तैहा किम्मती मणीं, सुन्नैं अर कई रंगे खुशबूदार मसालै ऊँट लादी भैंट। सुलैमाना सेटा पुजी लागी सह तिन्नां सुआला पुछ़दी ज़ुंण तैहा सोठी तै डाहै दै। राज़ै सुलैमानै दैनअ तेसे सोभी सुआलो ज़बाब, एही निं किज़ै गल्ल ई रही ज़ुंण सुलैमान तैहा का खोज़ी निं सकअ। शेबा नगरीए राणीं हुई राज़ै सुलैमाने अक्ल भाल़ी रहैन। ज़ांऊं तैहा सुलैमानो मैहल, तेऊए पलगा दी खाणअ-पिणअ अर तेऊए कार-करिंदै किहै बेठा, तेऊए दास-दासी किहै झिकल़ै बान्हीं हआ खल़ै, तेऊए मैहलै रोटी-पाणीं खैऊंणैं-पणैऊंणै आल़ैओ किहअ सूल आसा अर राज़अ सुलैमान बिधाते भबना लै डेऊई किहअ बल़ीदान करा करी, सह हुई इना सोभी गल्ला भाल़ी हक्की-बक्की।
तैहा बोलअ राज़ै सुलैमाना लै, “ज़िहअ मंऐं आपणैं देशै तेरै अर तेरी अक्लीए बारै शूणअ त, तूह आसा असली दी तिहअ ई। पर ज़ांऊं तैणीं मंऐं इधी एछी आपणीं आछी निं भाल़अ, तेभै तैणीं निं मुंह विश्वास हुअ। मुखा निं एते आधी गल्ले बारै बी थोघ आथी त। ज़ेतरअ मुखा खोज़अ त, तूह आसा तेता का कई गुणा खास्सअ अक्ली आल़अ। तेरी च़ाकरी करनै आल़ै कार-करिंदै भाल़ किहै भागा आल़ै आसा तेरै दास-दासी ज़ुंण कबल्लै ताह सेटा रहा अर तेरी अक्लीए गल्ला शूणां! तेरै परमेशर बिधाते लोल़ी ज़ै-ज़ैकार हुई, सह आसा ताल्है खुश अर तेऊ बणाअं तूह इज़राईल देशो राज़अ। किल्हैकि इज़राईला लै तेऊए झ़ूरी आसा अटल़। तूह बणाअं तेऊ तिन्नां प्रैंदै एते तैणीं राज़अ कि धर्म अर नसाफ बणी रहे।”
शेबा नगरीए राणीं दैनअ राज़ै सुलैमाना लै पज़ाह कुंटल़ सुन्नअ, खास्सी किम्मती मणीं, खास्सै खुशबूदार किम्मती मसालै कि तेता का आजी नां तेता बाद कुंणी तेही किम्मती च़िज़ा अर तिहै बधिया मसालै राज़ै सुलैमाना लै दैनै।
राज़ै हिरामे ज़हाज़ बी ज़ुंण ओपीर नगरी का सुन्नअ आणा तै, तिन्नैं बी आणअ खास्सअ सुन्नअ, च़ंदने काठ अर खास्सी किम्मती मणीं। च़ंदने काठा करै बणाऐं राज़ै सुलैमानै बिधाते भबन अर राज़ दरबारा लै शिहल़ी अर गिहा बोल़णैं आल़ै लै बींन, अर तारा आल़ै साज़-बाज़। इहै च़ंदने काठ बी निं आझ़ तैणीं इज़राईले राज़ै लै कोही दैनै तै अर नां कुंणी तधा बाद दैनै।
शेबा नगरीए राणीं दैनी होर बी ज़िहअ राज़ै सुलैमानै च़ाहअ तेही भैंट अर राज़ै सुलैमानै बी दैनअ तैहा लै तिहअ ई ज़िहअ सह च़ाहा ती। तेखअ डेऊई सह अर तेसे कार-करिंदैओ सारअ दल आपणैं देशा लै फिरी।
राज़ै सुलैमाने ज़ैदात
(1 राज़ै 10:14-25)
हर साल एछा त राज़ै सुलैमाना सेटा लै दूई शौ पज़ाह कुंटल़ सुन्नअ, बपारी का कारअ, अरब देशे राज़ै का कारअ अर आपणैं इज़राईल देशे राज़पाला का कारअ एछा त इना ढब्बै का लाऊआ। राज़ै सुलैमानै त सुन्नअ गाल़ी करै बडी-बडी ढाल़ा बणाईं दी, एकी-एकी ढाल़ा दी थिअ कोई सात-सात किलू सुन्नअ लाअ द। तेही ई बणाईं राज़ै सुलैमानै चअन शौ होर ढाल़ा अर तेथ त एकी-एकी ढाल़ा दी कोई दूई-दूई किलू सुन्नअ लाअ द। तिंयां ढाल़ा ती तेऊ आपणैं मैहलै अर लाबानोन बणां नाओंए मैहलै डाही दी।
आप्पू लै ती तेऊ हाथी दांदे राज़गाद्दी बणाईं दी अर सह थिई च़ोखै सुन्नैं करै महल़ी दी। राज़गाद्दी लै थिई तोल़ा बाखा उझै छ़ह पैल़ी अर हर पैल़ी, तेथ प्रैंदै ती खूरा टकैल़णा लै सुन्नैं करै महल़ी दी च़ौकी। राज़गाद्दीए आसना दी थिऐ दोहरी बाखा बाहा टकैल़णा लै ढासणैं लाऐ दै अर तेथ थिऐ दोहरी बाखा सिहा ज़िहै मुंह। पैल़ी दी थिऐ दोहरी बाखा बाढै सिहा ज़िहै मुंह काढै दै। तिंयां सिहा ज़िहै मुंह तै पठी बारा। एही राज़गाद्दी निं सारै संसारै किधी आथी ती।
राज़ै सुलैमाने झुटणें भांडै बी थिऐ च़ोखै सुन्नैं करै बणाऐं दै। लाबानोन बणां नाओंए मैहलै डाहै दै सोभै भांडै बी थिऐ सोभै च़ोखै सुन्नें। तेथ निं च़ंदीओ एक बी भांडअ आथी त। राज़ै सुलैमाने ज़मानैं निं च़ंदीओ किज़ै मोल ई समझ़दै तै। राज़ै सुलैमानै थिऐ तरशीश डेऊणा लै समुंदरे बपारा करने खास्सै ज़हाज़ डाहै दै। तिन्नां करा त सह राज़ै हिरामा संघै हर चिऊथी साला सुन्नैं, च़ंदी, हाथी दांद, गूणी-बांदर अर मोरा आणदै छ़ाडी।
राज़अ सुलैमान त संसारे सोभी राज़ै का खास्सअ सेठ अर अक्ली आल़अ। सारै देशा का च़ाहा तै लोग राज़ै सुलैमाना का सलाह लणी अर अक्ल शुणनी ज़ुंण तेऊ लै बिधाता थिई दैनी दी। ज़ुंण बी राज़ै सुलैमाना सेटा एछा त, सह आणा त तेऊ सेटा भैंट ज़रूर। हर साल एछा तै तेऊ सेटा दूरा-दूरा का लोग संघा आणा तै सुन्नअ, च़ंदी, किम्मती झिकल़ै, अस्त्र-शस्त्र, खुशबूदार मसालै, घोल़ै अर खच़रा लादी।
राज़ै सुलैमाना का थिऐ घोल़ै अर रथा डाहणां लै च़ार हज़ार आडै अर तेऊ का थिऐ बारा हज़ार जुधे घोल़ै। तिन्नां मांझ़ै तै तेऊ थोल़ै एरुशलेम डाहै दै अर बाकी तै होरी-होरी नगरी डाहै दै। सुलैमान त फरात दरैऊए देशा ओर्ही उतरा बाखा पलिश्ती देशे अर दखणा बाखा मिसर देशे सिऊंआं दी सोभी देशे राज़ै प्रैंदै माहा राज़अ। सुलैमाने राज़ा दी हुअ त एरुशलेम नगरी च़ंदीओ मोल केल़ुईए काठ, पात्थर अर यहूदा मुल्खै निऊल़ै लागै दै आम डाल़-बूटे काठा बराबर। राज़अ सुलैमान आणा त आप्पू लै घोल़ै मिसर अर होरी-होरी देशा का।
राज़ै सुलैमाने मौत
(1 राज़ै 11:41-43)
राज़ै सुलैमानो बाकी इतिहास आसा शुरू का खिरी तैणीं नातान गूर, शिलोहे आहिजा गूर अर ईदू गूरै लिखी डाहअ द। ईदू गूर आसा सह ज़ुंणी नबाते शोहरू जरोबामो इतिहास बी आसा लिखअ द। राज़ै सुलैमानै किअ एरुशलेम नगरी का च़ाल़्ही साला तैणीं सारै इज़राईल देशै राज़। खिरी मूंअ राज़अ सुलैमान संघा डाहअ दाबेदपूर नगरी दाबी अर आजू बेठअ तेऊओ शोहरू रहबाम तेऊए ज़ैगा राज़अ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.