Kulvi Outer Seraji Bible
2 इतिहास 8
राज़ै सुलैमाने काम
(1 राज़ै 9:10-28)
राज़ै सुलैमाना लागी बिधाता लै भबन अर आप्पू लै मैहल बणाणां लै कोई बिह साला। तेऊ च़िणीं तिंयां नगरी बी भिई ज़ुंण तेऊ लै राज़ै हिरामै दैनी ती, संघा बसाऊऐ तेथ इज़राईली। सुलैमानै किअ हमात-सोबा मुल्खै कबज़अ। सुलैमानै बझ़ैल़ी तदमोर नगरी भिई च़िणनै अर हमात मुल्खे नगरी बी बझ़ैल़ी भिई च़िणनै अर तिधी डाहअ तेथ डाहै तेऊ आपणैं भढार बणाईं। उझलै अर उंधलै बेथ-हारोन नगरी बी किई तेऊ फेर-फिरदै गहल़ च़िणीं अर प्रऊल़ी लाई पाक्की। यहूदा रेगीस्तानै बालात अर तामार नगरी, ज़ेतरी नगरी दी सुलैमाने ज़िणसीए भढार थिऐ अर रथ-घोल़ै थिऐ, तिंयां बी च़िणीं तेऊ भिई। एरुशलेम, लाबानोन अर ज़ेतरी बी नगरी दी तेऊओ राज़ त, तिंयां नगरी किई सुलैमानै ज़िहअ सह च़ाहा त तेही पाक्की। सुलैमान राज़े बेठू तै कनानी लोगे आजू आद-लुआद ज़ुंण इज़राईली कनान देशे ज़ैगा गिम्मदी बारी ज़िऊंदै छ़ाडै तै। तिंयां थिऐ अमोरी, हित्ती, परिजी, हिब्बी, जबेशी अर आझ़ तैणीं बी1 आसा ईंयां लोग गलामी ई दी। पर इज़राईली मांझ़ै निं सुलैमानै कोहै बेठू बणाअं। इज़राईली हआ तै तेऊए कार-करिंदै, सैना दी, सैनापति अर रथ अर घोल़ै शुंआरीए दलपति। राज़ै सुलैमाने कार-करिंदै मांझ़ै तै दूई शौ पज़ाह ज़ण्हैं ज़ुंण बेठूए कामों ज़ैगै-ज़ैगै धैन डाहा तै।
सुलैमाने राणीं ती मिसर देशे माहा राज़ेए देई, सह आणी तेऊ दाबेदपूर गहल़ा का तेऊ नऊंऐं मैहला लै ज़ुंण तेऊ खास तैहा लै च़िणअ त। किल्हैकि दाबेदपूर आणअ त बिधाते करारो मणशू। सुलैमानै बोलअ इहअ, “अह निं इज़राईले राज़ै दाबेदे मैहलै डाहणीं किल्हैकि ज़िधी करारो मणशू बशैल़अ, सह ज़ैगा बी हआ खास पबित्र।”
सुलैमानै बिधाता लै ज़ुंण बेदी ती बणाईं दी, तेथ किऐ तेऊ बिधाता लै हूम अर मेल़-ज़ोल़े बल़ीदान। राज़अ सुलैमान करा त हर धैल़ै, बशैघे धैल़ी, पुनूंईए धैल़ै मोसा गूरे बधाने साबै बल़ीदान करी बेदी दी हूम। आखरी रोटीओ थैर, नऊंईं साल-फसलो थैर अर छ़ानींओ थैर। ईंयां थैर ज़ुंण चअन हर साल हआ तै एथ बी करा त सह बधाने साबै बल़ीदान करी हूम। राज़ै सुलैमानै दैनअ प्रोहत अर लेबी लै ज़ुदै-ज़ुदै तिन्नें च़ाकरी करनैओ काम सभाल़ी ज़िहअ तेऊए बाब राज़ै दाबेदै खोज़ी-बोली त डाहअ द। लेबी मांझ़ै डाहै थोल़ै साज़-बाज़ बाज़णैं आल़ै अर तेता संघै करा तै तिंयां प्रोहता संघै च़ाकरी बी। ज़िहअ परमेशरे दास राज़ै दाबेदै हुकम त किअ द, बिधाते भबने पहरी बी डाहै तेऊ ई साबै ज़ुदै-ज़ुदै दला दी बांडी कि तिंयां आपणीं-आपणीं बारी दी पहरअ दैए। ज़िहअ बी राज़ै दाबेदै हुकम त किअ द, सोभ काम सभाल़ै प्रोहत, लेबी, भढारे बारै तिहै ई।
ज़िहअ बी राज़ै सुलैमानै बिधाते भबने आथरी उझै मडोखरै तैणीं करनअ सोठअ त, सह छ़ेक्कअ त तेऊ बणाईं।
राज़अ सुलैमान डेऊअ एदोम देशै एलात नगरी नेल़ लाल समुंदरे बाढै एजोन-गेबर मुल्खै। राज़ै हिरामै दैनै तेऊ लै पाणींए ज़हाज़ अर तेता च़लाऊंणैं आल़ै कप्तान अर सज़ाण सपाही। तिंयां डेऊऐ ओपीर नगरी अर तिधा का आणअ एक शौ शाठ कुंटल़ सुन्नअ राज़ै सुलैमाना लै।
Source notes (1)
- Footnote आझ़ तैणीं बी मतलब ऐहा कताबा लिखणे ज़मानै तैणीं
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.