2 इतिहास 7

बिधाते भबने प्रतिष्ठा

(1 राज़ै 8:62-66)

1ज़ांऊं राज़अ सुलैमान बिधाता सेटा अरज़ करी मुक्‍कअ, सरगा का पल़ी आग, बेदी दी ज़ुंण हूम बल़ीदान त किअ द, सह दझ़अ पठी। बिधाते धुप्पै ज़िहै झ़ामणा करै भर्हुअ सारअ भबन। 2झ़ामण त इहअ खास्सअ कि प्रोहता मांझ़ै निं कोहै बिधाते भबना भितरी डेऊई सकै। 3ज़ांऊं इज़राईली परज़ा भाल़अ कि सरगा का पल़ी आग अर भबन भर्हुअ बिधाते धुप्पै ज़िहै झ़ामणा करै, तिन्‍नैं सोभी टेक्‍कअ धरनीं उटै पल़ी माथअ संघा किअ इहअ बोली बिधातो शूकर,

“बिधाता आसा भलअ अर

सह झ़ूरा हाम्हां लै सदा।”

4तेखअ किअ राज़ै सुलैमानै अर तिधी आऐ दै सोभी इज़राईली बिधाता लै मेल़-ज़ोल़ो बल़ीदान। 5तिन्‍नैं किऐ तिधी बाई हज़ार बल्द, एक लाख बिह हज़ार रिठे हेल़्ही मेल़-ज़ोल़े बल़ीदान अर इहअ करै हुई बिधाते भबने प्रतिष्ठा। 6सोभ इज़राईली तै खल़्हुऐ दै, प्रोहत तै आजू ज़ुदै ज़िहै खल़्हुऐ दै अर नर्शिंगै बाज़दै लागै दै। होर लेबी तै तिन्‍नां बाखा स्मोहरै फिरी तिन्‍नां साज़-बाज़ा बाज़दै लागै दै ज़ुंण राज़ै दाबेदै थिऐ बणाणैं बझ़ैल़ै दै। तिंयां थिऐ इहअ राग लाई बिधाते ज़ै-ज़ैकार करदै लागै दै, “बिधाता झ़ूरा हाम्हां लै सदा!”

7तैहा ई धैल़ी किई राज़ै सुलैमानै बिधाते भबना आजू ताटीए बी प्रतिष्ठा। तेऊ किऐ तिधी खास्सै हूम, मेल़-ज़ोल़ अर नाज़ बल़ीदान करी बेदी बागै ताटी दी हूम। किल्हैकि भबना आजू कांस्से बेदी दी निस्सी ती सोभै च़िज़ा हूम करना लै अक्‍की।

8सुलैमान राज़ै अर सारी इज़राईली परज़ा मनाऊंअ तेता बाद साता धैल़ी तैणीं छ़ानींओ थैर। बिधाते तैहा जाचा लै आऐ उतरा बाखा हमात ज़ोता ओर्ही पछ़मा बाखा मिसर देशे सिऊंआं तैणींए खास्सै मणछ। 9साता धैल़ी तैणीं रहै भबने प्रतिष्ठा लै अर तेता बाद मनाऊंअ साता धैल़ै तैणीं छ़ानींओ थैर। 10त्रेई शऊजै मुक्‍की तिन्‍नें जाचा अर तैहा ई धैल़ी छ़ाडै राज़ै सुलैमानै सोभ आपणैं-आपणैं घअरा लै। सोभ लोग डेऊऐ खुशी-खुशी आपणैं-आपणैं घअरा लै किल्हैकि बिधाता दैनी आपणैं दास दाबेद अर इज़राईली परज़ा लै खास्सी बर्गत।

बिधाता आअ भिई राज़ै सुलैमाने सुपनै

(1 राज़ै 9:1-9)

11राज़अ सुलैमान मुक्‍कअ त बिधाता लै भबन अर आप्पू लै मैहल बणाईं, होर बी ज़िहअ सह च़ाहा त, तेता बी मुक्‍कअ सह बणाईं। 12तेखअ हुअ बादा का इहअ कि बिधाता किई सुलैमाना संघै भिई सुपनै गल्‍ला। बिधाता बोलअ तेऊ लै इहअ, “मंऐं शूणीं तेरी अरज़ अर इहअ बी कि तूह किज़ै च़ाहा कि हुंह करूं। ज़ुंण तंऐं मुल्है अह भबन बणाअं, अह ज़ैगा किई मंऐं सदा लै ज़िधी सोभ मुल्है हूम करे। 13ज़ै सरग नांईं होए अर साल-फसला खांदै हुंह रैट्टै छ़ाडूं, ज़ै हुंह आपणीं परज़ा मांझ़ै माहा मरी पाऊं, 14तेखअ ज़ै तिंयां मुंह सेटा अरज़ करे अर ज़ै तिंयां दिला का पाप करनअ छ़ाडे, तै हेरनी मुंह स्वर्गा का तिन्‍नें अरज़ शूणीं अर तिन्‍नें पाप माफ करी करनी मुंह तिन्‍नें ज़िम्मीं-ज़ैगा भिई रज़दी-पज़दी।

15“एऊ भबनै रहणीं मेरी नदर सदा अर ज़ुंण इधी अरज़ करे, सह हेरनी मुंह शूणीं। 16किल्हैकि अह ज़ैगा छ़ांटी मंऐं सदा लै पबित्र ज़िधी सदा मेरी पूज़ा-गाज़ा होए। इधी रहणीं कबल्‍ली मेरी नदर लागी। 17ज़ै तूह आपणैं बाब दाबेदा ज़िहअ शुचअ-पाक्‍कअ रही मेरी च़ाकरी करे अर ज़ै तूह मेरअ बधान अर तेते सोभी बिधी मने, 18तै हणीं मेरी सह ज़बान पूरी ज़ुंण मंऐं तेरै बाब दाबेदा लै बोला त कि तेरी आद-लुआदा मांझ़ै हणअ एक ज़ण्हअ इज़राईला दी सदा राज़अ। 19पर ज़ै तूह या तेरै आद-लुआद मेरै हुकम नांईं मने अर होरी देअआ पूज़दै लागे, 20तेखअ निं हुंह आपणीं परज़ा इज़राईली तैहा ज़ैगा रहणैं दैंदअ ज़ुंण मंऐं तिन्‍नां लै दैनी ती। तेखअ अह भबन ज़ुंण मंऐं आपणीं पूज़ा करना लै पबित्र मनअ, एथ बी लागणै बाण-भेखल़। तेखअ हणैं इज़राईली होरी देशा लै हास्सणां अर सुहांगा लै।

21“तेखअ रहणीं एऊ भबनै सिधी पात्थरे डिंगरी! एसी बाती एछदै नांहंदै लागणअ एता भाल़ी प्राच अर तिंयां हणैं रहैन संघा बोल़णअ, ‘एऊ देशा अर एऊ भबना संघै बिधाता इहअ किल्है किअ?’ 22तेखअ बोल़णअ होरी लोगा इहअ, ‘इज़राईली छ़ाडअ आपणअ परमेशर बिधाता मनणअ ज़ुंणीं तिंयां मिसर देशा का काढी आणै तै! ऐबै लागै तिंयां होरी देअआ पूज़दै तैही किऐ बिधाता तिंयां इहै खतम।’”