Kulvi Outer Seraji Bible
2 इतिहास 10
उतरा बाखा बस्सै दै इज़राईलीओ द्रोह
(1 राज़ै 12:1-20)
रहबाम डेऊअ शकेम नगरी, तिधी त उतरा बाखा बस्सै दै सोभी इज़राईली तेऊ राज़ै बणाणां लै झाल़अ किअ द। नबातो शोहरू जरोबाम त राज़ै सुलैमाने डरै ठुर्ही मिसर देशे राज़ै सेटा रहंदअ लागअ द। ज़ांऊं तेऊ का थोघ लागअ कि इहअ-इहअ हुअ, सह आअ मिसर देशा का फिरी। पर उतरा बाखा बस्सै दै इज़राईली गोत्रै शादअ जरोबाम अर तेखअ डेऊऐ तिंयां जरोबामा संघा निंईं रहबामा सेटा। तिन्नैं बोलअ रहबामा लै, “तेरै बाब राज़ै सुलैमानै डाहै हाम्हैं मारी-मारी कामां लाई अर कारै दैणैंओ बोझ़ बी पाअ हाम्हां लै बेघै खास्सअ। ज़ै तूह म्हारै एऊ बोझ़ा हल़कअ करे अर म्हारअ ज़िऊंणअ बी सान करे, तै आसा हाम्हैं मानदारी संघै तेरी च़ाकरी करना लै मज़ूर।”
रहबामै दैनअ ज़बाब, “मुंह दैआ सोठी लणैं, तम्हैं लोल़ी चिई धैल़ै बाद मुंह सेटा भिई आऐ, तेखअ खोज़ूं हुंह तम्हां का आपणअ ज़बाब।”
राज़ै रहबामै लई तिन्नां सैणैं-प्रोढै का सलाह ज़ुंण तेऊए बाब सुलैमाना संघै सारी अमरा रहै, “तम्हैं दैआ मुल्है ओर्ही सलाह कि हुंह परज़ा लै किज़ै ज़बाब दैंऊं?”
तिन्नैं दैनअ रहबामा लै ज़बाब, “ज़ै तूह इहअ च़ाहा कि परज़ा तेरी शुणें, तै कर तिन्नां संघै भली गल्ला अर तिन्नों बोझ़ हल़कअ करी कर तिन्नां खुश, तिहअ करै रहणैं तिंयां सदा तेरै गलाम।”
रहबामै किई सैणैं-प्रोढे सलाह शूणीं नां शूणीं अर सह डेऊअ तेखअ तिन्नां आपणीं सुआल़ीए खारकै मणछा का सलाह पुछ़दअ ज़ुंण तेऊ संघै होछ़ी उझै रहा तै। रहबामै पुछ़अ तिन्नां का, “परज़ा बोला मुल्है तिन्नों बोझ़ हल़कअ करना लै, तम्हैं मुल्है एते बारै किज़ै सलाह दैआ कि हुंह किज़ै करूं?”
तिन्नैं दैनअ तेऊ लै ज़बाब, “तूह बोलै तिन्नां लै इहअ, ‘मेरी कान्हीं गुंठी आसा मेरै बाबे कुछी का बी मोट्टी, मेरै बाबै पाअ तम्हां लै खास्सअ बोझ़, मुंह पाणअ तम्हां लै तेता का बी खास्सअ। तेऊ च़िक्कै तम्हैं कोल़ै करै, मुंह क्रिंज़णै तम्हैं लोहे तिछै बिंच़ू करै।’”
ज़ेही गल्ल हुई ती, तिहै ई गऐ च़ौथै धैल़ै जरोबाम अर होर इज़राईली राज़ै रहबामा सेटा पुजी। राज़ै रहबामै निं सैणैं-प्रोढे सलाह दी धैन दैनअ अर तेऊ दैनअ तिन्नां लै काठअ ज़बाब, ज़ेही तेऊ लै खारकै मणछै सलाह दैनी तेऊ दैनअ परज़ा लै तिहअ ई ज़बाब, “मेरै बाबै पाअ तम्हां लै खास्सअ बोझ़, पर मुंह पाणअ तम्हां लै तेता का बी खास्सअ। तेऊ च़िक्कै तम्हैं कोल़ै करै, मुंह क्रिंज़णै तम्हैं लोहे तिछै बिंच़ू करै!” राज़ै रहबामै निं परज़े गल्ल मनी अर इहअ करै किई बिधाता सह गल्ल पूरी ज़ुंण शिलोह नगरीए आहिजा गूरै नबाते शोहरू जरोबामा का बोली ती।
ज़ांऊं सोभी इज़राईली का ज़ाण्हुंअ कि राज़अ निस्सअ तिन्नें एक बी गल्ल शूणीं, तिंयां लागै बोल्दै, “ईशैईए शोहरू दाबेद अर तेऊए खिंबा का हआ ज़ुदै! इनै हाम्हां लै आझ़ तैणीं किअ किज़ै? इज़राईलीओ, आपणैं-आपणैं घअरा लै च़ाल्ला! रहबाम करो ऐबै आपणैं लोगा प्रैंदै राज़!”
इहअ करै किअ इज़राईली रहबामा लै द्रोह, रहबाम डाहअ तिन्नैं सिधअ तिन्नां मणछा प्रैंदै राज़अ ज़ुंण इज़राईली यहूदा मुल्खे नगरी तै बस्सै दै।
तेखअ छ़ाडअ राज़ै रहबामै हादोराम ज़ुंण सोभी बेठू प्रैंदै सैणअ आसा कि इज़राईली संघै गल्ला करे। पर तिन्नैं दैनअ तेऊ लै पात्थरो ढो संघा पाअ सह मारी। तेखअ ठुर्हअ रहबाम छ़ेक्कै-छ़ेक्कै आपणैं रथा प्रैंदै बेशी एरुशलेम नगरी लै। इहअ करै हुऐ उतरा बाखा बस्सै दै इज़राईली राज़ै दाबेदे खिंबा का द्रोह करी दूर अर तिंयां आसा आझ़ तैणीं बी1 इहै ई।
Source notes (1)
- Footnote आझ़ तैणीं बी मतलब ऐहा कताबा लिखणे ज़मानै तैणीं
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.