Kulvi Outer Seraji Bible
2 इतिहास 11
शमयाह गूरै खोज़अ बिधातो समाद
(1 राज़ै 12:21-24)
ज़ांऊं सुलैमानो शोहरू राज़अ रहबाम एरुशलेम पुजअ, तेऊ झाल़ै यहूदा अर बिन्यामीन गोत्रा का एक लाख अश्शी हज़ार सपाही ज़ुंण सोभी का राम्बल़ै जोधै थिऐ। तेऊओ मतलब थिअ इहअ कि उतरा बाखे इज़राईली संघै छ़ेल़णअ तेऊ जुध संघा करनै तिंयां सोभ इज़राईली आपणैं काबू। पर बिधाता बोलअ आपणैं गूर शमयाह का इहअ, “तूह दै सुलैमाने शोहरू राज़ै रहबाम अर यहूदा अर बिन्यामीन सोभी गोत्रे इज़राईली लै इहअ समाद, ‘तम्हैं निं आपणैं ई सक्कै भाई-बंधा संघै जुधा करदै लागी। तम्हैं डेओआ सोभ आपणैं घअरा लै, सह आसा हुंह बिधाता आप्पै ज़ुंणीं इहअ दैनअ हणैं।’” रहबाम अर तेऊए सारी सैना शूणअ तिहअ ई ज़िहअ बिधाता बोलअ संघा डेऊऐ तिंयां आपणैं घअरा लै फिरी अर तिन्नैं निं तेखअ जरोबामा संघै जुध किअ।
रहबामै ज़हा-ज़हा नगरी फेर गहल़ च़िणैं
रहबाम लागअ एरुशलेम नगरी का राज़ करदअ। तेऊ च़िणैं यहूदा अर बिन्यामीन मुल्खे कई नगरी दी फेर-फिरदै गहल़। तिंयां नगरी ती ईंयां: बेतलेम, एताम, तकोआ, बेथ-सूर, सोको, अदुलाम, गात, मारेशा, जीप, अदोरीम, लकीश, अज़ेका, सोरा, अजालोन अर हेब्रोन नगरी। तिन्नां सोभी नगरी फेर-फिरदै गहल़ होर बी पाक्कै करी डाहै तिन्नां सोभी नगरी दी सैणैं अर सोभी नगरी दी ज़िणस, जैतूने तेल अर दाखे रसे भढार। ढाल़ा अर बर्छ़ै बी डाहै तिन्नां सोभी नगरी दी पुगतै। इहअ करै किऐ तेऊ यहूदा अर बिन्यामीन गोत्रे सारै मुल्खै सारी परज़ा आपणैं काबू।
लेबी अर प्रोहत आऐ यहूदा लै
उतरा बाखा इज़राईल सारै मुल्खा का आऐ प्रोहत अर लेबी दखणा बाखा यहूदा मुल्खा लै। तिन्नैं लेबी छ़ाडी इज़राईल मुल्खै आपणीं जदी ज़ैगा अर घैहणीं संघा पुजै यहूदा मुल्खै एरुशलेम, किल्हैकि इज़राईल मुल्खे राज़ै जरोबाम अर तेऊए शोहरू निस्सै तिन्नां बिधाता लै प्रोहतो काम करनै दैई। जरोबामै छ़ांटै आपणैं प्रोहत ज़ुंण इज़राईल सारै मुल्खै ज़ैगै-ज़ैगै धारा देहुरै दी बाकरे मुहुर्ती अर बाछ़ूए मुहुर्ती पूज़दै हआ तै। पर इज़राईले सोभी गोत्रा मांझ़ै तै कई लोग इहै ज़ुंण अज़ी बी दिला का आपणैं दादा-बाबा ज़ेही सिधी बिधाते पूज़ा-गाज़ा करनी च़ाहा तै, तिंयां बी आऐ लेबी पिछ़ू एरुशलेम नगरी लै ताकि तिंयां बिधाता लै बल़ीदान करी सके। तिंयां रहै चिई साला तैणीं यहूदा मुल्खै अर तिंयां थिऐ राज़ै रहबाम अर तेऊए राज़े पक्षा दी। तिन्नैं दैनअ तेऊओ तिहअ ई साथ ज़िहअ तिन्नैं राज़ै दाबेद अर तेऊए शोहरू सुलैमानो साथ दैनअ त।
रहबामे आद-लुआद
रहबामै किअ महलता संघै बैह। महलत ती दाबेदे शोहरू जरमोत अर अबिहेले शोहरी। अबिहेलो बाब थिअ ईशैईओ शोहरू एलीआब। महलता का थिऐ रहबामे चअन शोहरू जेऊश, शेमारीया अर जहाम हुऐ दै।
बादा का किअ तेऊ अबशलोमे शोहरी माकाहा संघै बैह। माकाहा का हुऐ रहबामे अबियाह, अताई, जीजा, अर शेलोमीत। रहबाम झ़ूरा त अबशलोमे शोहरी माकाहा लै आपणीं राणीं अर होरी डाही बेटल़ी का खास्सअ। तेऊए ती पठी ठारा राणीं अर होर डाही दी बेटल़ी थिई शाठ। तिन्नां का थिऐ तेऊए ठाई शोहरू अर शाठ शोहरी हुई दी।
रहबामै बणाअं माकाहा का हुअ द शोहरू अबियाह सोभी शोहरू प्रैंदै टिक्कअ कि सह हणअ तेऊ बाद राज़अ। रहबामा ती खास्सी अक्ल अर यहूदा अर बिन्यामीने मुल्खै दैनी तेऊ आपणैं सोभी शोहरू लै एकी-एकी नगरीए ज़िम्मैंबारी। तेऊ दैनअ तिन्नां लै ज़िहअ तिन्नां लोल़ी तिहअ अर बेटल़ी बी दैनी तिन्नां सोभी लै खास्सी आणी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.