1 करिन्थी

1 करिन्थी

करिन्थ नगरीए विश्वासी टोली लै पैहली च़िठी

भेत

लिखणैं आल़अ: पल़सी

पहल़णैं आल़ै: करिन्थ नगरीए विश्वासी

सन: 55

पल़सी बणाईं ती करिन्थ नगरी मसीहा दी विश्वास करनै आल़ेए टोली। तेथ हुई मसीही ज़िन्दगी अर विश्वासे बारै कई खरी पैईदा। तिन्‍नां खरी ठीक करने तैणीं लिखी ती पल़सी शधाणूं करिन्थ रहणैं आल़ै विश्वासीए नाओंऐं अह पैहली च़िठी। तेऊ ज़मानैं त करिन्थ यूनान देशो एक संसारा लै मशूर नगर। ज़ुंण रोम राज़े ज़मानैं यूनान मुल्खे राज़धानी ती। अह त तेऊ ज़मानैं भरपूर बपार, ठाहठ, रिती-रबाज़ अर कई धर्मां लै मशूर। पर अह त आपणीं कंज़रैई ज़िहै कदुष्ट कामां लै बदनाम।

शधाणूंए फिकर करने गल्‍ला ती खासकर विश्वासीए टोली दी गुटबाज़ी, कदुष्ट काम, कंज़रैई, बैह शादी, सोर-समझ़े बारै सुआल, विश्वासीए टोली आप्पै ई इंतज़ाम, पबित्र आत्मों दान अर मरी करै ज़िऊंदै हणैंओ सुआल। पल़सी खोज़ा आपणीं घोर आत्मिक आछी करै कि खुशीए समादा करै इना सुआलो समाधान किहअ करै सका हई।

13 दी खोज़ा पल़सी आपणीं आत्मिक आछी भाल़ी इहअ कि परमेशरा का भेटै दै बरदाना दी आसा सोभी का बडी आसा झ़ूरी। अह आसा ऐहा कताबो मशूर पाठ।

पल़सी खोज़ा इहअ कि झ़ूरी करनी आसा विश्वास अर आशा डाहणैं का बी खास। टोली दी सका हर गल्‍लो समाधान हई ज़ै टोली दी सोभै मणछ एकी-दुजै लै दिला का झ़ूरे, ज़िहअ मसीहा दी विश्वास करनै आल़ै करनअ लागा:

“ज़ुंण होरी लै झ़ूरी करा, सह डाहा सबर अर दुजै लै झींण अर ज़ुंण झ़ूरी करा सह निं कोहिए निंदा करदअ आथी, झ़ूरी निं आपणीं बड़ैई करदअ आथी, अर नां आप्पू सराहंदअ आथी, सह निं दुजे बेइज़ती करदअ, नां सह मतलबी हंदअ, सह निं धखी का रोश्श करदअ, ज़ै तेऊ लै कुंणी बूरअ बभार किअ तेता बी निं सह आद डाहंदअ, ज़ै कुंण तेऊ लै पाप बी करे, तेता बी करा सह माफ। ज़ुंण झ़ूरी करा सह निं लोगे कदुष्ट कामां लै खुश हंदअ, सह हआ भलै अर शुचै कामां लै खुश। सह ज़िरा झ़ूरी दी सोभी गल्‍ला, सह निं विश्वास करनअ छ़ाडदअ, सह डाहा सोभी गल्‍ला दी आशा अर सह धरा हर गल्‍ला लै धीर। इहअ बगत बी एछणअ ज़ेभै लोगा परमेशरो बैण खोज़णअ ई निं आथी! नां पाखली बोली बोल़णीं अर परमेशरे बारै डुघै भेद समझ़णें बी निं ज़रुरत रहणीं, पर झ़ूरी रहणीं कबल्‍ली एही ई बणी।”

(13:4-8)

कताबे बांड

भेत 1:1-9

विश्वासीए टोली दी गुटबाज़ी 1:10—4:21

नित-पत्त अर घरेलू ज़िन्दगी 5:1—7:40

मसीही अर मुहुर्ती पूज़णै आल़ै 8:1—11:1

विश्वासीए टोली ई ज़िन्दगी 11:2—14:40

मसीहा ईशू अर विश्वासीओ ज़िऊंदै हणअ 15:1-58

यहूदी मणछे मसीही लै दान 16:1-4

खास गल्‍ल अर नचोल़ 16:5-24