Kulvi Outer Seraji Bible
1 करिन्थी 8
मुहुर्ती दी भैंट दैनी दी खाणें च़िज़ा
थारी च़िठी दी पुछ़अ त तम्हैं मुहुर्ती दी बल़ीदान किई दी च़िज़े बारै सुआल। हाम्हां सोभी का आसा ऐहा गल्ले बारै ज्ञैन। पर ज्ञैना करै एछा हाम्हां आप्पू घमंड अर पर झ़ूरी करै करा हाम्हैं एकी दुजे मज़त। ज़ै तम्हैं आप्पू लै इहअ समझ़े कि तम्हां का आसा थोघ, तै निं तम्हां का असली दी तिहअ थोघ आथी ज़िहअ हुअ लोल़ी। पर परमेशरा का हआ तेऊ मणछो थोघ ज़ुंण परमेशरा संघै झ़ूरी करा।
ऐबै लाअ मंऐं तम्हां का मुहुर्तीए सम्हनै बल़ी किई दी च़िज़े बारै खोज़ी कि सारै भ्रमंडै आसा एक्कै परमेशर अर संसारे मुहुर्ती दी निं ज़िन्दगी आथी।1
पर तज़ी बी बोला मणछ सरगै अर पृथूई दी कई लै परमेशर अर प्रभू। पर म्हारअ आसा एक्कै परमेशर अर सह आसा म्हारअ बाब। तेऊ बणाईं सोभै गल्ला अर तेऊ ई करै आसा हाम्हैं ज़िऊंदै। ठीक इहअ ई आसा म्हारअ एक्कै प्रभू अर सह आसा ईशू मसीहा। तेऊ ई करै आसा सोभै गल्ला बणाईं दी अर तेऊ ई करै आसा हाम्हैं ज़िऊंदै।2
पर सोभी विश्वासी का निं अज़ी बी थोघ आथी कि मुहुर्ती दी निं किछ़ै शगती आथी। किल्हैकि तिंयां करा तै पैहलै तिन्नां मुहुर्तीए पूज़ा। ज़ांऊं ऐबै तिंयां मुहुर्ती दी बल़ीदान किई दी च़िज़ा खाआ, तिंयां सोठा गलती दी इहअ कि तिंयां आसा अज़ी बी तिन्नां मुहुर्तीए पूज़ा दी साझ़ू। तेखअ हआ तिंयां परशैन, तिंयां सोठा गलती दी इहअ कि मुहुर्ती दी च़ढाऊई दी च़िज़ा खाई करै हेरअ तिन्नैं पैहलै ई पाप करी।
पर खाणैं-पिणैं करै निं म्हारअ परमेशरा संघै नातअ पाक्कअ हंदअ। म्हारअ निं किछ़ै घाटअ च़ाल्लअ हई ज़ै हाम्हैं किज़ै नांईं खाए अर नां किज़ू खाणैं करै फाईदअ हंदअ।
तम्हैं आसा सोभी खाणैं-पिणें च़िज़ा खाणां लै आज़ाद पर ऐहा गल्लो डाहै धैन कि थारी ऐहा आज़ादी करै निं लोल़ी तिंयां विश्वासी प्रभू दी विश्वास करनअ छ़ाडअ ज़ुंण विश्वासा दी दुबल़ै आसा। किल्हैकि, ताखा ता आसा थोघ कि ईंयां मुहुर्ती निं असली परमेशर आथी अर तूह खाआ मुहुर्तीए देहुरै। पर ज़ुंण विश्वासा दी दुबल़अ आसा सह सोठा इहअ कि, ज़ै सह इहअ करे, तै आसा अह पाप। तिधी ताह खांदै भाल़ी सका तेऊ बी मुहुर्ती दी बल़ीदान किई दी च़िज़ा खाणें हिम्मत पल़ी। सह भाई ज़ुंण विश्वासा दी दुबल़अ आसा अर ज़सरी तैणीं मसीहा आपणीं ज़ान दैनी, तेरै खास्सै ज्ञैना पिछ़ू छ़ाडअ तेऊ मसीहा दी विश्वास करनअ।
इहअ करै करा तम्हैं मसीहा दी आपणैं विश्वासी भाई-बैहणी तिन्नां गल्ला करना लै हैअ दैई पाप ज़ेता लै तिंयां गलत समझ़ा। तैही ज़ै मेरै मुहुर्ती दी बल़ीदान किई दी च़िज़ा खाई करै मेरअ विश्वासी भाई प्रभू का दूर हआ, तै रहणअ मुंह इहै खाणैं-पिणैं का सदा दूर ज़ेता करै मेरअ साथी-भाई प्रभू दी विश्वास करनअ छ़ाडा।
Source notes (2)
- Cross-reference बधा. 4:39
- Cross-reference जोह. 1:3; 11:36
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.