Kulvi Outer Seraji Bible
1 करिन्थी 6
मसीहा दी झ़गल़ै
ज़ै तम्हां मांझ़ै कुंण दुजै विश्वासी लै मकदमअ करे, तम्हैं निं लोल़ी तिन्नां मणछा सेटा आपणैं फैंसलै करदै डेऊऐ ज़ुंण विश्वासी निं आथी। तम्हां लागा टोली दी आपणैं विश्वासी भाई मांझ़ै डेऊई फैंसलअ करनअ कि तिन्नां मांझ़ै कुंण ज़ण्हअ आसा शुचअ। तम्हां का आसा थोघ कि परमेशरे पबित्र मणछा करनअ आजू एऊ संसारे मणछो फैंसलअ। तैही सका तम्हैं आप्पू मांझ़ै इना होछ़ै-होछ़ै झ़गल़ैओ फैंसलअ करी कि कुंण आसा शुचअ।1
तम्हां का आसा थोघ कि आजू करनअ हाम्हां स्वर्ग दूतो फैंसलअ बी, हाम्हैं सका संसारे होछ़ी-होछ़ी आम गल्लो फैंसलअ बी करी।
ज़ै तम्हैं एही गल्लो फैंसलअ करे, पांच़ निं इहअ लोल़ी हुअ ज़सरअ टोली दी कोहै विश्वासी निं अदर करदै। मंऐं लाई अह गल्ल तम्हां लै तै बोली ताकि तम्हां शरम एछे, कि सच्च़ी तम्हां मांझ़ै एक बी मणछ निं समझ़कार आथी, ज़ुंण आपणैं विश्वासी भाईओ फैंसलअ करी सके? तम्हैं विश्वासी बी लाआ भाई-भाई तोही एकी-दुजै लै दोश अर आपणैं मकदमें फैंसलै करदै डेओआ तम्हैं तिन्नां मणछा सेटा लै ज़ुंण विश्वासी निं आथी।
ज़ेभै तम्हां मांझ़ै कुंण दुजै विश्वासीओ मकदमअ करा, तम्हैं निं एकी-दुजै संघै तेही ज़िन्दगी ज़िऊंणां लै सफल हुऐ ज़िहअ मसीहा च़ाहा कि थारी ज़िन्दगी होए। ज़ै कुंण विश्वासी तम्हां लै ज़ुल्म करा तेऊ दैणअ करनै, ज़ै कुंणी धोखअ दैई तम्हां का किज़ै निंयं बी, तेऊ लै निं तम्हैं किछ़ै करनअ। पर थारै बारै आसा एही गल्ल कि तम्हैं करा बूरअ अर तम्हैं दैआ आपणैं विश्वासी भाई लै बी धोखअ।
तम्हां का आसा थोघ कि बूरै करनै आल़ै लोग निं परमेशरे राज़े बरासते हकदार बी हणैं आथी। तम्हैं निं इहै धोखै दी रही कि तम्हैं करा कदुष्ट काम अर तज़ी बी हणैं तम्हैं परमेशरे लोग! ज़ुंण ईंयां इहै लोग हणैं, ज़िहै कंज़री सेटा डेऊणैं आल़ै, मुहुर्ती पूज़णै आल़ै, कंज़रै, धोखै दैणैं आल़ै, मर्धे देही झ़ूरनै आल़ै, च़ोर, मांण करनै आल़ै, शराबी, गाल़ी दैणैं आल़ै, कदुष्ट कामां करनै आल़ै निं परमेशरे राज़ा दी बरासते हकदार हणैं आथी। तम्हां मांझ़ै बी ज़िऊआ तै कई ज़ण्हे एही ज़िन्दगी, पर प्रभू ईशू मसीहे नाओंऐं अर पबित्र आत्में शगती किऐ तम्हैं धोई करै पबित्र अर परमेशरा संघै धर्मीं।
कंज़रै निं हणअ
तम्हां मांझ़ै सका कई इहअ बोली, “बधाने साबै सका हाम्हैं सोभै गल्ला करी किल्हैकि हाम्हैं आसा विश्वासी।” तै आसा ठीक, पर हुंह बोला तम्हां लै इहअ कि सोभै गल्ला निं फाईदे आथी। हुंबी सका बोली, “हुंह सका बधाने साबै सोभै गल्ला करी।” पर मुंह निं तिंयां करनी किल्हैकि हुंह निं च़ाहंदअ कि हुंह कोई बी गल्लो गलाम बणू। कोई सका तम्हां मांझ़ै इहअ बी बोली, “रोटी आसा देहीए तैणीं, अर देही आसा रोटीए तैणीं।” पर हुंह बोला इहअ कि परमेशरा करनी ईंयां दुहै च़िज़ा ज़ांऐं। अह देही निं कंज़रैई करना लै आथी, अह आसा प्रभूए तैणीं, अर प्रभू करा म्हारी देहीए हेर-सभाल़।
पर म्हारी देही आसा किम्मती किल्हैकि परमेशरै किअ आपणीं शगती करै प्रभू मरी करै भिई ज़िऊंदअ, अर हाम्हैं बी करनै तेऊ ज़िऊंदै।
तम्हां का आसा थोघ कि थारी देही आसा मसीहे आंग। तै हुंह तेऊ आंगा ज़ुंण मसीहो आसा तेता कै हुंह कंज़री बेटल़ी संघै करूं साझ़ू? इहअ निं हई सकदअ!
अह आसा पबित्र शास्त्रा दी लिखअ द, “तिंयां दूई हणैं एक देही।” तम्हां का लोल़ी ऐहा गल्लो थोघ हुअ कि ज़ुंण कंज़री बेटल़ी संघै साझ़ू हआ सह हआ तैहा संघै एक देही।2
ज़ुंण प्रभू संघै साझ़ डाहा तेऊए आत्मां अर प्रभूए आत्मां हआ एक।
कंज़रैई करनै का रहा दूर! देही दी निं होर पाप तेतरअ असर करदै ज़ेतरअ अह पाप करा। कंज़रैई करनै आल़अ मणछ करा आपणीं देहीए खलाफ पाप।
तम्हां का आसा थोघ कि थारी देही आसा भबन ज़ेथ पबित्र आत्मां बस्सा ज़ुंण तम्हां लै परमेशरै आसा दैनी दी, थारअ मालक आसा परमेशर। किल्हैकि परमेशरै आसा तम्हां लै खास्सी किम्मत दैनी दी, ज़धू तेऊ मसीहा ईशू बल़ीदान हणां लै छ़ाडअ, तै बोला हुंह तम्हां लै कि ऐहा आपणीं देही करै रहैऊआ परमेशरो प्रतप्प।
Source notes (2)
- Cross-reference दान. 7:22
- Cross-reference मार्क. 10:8
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.