Kulvi Outer Seraji Bible
1 करिन्थी 11
तम्हैं बी ज़िऊआ मुंह ज़ेही ज़िन्दगी ज़िहअ हुंह मसीहा भाल़ी आपणीं ज़िन्दगी ज़िऊआ।
परमेशरा सेटा निं नांगै मुंडै एछणअ
भाईओ, हुंह सराहा तम्हां एते तैणीं कि तम्हैं करा मुंह सोभी गल्ला दी आद अर ज़ुंण शिक्षा मंऐं तम्हां लै आसा दैनी दी, तम्हैं मना तिन्नां सोभी।
पर एक गल्ल आसा तेता च़ाहा हुंह कि तम्हां का थोघ लागे। हरेकी मर्धो मूंड आसा ईशू मसीहा, अर बेटल़ीओ मूंड आसा मर्ध, अर मसीहो मूंड आसा परमेशर। ज़ुंण बेटल़ी नांगै मुंडै सोभी नदरी प्राथणां या पबित्र आत्में गल्ला प्रगट करा, सह करा मसीहा नकदरै ज़ुंण तेऊओ मूंड आसा।
ज़ुंण बेटल़ी नांगै मुंडै प्राथणां या पबित्र आत्में गल्ला प्रगट करा, सह बी करा आपणैं मर्धा नकदरै ज़ुंण तेसो मूंड आसा। तेखअ निं तैहा बेटल़ी दी किछ़ै फरक रहअ ज़हा बेटल़ीए मूंड बेइज़ती पिछ़ू तांबल़अ आसा किअ द। ज़ै बेटल़ी धाठू निं लाए, ता, तैहा लागा आपणैं मुंडे शराल़ बी काटणै, ज़ै कहा बेटल़ी तांबल़अ हणअ शरमें गल्ल आसा, तै लागा तैहा धाठू डाहणअ बान्हीं।
हाँ मर्धा निं लागदअ आपणअ मूंड ढोपी डाहणअ किल्हैकि सह आसा परमेशरै तिहअ बणाअं द ज़िहअ सह आप्पू आसा अर तेऊ आसा मर्धा लै आप्पू ज़िहअ सभाब दैनअ द। पर बेटल़ी आसा मणछे प्रतप्पो दुजअ रूप।
किल्हैकि परमेशरै बणाअं पैहलै मणछ आदमी अर सह निं सह निं बेटल़ी का बणाअं पर बेटल़ी बणाईं तेऊ पैहलै मणछ आदमी का।1
मर्ध निं बेटल़ीए फाईदे तैणीं आथी बणाअं द पर बेटल़ी आसा मर्धे मज़त करना लै बणाईं दी।2
एते ई तैणीं अर एते तैणीं बी कि स्वर्ग दूत आसा भाल़ै लागै दै, बेटल़ी लोल़ी आपणैं मूंड ढोपी डाहअ, तेता करै हआ अह गल्ल प्रगट कि तैहा प्रैंदै आसा कसरअ हक।
तैबी प्रभूए विश्वासी मांझ़ै निं बेटल़ी मर्धा का ज़ुदी आथी अर नां मर्ध बेटल़ी का आथी ज़ुदअ। किल्हैकि ज़ेही पैहली बेटल़ी परमेशरै मर्धा का बणाईं तिहअ ई हआ ऐबै मर्धो ज़ल्म बेटल़ी का। पर सोभी च़िज़ो मूल़ आसा परमेशर।
तम्हैं ई करा आप्पै ऐहा गल्लो फैंसलअ कि बेटल़ीए सोभी नदरी नांगै मुंडै परमेशरा का प्राथणां करनी ठीक आसा कि गलत। तम्हैं एही बी निं समझ़दै कि मर्ध ज़ै बेटल़ी ज़िहै लाम्मअ मूंड डाहे, तेऊ लै निं सह अदरे गल्ल हंदी। पर ज़ै बेटल़ी लाम्मअ मूंड डाहे, तेता करै शोभा बेटल़ी होर बी खास्सी। लाम्मै मूंड आसा बेटल़ी लै तिन्नां लै ढोपणां लै दैनै दै, तिहअ ई लागा तिन्नां सोभी नदरी प्राथणां दी आपणअ मूंड ढोपी डाहणअ। पर ज़ै कुंण इहअ सोठे कि ज़ुंण मंऐं बोलअ सह आसा गलत, पैहलै लऐ ऐहा गल्ला समझ़ी कि नां म्हारअ अर नां परमेशरे मसीही टोलीओ इहअ रबाज़ आथी।
प्रभू भोज़े बारै
(मोत्ती 26:26-29; मार्कुस 14:22-25; लूका 22:14-20)
ऐबै ज़ुंण मंऐं तम्हां लै आजू लाअ बोली तेता लै निं हुंह तम्हां सराहंदअ आथी, कि ज़ेभै तम्हैं एकी ज़ैगा कठा हआ, तेता करै हआ फाईदे ज़ैगा घाटअ ई। किल्हैकि पैहलै शूणअ कि ज़ेभै तम्हैं टोली दी कठा हआ, तम्हां दी हआ फूट पल़ी दी, अर ऐबै लागअ मुंह ऐहा गल्ला दी किज़ै विश्वास बी हंदअ। किल्हैकि गुटबाज़ी बी हणीं तम्हां दी ज़रूर, सह हणीं एते तैणीं कि ज़ुंण लोग तम्हां मांझ़ै खरै-खरै आसा ताकि तिंयां प्रगट हई सके।
तम्हैं ज़ेभै प्रभू ईशूए बल़ीदान करना लै एकी ज़ैगा कठा हआ, तम्हां का निं ऐहा थोघै ई आथी कि प्रभू भोज़ किहअ लोल़ी हुअ! कै हआ कि तम्हैं हेरा होरी संघै साझ़ू करनै का पैहलै ई रोटी खाई अर एतो नतिज़अ हआ इहअ कि कोई हआ अज़ी भुखै अर कोई हआ दाख रस झुटी राल़ै-मताल़ै। खाणां पिणां लै आसा थारै आपणैं घअर तिधी करा आपणीं मरज़ी ज़िहअ तम्हैं च़ाहा तिहअ। तम्हैं मतलबी बभार अर परमेशरे टोलीए निं तम्हैं किछ़ै कदर समझ़दै अर गरीब मणछा करा तम्हैं शर्मिंदै। एते बारै किज़ै बोलूं हुंह तम्हां लै? थारै एऊ बभारा लै कै तम्हां मुखा एही आशा कि मुंह करनअ तम्हां लै शाबाश? हुंह निं ऐहा गल्ला लै तम्हां का खुश आथी।
किल्हैकि ज़ुंण शिक्षा मंऐं तम्हां लै आसा दैनी दी तिंयां आसा तिंयां ई ज़ुंण मुंह प्रभू का आसा भेटी दी। ज़हा राची प्रभू ईशू कैद करनै बझ़ैल़अ, प्रभू ढाकी रोटी आपणैं हाथै तेखअ परमेशरो शूकर करी सह रोटी चोल़ी अर तिन्नां लै दैनी इहअ बोली, “अह रोटी आसा मेरी देही, ज़ुंण मंऐं तम्हां लै दैनी, मुंह आद करना लै करै तम्हैं इहअ ई।”
रोटी का बाद ढाकअ तेऊ एक दाखे रसा करै भरअ द प्रिहअ बी संघा बोलअ, “अह प्रिहअ आसा मेरै लोहू दी परमेशरे मणछा लै नऊंईं करार ज़ेभै तम्हैं एता झुटे, मेरी आदी दी करै इहअ ई।” ज़ेभै बी तम्हैं ऐहा रोटी खाए, अर एऊ प्रिहअ झुटै; प्रभूए मौतो प्रच़ार रहै करदै लागी, ज़ेभै तैणीं सह फिरी निं एछे।
ज़ै कुंण प्रभूए रोटी इहै करै खाए ज़िहअ करै प्रभूओ अदर नांईं हंदअ, अर प्रिहअ का झुटे, सह हणअ इहअ करी प्रभूए देहीओ अर लोहूओ दोशी। अर एते तैणीं तम्हैं लऐ आपणैं मन्नां भाल़ी अर परखी, तेखअ खाऐ तम्हैं ऐहा रोटी अर प्रिहअ। किल्हैकि, ज़ै कुंण प्रभूए रोटी खांदी बारी प्रभूए देही नांईं बछ़ैणें, एऊ खाणैं पिणें पिछ़ू आणा सह आप्पू लै सज़ा। एता ई पिछ़ू आसा तम्हां मांझ़ै कई देही दी दुबल़ै, बमार, अर खास्सै आसा मरी बी गऐ दै।
ज़ै हाम्हैं आपणीं सोर परखदै, तै निं परमेशरा हाम्हां लै सज़ा दैणीं ती। पर प्रभू दैआ हाम्हां लै सज़ा म्हारी भलाईए तैणीं, कि हाम्हैं निं लोल़ी एऊ संसारे मणछा संघै नसाफ हणें धैल़ी दोशी हुऐ।
एते तैणीं, ए मेरै भाईओ, ज़ेभै तम्हैं प्रभू भोज़ा खाणें तैणीं कठा हआ, एकी-दुजै लआ न्हैल़ी ज़ै कुंण भुखअ होए, सह लऐ आपणैं घअरै रोटी खाई, ताकि ज़ेभै तम्हैं कठा होए तेभै लोल़ी थारअ बभार तिहअ हुअ ज़िहअ प्रभू भोज़ा लै ज़रूरी थिऐ निं तम्हां परमेशरा का सज़ा भेटणीं। बाकी गल्ला करनी मुंह आप्पै एछी ठीक।
Source notes (2)
- Cross-reference मूल. 2:21-23
- Cross-reference मूल. 2:18
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.