Runyankore - Rukiga Bible 1964
Enfumu 22
Eiziina rirungi n'ery'okwetengwa okukira eitungo ringi;
N'okugira obushongore nikukira efeeza n'ezaabu. 2
Abatungi n'abooro bateeranira hamwe;
Boona MUKAMA niwe yaabahangire. 3
Omwerinzi ku areeba akabi kaija, ayeshereka;
Kwonka otaine bwengye akeegyema, kamwita. 4
Ebihembo by'omucureezi kandi orikutiina MUKAMA
N'obutungi n'ekitiinisa n'amagara. 5
Amahwa n'emitego biri omu muhanda gw'orikwehabagiza;
Orikwerinda aryabyetantara. 6
Manyiiza omwana omuhanda ogu ashemereire kutoora;
Kandi n'obu arikura, tarigurugamu.
Omutungi ategyeka omworo,
Kandi oyegurize aba omuhuuku w'omugurize. 7
Orikubiba okutahikiirira, aryagyesha akagwe;
N'enkoni y'ekiniga kye eryaremwa. 8
Oine eriisho ry'obufura aryaheebwa omugisha,
Ahabw'okuba abooro abaha aha by'okurya bye. 9
Binga omuteezi w'enaku; nibwo entongane ziraarugyeho,
Okutongana n'okujumiirana bikahwaho. 10
Orikukunda omutima ogushemeire, kandi orikugamba eby'embabazi,
Omugabe aryaba munywani we.
Amaisho ga MUKAMA garinda oine okumanya,
Kwonka ebigambo by'endeebya abibuzabuza. 11
Omweremwa ayekwatsakwatsa ati: Aheeru hariho entare.
Ku ndikushohora, neenyitira omu muhanda. 12
Akanwa k'omukazi enshambani n'ekiina kiraingwa;
Ou MUKAMA agwereirwe kubi aryakigwamu. 13
Obushema bubohirwe omu mutima gw'omwana;
Kwonka enkoni y'okuhana eryabumwihamu, ebute hare. 14
Orikuhata abooro ahabw'okwekanyisiza obutungi,
Nari orikuha abatungi, eki ariihamu n'okukyena.
Ebigambo by'abanyabwengye
Tega okutu, ohurire ebigambo by'abanyabwengye,
Kandi ote omutima gwawe aha kumanya kwangye;
Ahabw'okuba kiryaba kirungi, waabigumya omu mutima gwawe,
Kandi waabigumya aha minwa yaawe byona.
Nikyo naabikumanyisiza eri izooba, iwe wenka,
Ngu ogume nooyesiga MUKAMA.
Tinaakuhandiikira ebigambo ebirikukira oburungi,
Eby'okuhana n'eby'okumanya, 15
Okukworeka ebihikire n'eby'amazima,
Ngu obone kugarukamu abakutumire ebigambo by'amazima? 16
Otarinyaga omworo, ngu niho ari omworo,
Nari okwita kubi abarikusingisirizibwa aha marembo; 17
Ahabw'okuba MUKAMA aryabatonganira,
Kandi abarikubanyaga, aryabaihaho amagara gaabo.
Otarinywana n'omuntu orikurahuka kuguubwa kubi,
N'obu kwakuba okugyenda n'omunyakiniga,
Nyentsya otakaayega emitwarize ye,
Okeenaga omu mutego. 18
Otariba nk'abo abaha emikwato,
Abeemererera abaine amabanja.
Ku oraabe otaine ky'okumwihurira,
Nooyenda ku bakwiha aha kitanda kyawe, bakakitwara? 19
Otarikuura ekiti ky'omwatano,
Ekyabyairwe baashwenkuru. 20
Nooreeba omuntu orikwezirika omu murimo gwe?
Aryayemerera omu maisho g'abagabe naabaheereza;
Tariheereza bataine iziina.
Source notes (20)
- Cross-reference Mub 7:1.
- Cross-reference Enf 29:13; Yob 31:15.
- Cross-reference Enf 14:16; 27:12.
- Cross-reference Enf 21:20, 21.
- Cross-reference Enf 21:23.
- Cross-reference Efe 6:4.
- Cross-reference Yob 4:8; Hos 10:13.
- Cross-reference Enf 19:17; Luk 14:13, 14.
- Cross-reference Enf 26:20.
- Cross-reference Enf 16:13; Mub 10:12.
- Cross-reference Enf 26:13.
- Cross-reference Enf 2:16; 23:27; Mub 7:26.
- Cross-reference Enf 13:24.
- Cross-reference Enf 28:22; Yob 20:19-23; Amo 5:11.
- Cross-reference Luk 1:3, 4.
- Cross-reference Yob 5:4; 31:21; Zek 7:10.
- Cross-reference Enf 23:11; 1 Sam 24:15; Yer 50:34.
- Cross-reference Enf 6:1, 2; 20:16.
- Cross-reference Enf 23:10; Bir 19:14.
- Cross-reference 1 Sam 16:21; 1 Bag 11:28; 12:6, 8.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.