Skip to content
BibleKenya

TRADUCTION BILBE EN KINYANGA

Matthew 6:33

Verse 33 is marked below, with the whole chapter around it. Read from the start

Yesu uhanange ebea bushwa n'erisake ebasene

«Mukohyanga! Kiro mwendi muronja byakonda murikwishea kuri ebea mbu babusunge. Bushwa mbu mumakora mbo, Tita winu wa mu mbingu watabuhembiyo.

«Kai, kuba ǒngo usakengi emusene, kiro wendi ukaso mu ngoma imbu buronjanga ebea b'enkuse kumunda n'emasinangoki na mu myengere kongo ebea batata bo. Nibwirengi muriira mbu ibo bamakinda rero ihembwa ebihembo byabo. Ina ǒngo, kuba ǒngo usakengi emusene, emwine wabe w'ekurembe utasibinga ekikorange emwine wabe w'ekwabume. Eburongu bwabe mbo, wenda uronja bo mu nama. Bushwa nancho, Tita wabe ingu usungange mu nama ebikorange ǒngo, wasekuhembayo.»

Yesu uhanange ebea bushwa n'emahemo

(Ruk 11.2-4)

«Kuba banu muhemange Ongo, kiro mwendi mubese buri ebea b'enkuse. Bushwa mbu ibo, kuba bahemange, bashimanga isimana mu masinangoki na munse nkiri kongo basungwa n'ebea. Nibwirengi muriira mbu ibo bamakinda rero ihembwa ebihembo byabo. Ina ǒngo, umasonda ihema Ongo, wenda wirindike ekundani yabe. Nampo wenda uhema Ongo wabe ingu uri mpo mu siri. Na Tita wabe ngo usungange bikai bironjange ǒngo mu siri wasekuhembayo.

«Kuba banu muhemange Ongo, kiro mwendi mweba binwa bingi bya busa-busa imbu buronjanga entí Bayuta. Bushwa mbu ibo baanikiranga mbu Ongo waserukira bo murieba binwa bingi. Kiro mwendi muronja eburonjanga bo. Bushwa mbu Tita winu wosi bikai mbi byarae mu banu na nti tinensi mumuhema. Kai mwendi muhema buno mbu:

‹Tita witu ǒngo'ri mu mbingu,

erina rabe ritatwe, eBwami bwabe bweye,

erisasa rabe renda rironjiwange

mu chuo na buri mu mbingu.

Wendi utuninka ebio byitu bya kirotu.

Wendi utusasira ebibí byitu, ebukianga na bate hotu twasasira imbi bakutukore bibí.

Kiro wendi uturekerere ikire mu myereko,

ina wenda utushukaya mu mine ya Mushumbu.

[Bushwa mbu ebwami bwabe, n'emaa hima n'ebusime ematu ati n'ematu ati. Bibesi mbo.]›

«Kai, kuba banu mwendi musasirange bampe ebibí mbi byaburonjeenga bo, Tita winu ngu uri mu mbingu nae wasenda ubusasirange. Ina kuba ntímusasira bampe, Tita winu nae watabusasiriyo ebibí byinu.»

Yesu uhanange bushwa n'erironja mafungo

«Kuba banu muronjange mafungo, kiro mwendi mwishea buri banu muri mu bonso, imbu bukianga ebea b'enkuse. Ibo bakikianga esambaso kongo ebea bati basunga bo mbu baronjange mafungo. Nibwirengi muriira mbu ibo bamakinda rero ihembwa. Ina ǒngo, kuba ǒngo uronjange mafungo, wenda wishua embaso yabe n'ichanua ebuteo bwabe, kongo ebea batasibi mbu ǒngo uronjange mafungo, ina Tita wabe ho ingu uri mpo mu siri. Nae ngu usungange ebironjange ǒngo mu siri, wasekuhembayo.»

Erikwibike butumba mu mbingu

(Ruk 12.33-34)

«Kiro mwenda mwibike butumba mu kino chuo. Bushwa mbu mu chuo nge murikire erunsenge n'ebakenge imbi bibishangǎ bikai. Ebǐbi nabo bakakurangǎ emanumba n'ishuma bikai. Ina mwenda mwibike butumba mu mbingu. Bushwa mbu iko, erunsenge n'ebakenge bitamukocha ibisha bikai, n'ebǐbi batamukocha ikakura n'ishuma. Bushwa mbu impi hari ebutumba bwabe na nge habesengǎ emutima wabe.»

Emeso ng'eritara r'emubi

(Ruk 11.34-36)

«Emeso ng'eritara r'emubi. Kuba emeso abe akonda, emubi wabe uti usebese mu chaka. Ina kuba emeso abe abiha, emubi wabe uti usebese mu mwirimya. Nampo kuba echaka nchi kiri rero kumunda nabe chamabunduka mwirimya, emwirimya ngo usebese mukiri nguru!»

Erikore Ongo abe ikore behe

(Ruk 16.13)

«Kusira mwea ngu wamukore bakwakare babi. Bushwa mbu wasebaa uma n'ishima eumpe, abe wasekowane na uma n'inena eumpe. Kai, mutumakocha ikore Ongo n'ikore behe.»

Erikwinyihire Ongo

(Ruk 12.22-31)

«Bushwa nancho, nibwirengi mbu kiro mwendi mwianya bushwa n'ebuingo bwinu na kwishisha mbu: ‹Mbeni tuserisa nki? Mbeni tusomo nki? Abe tusembara nki?› Mbeni ebuingo ntibwarenga ebio, n'emubi ntiwarenga enchangi? Mukaenga emirónge. Iyo itahinganga abe ikao, na isira mwiso. Ina Tita winu ngu uri mu mbingu urishanga yo. Kasa banu murenga n'emirónge!»

«Mbeni inye mu banu, bushwa n'erikwianya rae, wamitarike n'otu ruma mu buingo bwae? Mbeni banu, bushwanki banu mwianyiengi esanchangi? Mukaenga esantondo s'emashwa imbu bushukanga to. Esantondo nso sitakoranga murimo abe kwiruke nchangi. Ina nibwirengi mbu nakiro emwami Soromono, mu butumba bwae buti, ntwambaranga nchangi yarenga erikonda r'esantondo nso. Ebisu by'emashwa bisungwanga runotu na mukoma nti byatawa mu kasha. Ina Ongo umbarichanga byo nchangi sakonda. Mbeni ke buni bwamufundwa we ibwambicha shu? Banu muri n'isimira rikeke!»

«Kai, kiro mwendi mwianya mwieba mbu: ‹Mbeni tuserisa nki?› Abe mbu: ‹Mbeni tusomo nki?› Abe mbu: ‹Mbeni tusembara nki?› Entí Bayuta nge basondekanyangǎ bikai biti mbyo kirotu. Na Tita winu ngu uri mu mbingu wosi mbu murae mu bikai biti mbyo. Mwendi musondekanya kasa eBwami bwa Ongo nambi byaombokara mu makako ae, nae wasebutárɨkeyo bikai bimpe mbyo.

«Kiro mwendi mwianya bushwa n'erotu rwa mukoma, bushwa mbu erotu rwa mukoma rusekwianyie iro kisine. Kirotu ruri n'eminubo yaro.»

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.