TRADUCTION BILBE EN KINYANGA
Matthew 7
Yesu uhanange bushwa n'erihukumu bampe
(Ruk 6.37-38,41-42)
«Kiro mwendi muhukumu bampe, kongo na banu hotu Ongo watendi ubuhukumungi. Bushwa mbu imbu buhukumunga banu bampe bea nge busekia Ongo nae wabuhukumu. Imbu bupimenga banu bampe bea nge busekia hotu Ongo wabupime. Mbeni buni busungange ǒngo ekasu kari mu riso ra munakinu, ina utungaanikira mu kitika nchi kiri mu riso rabe? Abe, buni bwamukocha ǒngo iere munakinu mbu: ‹Reke nikukutu ekasu mu riso rabe›, na kendekese kumunda n'eriso rabe ǒngo mukiri kitika? Ǒngo mwea wa nkuse! Kuto kasa ekitika kiri mu riso rabe, kongo ukae ishu n'ikuto ekasu mu riso ra munakinu.
«Kiro mwendi muninka esambibi bikai mbi byashurukara, kongo kiro sitendi sibubundukengi n'ibuburae. Kiro mwendi mutaire etuhuwa tuchichi twinu ntu twaraisha nguru, kongo etuhua nto tutendi tunyenchaange to.»
Ikonga n'ininkwa
(Ruk 11.9-13)
«Mwendi mukonga kongo mwendi muninkwa. Mwendi musonda kongo mwendi mushee. Mwendi mukongota mu rubi kongo benda baburundurengi. Bushwa mbu kinsi mwea ukongange nge uninkwanga, nangu usondange nge usheenga, nangu ukongotange ng'urundurirwanga erubi. Mbeni inye mu banu wamuninka mwanae ikoi kuba umuhemange mukati? Abe wamuninke nsoka kuba umuhemange kikwa? Banu kasa bea bema, ina banu mosi ininka ebana binu bikai byakonda. Mbeni Tita winu wa mu mbingu, buni bwamufundwae ininka bikai byakonda kuri mbi bamukongange byo?»
«Ebiti mbi bihunange banu mbu bampe bea bendi baburonjeengi byo, na banu hotu mwendi muronjee bo byo. Bushwa mbu bumbo nge bweba emyomba ya Musa n'ebitabo by'ebatahwa1.»
Esandubi sibi
(Ruk 13.24)
«Mwendi mwetere mu rubi ndu rwekene. Bushwa mbu erubi rwerienda karimina rwaariha, n'ense y'erikime mo nayo yaariha. Ense njo yetange mo bea bingi. Ina erubi rwerienda mu karamo, iro rwekene. N'ense y'erikime mo, nayo yekene. Ense njo, ebamisange yo bakeke.»
Ebatahwa b'emanko
(Ruk 6.43-44)
«Mwendi mukohya bushwa n'ebatahwa b'emanko. Ibo beyangǎ kuri banu buri mburi. Ina kumunda n'emitima yabo, ibo bari buri mbibi sa busara insi sasua nguru. Ebatahwa b'emanko mbo, mukwenda banu mukengura bo mu mikorere yabo. Bushwa mbu ebea batamusiro byuma bya misabibu abe bya muti wa tini mu muti w'erusoa. Bushwa nancho, kira muti wakonda ubutanga byuma byakonda, ina kira muti wema ubutanga byuma byema. Emuti wakonda utamubuta byuma byema n'emuti wema utamubuta byuma byakonda. Kinsi muti ngu ntiwabuta byuma byakonda usekerwa n'itawa mu kasha. Kai, ebatahwa b'emanko mbo, mukwenda banu mukengurange bo mu mikorere yabo.»
Ebea mbi batakimiyo mu Bwami bwa mu mbingu
(Ruk 13.25-27)
«Nti kira mwea ngu unibikirange mbu ‹Nyere Kuritu, Nyere Kuritu› nge wasekimeyo mu Bwami bwa mu mbingu. Ina ingu ukorange ebinwa mbi byashima Tita wani ngu uri mu mbingu. Mu rotu rw'ehukumu, bea bingi basenireyo mbu: ‹eNyere Kuritu, Nyere Kuritu, twabesenga tutabiringa mu rina rabe, na mu rina rabe ndo, twabesenga tuhamburanga bifwasi, n'ikora bishisharo bingi.› Nampo, ani niseereyo bo mbu: ‹Karankuso, ntangabusibanga. Mutuke mpo, banu bakori ba bibí!›»
Mushinga w'ebimbi babi
«Bushwa nancho, kinsi mwea ngu urukirange ebinwa byani bino n'ironja byo, wasusanyiwa na mwea wa bwenge ingu wumbanga numba yae hiyo n'erukanga. Embura yakenga, esandusi sarisa, n'eriyuhu rikaso mu numba. Ina enumba njo ntiyendukanga bushwa mbu emusingi wayo wimbwanga hiyo n'erukanga.
«Ina kinsi mwea ngu urukirange ebinwa byani bino na watangaronja byo, wasusanyiwa na katiritiri nki kimbanga numba yae mu misie. Embura yakenga, esandusi sarisa, n'eriyuhu rikaso mu numba. N'enumba njo yenduka n'ikakukara.»
Ebukwakare bwa Yesu
(Mar 1.22; Ruk 4.32)
Yesu wakianga wameba ebinwa mbyo, ebikembe by'ebea bati bashishara nguru murisunga mbu bwabesenga buhanange we. Bashisharanga mbo bushwa mbu iwe ntwabesenga uhanange bo buri ebahani babo b'emyomba, ina wabesenga uhanange bo buri mwea uri na bukwakare.
Source notes (1)
- Footnote Soma Baro 13.8-10.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.