TRADUCTION BILBE EN KINYANGA
Matthew 8
Yesu waramya mubembi
(Mar 1.40-45; Ruk 5.12-16)
Yesu wahita ituka mu rou ndo. Wakianga uhitange, bikembe bingi bya bea byamumisa.
Nampo mubembi uma weya, n'ikomere Yesu emaru, n'imwire mbu: «eNyere Kuritu, umasasa umuniramya.» Yesu woro emwine, wamutinge mo n'imwire mbu: «Nashima urame!» Hiha-hiha emwea ngo warama ebibembi byae. Kuruma nampo, Yesu wamwire mbu: «Ukohyanga, ang'iture mwea emwasi uno. Ina enda kishea kuri ekuhani, nanko ukutonga ebisabo imbu bwebanga Musa, kongo rashea mu bea bati mbu umarama1.»
Yesu waramya mukori wa mukwakare wa basura
(Ruk 7.1-10; Yoh 4.43-54)
Yesu wakianga ukimengi murubungu rwa ku Kaperenaumu, kwasaa mukwakare uma wa basura b'eBaroma. Emukwakare ngo wenda kakonga Yesu mbu wamusaki. Wamwire mbu: «eNyere Kuritu! Emukori wani wasamba rumbonsa. Wikinde mu numba bushwa mbu wasakwa nguru.» Yesu wamwire mbu: «Naseya kamuramya.» Ina emukwakare ngo wamusako mbu: «eNyere Kuritu! Ani ntinakomenwa ikukoke mu mwani. Ina eba kinwa kima ho, n'emukori wani waserama. Bushwa mbu, niri n'ebanisimanirenga mu murimo witu. Ina nani niri na basura mbi basimanirenga ani. Namere uma mbu: ‹Enda!› Nae ntwenda na! Namere umpe mbu: ‹Iya!› Naha nti weya! Namere ntumwa yani mbu: ‹Kora buno!› Nae ntwakora na bumbo!» Yesu wakianga wamarukira ebinwa mbyo, washishara n'iere ebea mbi babesenga bamumisange mbu: «Nibwirengi muriira mbu ntangasunganga mu chuo kiti cha ku Isiraeri mwea uri n'isimira nguru buri uno! Nibwirengi mbu bea bingi baseyayo itukire ekusairenga emwishi n'ekuraamanga o, nabo baserisayo bio hima na Iburahimu, Isake na Yakobo mu Bwami bwa mu mbingu. Ina ebea mbi babesenga bakomenwa eBwami mbo baserekerwayo hambuka. Nanko kusebeseyo kiro n'ishiisha emeno.»
Kuruma nampo, Yesu were emukwakare w'ebasura mbu: «Kuruka kukwabe. Bibesi mbu bwakusimira ǒngo!» Hiha-hiha, emukori wae warama.
Yesu waramya bakoni bingi
(Mar 1.29-34; Ruk 4.38-41)
Kuruma nampo, Yesu wenda mwa Petero. Nanko wakumana inabe wa Petero wikinde bushwa mbu wabesenga wasamba kaburura. Yesu wamutinge mo mu mwine, n'emumina warama ekaburura. Nampo, emumina ngo wasimana n'ironjee Yesu bio.
Ebutu bwakianga bwamaoroba, barishie Yesu bea bingi mbi babesenga batingirwa na bifwasi. Nampo, Yesu wahambura ebifwasi mbyo mu kinwa kima ho. N'ebakoni bati mbo, waramya bo.
Yesu waronjanga mbo kongo byabererera ebinwa mbi byebanga emutahwa Isaya mbu: «Warianga ebutetera bwitu n'emakoni itu2.»
Erimisa Yesu
(Ruk 9.57-62)
Yesu wakianga wamasunga ekikembe ch'ebea bamutimbange, were ebanafunsi bae mbu basoke hima nae muo mwiri w'enyansa.
Nampo, muhani uma w'emyomba wamweyere n'imwire mbu: «eMuhani! Ekuti nku kusenda kwetange ǒngo, nendi nikumisange.» Yesu wamusako mbu: «Emiterere irikanga na biribu byisame mo, n'emirónge irikanga na birumba. Ina ani eMwana w'eMwea nisira n'ehamusame ani.»
Mwanafunsi uma wa Yesu nae wamwire mbu: «eNyere Kuritu! Nireki kasa nendi kataa tita.» Ina Yesu wamusako mbu: «Reke ebakwire bendi bataange ebakwi babo, ina ǒngo nimise!»
Yesu wombya emibimbi y'emecha
(Mar 4.35-41; Ruk 8.22-25)
Kuruma nampo, Yesu wataya mu mutumbu. Ebanafunsi bae benda nae.
Hiha-hiha, mu nyansa mwasaa iyuhu rasuma. Bushwa nancho, kumunda n'emutumbu ngo, emecha abucha kwitaa mo. Ina mu ntambi njo, Yesu iwe wabesenga wamitinga toro. Ebanafunsi bae bakensere hari we, bamusimo n'imwire mbu: «eNyere Kuritu! Twakwa! Turamye!» Yesu wasako bo mbu: «Mbeni musubaha bushwa nki? Muriira, erisimira rinu rikeke!» Nampo, wasimana n'ifine emibimbi n'enyansa. Nabyo byakoba nakuba!
Ebea mbo bashishara n'ishishana mbu: «Mwea uri buni uno? Eriyuhu n'enyansa bironjange ebweba we3!»
Yesu wahambura bifwasi mu bea babi
(Mar 5.1-20; Ruk 8.26-39)
Yesu wakianga wamasoka muo mwiri n'enyansa, weya mu chuo ch'eBangendari. Nanko, wakumana bea babi mbi babesenga batukange ekutuburi. Ebea mbo babesenga batingirwa na bifwasi. N'ebifwasi mbyo byaronjanga bo ibese bea basua nguru. Bushwa nancho, kusira mwea ngu werekanga ieta tu munse njo. Hiha-hiha, babucha ikua mbu: «emusike wa Ongo! Mbeni ǒngo tusondange mo nki? Umeya katunubya n'esantambi nensi ntisarumira!»
Mwendende mpo habesenga iimba rikiri ra tuhuwa nti tuhuwange. Nampo ke, ebifwasi mbyo byakonga Yesu mbu: «Kuba ǒngo uhunange ituhambura, tutume tukimi muriimba r'etuhuwa tuto.» Yesu were byo mbu: «Mwendi!» Nampo ebifwasi mbyo byatuka kumunda n'ebea babi mbo n'ikime mu tuhuwa. Hiha-hiha, eriimba riti rahita erou na kwitaa mu nyansa, n'itia.
Ebasumba b'esampunu nso bakianga bamasunga mbo, babeka n'ienda ekumbuka. Bature ebea emyasi iti nji yameta n'emyasi y'ebea babi mbi babesenga batingirwa n'ebifwasi.
Nampo ke, ebea bati b'erubungu bendere Yesu. Bakianga bamamusunga, bamukonga mbu watuke mu chuo chabo.
Source notes (3)
- Footnote Kuba emubembi warama, wabesenga wendanga kishea kuri ekuhani murishea mbu wamarama. Wabesenga uronjanga mbo kongo ebea bamurisia tu irika hima nabo. Soma Bar 13.45-46; 14.1-32.
- Footnote Soma Isa 53.4.
- Footnote Soma Sab 65.8; 89.10; 107.23-32.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.