Skip to content
BibleKenya

TRADUCTION BILBE EN KINYANGA

Matthew 5

Yesu uhanange ebea hiyo n'erou

Yesu wakianga wamasunga ebikembe by'ebea, wataya hiyo n'erou. Wakianga wamakinda irika ekwansi, ebanafunsi bae bakensere kwihi nae. Nampo wabucha ihana bo mbu:

«Bakasanirwa ebea mbi bisiba mbu ibo basene b'emutima1,

bushwa mbu eBwami bwa mu mbingu bwabo!

Bakasanirwa ebea mbi barengi,

bushwa mbu Ongo wasebonganyayo bo!

Bakasanirwa ebea mbi bihohea,

bushwa mbu baseninkwayo echuo buri mwandu!

Bakasanirwa ebea mbi bari na rwaka hima na mbusha y'erironja bikai biti mbi byaombokara mu makako a Ongo,

bushwa mbu Ongo wasesukuchayo bo!

Bakasanirwa ebea mbi bakwirengi bampe bonso,

bushwa mbu nabo, Ongo wasekwireyo bo bonso!

Bakasanirwa ebea mbi bari n'emutima washongokara,

bushwa mbu basesungayo Ongo!

Bakasanirwa ebea mbi barishange buhoro,

bushwa mbu basebikirwayo mbu bana ba Ongo!

Bakasanirwa ebea mbi banubiwange bushwa n'erironja bikai mbi byaombokara mu makako a Ongo,

bushwa mbu eBwami bwa mu mbingu bwabo!

Mukasanirwa banu, kuba ebea babukambange, n'ibunubya,

n'ibubehere binwa bya manko bya kira bubi bushwa nani.

Mwendi mumoa n'ishima, bushwa mbu mubikirwa uhembo rukiri mu mbingu. Ngebumbo bwanubiwanga ebatahwa mbi babusondorenga2.»

Emukwa n'echaka by'echuo

(Mar 9.50; Ruk 14.34-35)

«Banu muri buri emukwa w'echuo. Ina emukwa kuba wamakinda iriminya ebushamuke bwao, mbeni kinki tu chamurierwa kumunda nao kongo washamuka? Emukwa ngo nt'usira tu mufa, ina utawanga hambuka n'ebea nti banyenchaa o.

«Banu muri buri chaka ch'echuo. Erubungu rwimbwa hiyo n'erou rutabisamanga.

«Kusira mwea ngu wamusacha eritara n'ibumbe ro mu mutundu. Ina urembeanga ro mu kango, kongo rarisha chaka kuri ebea bati mbi bari kumunda n'enumba. Ngebumbo hotu, echaka kinu ch'enda kisakange kuri ebea, kongo benda basungange emikorere yinu yakonda, n'itata Tita winu ngu uri mu mbingu.»

Yesu uhanange ebea bushwa n'eMyomba ya Musa

«Kiro mwendi muanikira mbu neyanga kanoa eMyomba ya Musa abe emahano ebatahwa. Ani ntineyanga kanoa byo, ina neyanga kabereresha byo. Nibwirengi muriira mbu: ematu ati ngi asekiayo embingu n'echuo bikiri ho, kutatukiyo kiro n'ekemema mu rwandiko abe nsimiko nima mu Myomba ya Musa ieya nambu busekiayo ebiti byabererera. Bushwa nancho, munkati n'emyomba iti, kinsi mwea ngu wasenoayo momba uma, nakiro mukeke irenga eimpe, n'ihana bampe mbu banoe yo, iwe nge wasebese mukeke mu Bwami bwa mu mbingu. Ina kinsi ngu waseronja imbu bweba emyomba n'ihana yo bampe mbu baronje yo, iwe nge wasebese mukiri mu Bwami bwa mu mbingu. Ngyasingwa nabwire mbu: mumarukwa ironja bikai byaombokara mu makako a Ongo irenga ebahani b'eMyomba n'eBafarisayo, mutukimiyo mu Bwami bwa mu mbingu.»

Yesu uhanange ebea bushwa n'erisubuka

(Ruk 12.57-59)

«Mumarukira emomba ngu wakererwanga batitanku bitu mbu: ‹Kiro wendi ushura mwea. Bushwa mbu kinsi ngu washura mwea, wakomenwa ihukumiwa3›

«Ina ani nibwirengi mbu kinsi mwea wasubuke munachabo, wakomenwa irierwa mu mburano. Na kinsi mwea ngu wakamba munachabo mbu: ‹ǒngo katiritiri!› Nae wakomenwa irierwa ha Rushu rukiri rwitu rw'eBayuta. Na kinsi mwea were munachabo mbu: ‹ǒngo mushire!› Nae hotu wakomenwa itawa mu kasha nki katarimiyo.

«Ngyasingwa, kuba ǒngo hunange ininka Ongo ebisabo byabe ha butanda, nampo umasubukia mbu munakinu uri nabe kinwa, sia ebisabo byabe mpo habusondori n'ebutanda, na enda kasa karongana nae. Kuruma nampo, kuruka ke kaninkana ebisabo byabe mbyo.

«Umenda kaburana na mwea, wisumyanga urongane nae tete munkati n'ense. Kuba nti mbo, wasekusongere mu makako emushunguri, n'emushunguri nae wasekuria ekubaporisi, n'eporisi nae ntwakutaa mu mwiyororo. Nikwirengi muriira mbu utukoche isaa mu mwiyororo mo, kuba ntiutua nensi erufaranga rwa hende.»

Yesu uhangirengi ebea ironja bushuma

«Mumarukira ebwebanga bo mbu: ‹Ang'ienda uronja bushuma4.› Ina ani nibwirengi mbu kinsi wabume ngu wakae mumina mu kwisane we, nampo ntwamakinda rero ironja nae bushuma mu mutima wae.

«Kuba eriso rabe r'ekwabume ramusingwa ukire mu nsambi, kura ro n'itaa ro kore nabe. Bushwa mbu rahunda uriminye nungo nima y'emubi wabe kukia emubi wabe uti watawa mu kasha nki katarimanga. Kuba emwine wabe w'ekwabume wamusingwa ukire mu nsambi, kera o n'itaa o kore nabe. Bushwa mbu rahunda uriminye nungo nima y'emubi wabe kukia emubi wabe uti watawa mu kasha nki katarimanga.»

Yesu uhanange ebea bushwa n'erisiana n'emumina

(Mat 19.9; Mar 10.11-12; Ruk 16.18)

«Mumarukira tu ebwebangá bo mbu: ‹Kuba wabume wahensa mukari, wahwa imuninka maruba erisiana nae.›5 Ina ani nibwirengi mbu ewabume ngu wahensa mukari, ina mukari nti wakuronja bushuma, wasingwa emumina ngo wabese mushuma kuba wabingwa tu. Na kinsi wabume wasebinga emumina ngo wahenswa na moke, ewabume ngo nae waronja bushuma hotu.»

Mahano bushwa n'erisere

«Mumarukira hotu mbu bwakianga bere batitanku bitu mbu: ‹Ang'ienda ǒngo userengi manko, ina uhwa ienda ǒngo uronjange mbi byaserenga ǒngo mu makako a Nyere Kuritu.›6 Ina ani nibwirengi mbu kiro mwendi musere rotu. Kiro musere mu rina ra mu mbingu, bushwa mbu embingu ng'erutebe rwa Ongo. Kiro mwendi musere hotu mu rina r'echuo, bushwa mbu echuo kiri buri kitumbi nchi kiruhuchie Ongo mo ebisando. Kiro mwendi hotu musere mu rina ra ku Yerusaremu, bushwa mbu Yerusaremu ngerubungu rw'eMwami mukiri. Ang'ienda ǒngo userengi emuntwe wabe, bushwa mbu utumukocha ibundura eruteo rwabe ruma mbu rubesi ingwi abe rusiru. Kai, kuba murisiana mu kinwa, mwendi mweba mbu ‹Nanki›, na kuba mutina kinwa, mwendi mweba mbu ‹Anga.› Bushwa mbu kinsi kinwa chatarikwa hiyo n'ebinwa mbyo, ngerieba mbu icho chatuka kuri Mushumbu.

Yesu wahangire erikuruchiane ebubi mu bumpe

(Ruk 6.29-30)

«Mumarukira ebwebangá bo mbu: ‹Riso mu riso, na rino mu rino.›7 Ina ani nibwirengi mbu kiro mwendi mukurucha bubi mu bumpe. Kuba mwea wakurasa kihi muritema r'ekwabume, mubunduri n'erimpe. Kuba mwea uhunange ikusongere kongo wakunyaka eshimishi yabe, musieri n'erikoti rabe hotu. Kuba mwea wakumima imuriere murio wae mu kirometere kima, murieri nao mu birometere bibí. Kuba mwea wakuhema kikai, muninke cho. Na wameba mbu umusombye, kiro umusima.»

Yesu uhanange ebea bushwa n'erishima ebarenda

(Ruk 6.27-28,32-36)

«Mumarukira ebwebangá bo mbu: ‹Wenda ushima kinsi mwea ngu uri kumushi nabe8. Ina emurenda wabe, wenda umubaa.› Ina ani nibwirengi mbu, ebarenda binu, mwenda mushima bo. Nambi babunubyange, mwenda banu muhemerengi bo. Kuba muronja bumbo, mukubese bana ba Tita winu ingu uri mu mbingu. Bushwa mbu iwe usachanga emwishi wae kuri ebabí n'ebarongu. Urubyanga embura kuri ebea mbi baombokara nambi ntibaombokara mu makako ae. Kuba mushima ho mbi batashimanga, mbeni mukuninkwayo runi uhembo? Ebakongori b'ehoro nabo baronjeanenga bumbo! Kuba banu mukeanga ho banakinu, mbeni kini kinwa kironjange banu irenga bampe? Entí Bayuta nabo baronjeanenga bumbo! Kai mwenda mubese bea baombokara imbu burikanga Tita winu wa mu mbingu waombokara9.»

Source notes (9)
  1. Footnote Ebasene b'emutima nge bea imbi bisiba mbu ibo barae kuri Ongo.
  2. Footnote Soma 2Bir 36.16; Miko 7.52.
  3. Footnote Soma Ituk 20.13; Isub 5.17.
  4. Footnote Soma Ituk 20.14; Isub 5.18.
  5. Footnote Soma Isub 24.1.
  6. Footnote Soma Bar 19.12; Ians 30.3; Isub 23.22-24.
  7. Footnote Soma Ituka 21.24; Barawi 24.20; Isubukia 19.21.
  8. Footnote Soma Bar 19.18.
  9. Footnote Soma Bar 19.2. Isub 18.13.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.