Skip to content
BibleKenya

TRADUCTION BILBE EN KINYANGA

Matthew 4

Yesu werekwa na Mushumbu

(Mar 1.12-13; Ruk 4.1-13)

Kuruma nampo, eMutima Washurukara wenjanga Yesu mu bweru kongo Mushumbu wamwereka. Nanko, Yesu wakindanga matu makumi anye a mafungo mutu na mumwishi. Kuruma nampo, wakwa ke rwaka.

Nampo, Mushumbu wamweyere n'imwire mbu: «Kuba ǒngo nge Musike wa Ongo, ere emakoi ano abinduke mikati.» Yesu wamusako mbu: «Raandikwa mu Mitiro Yashurukara mbu: ‹Emwea watamuishi bushwa n'ebio ho. Ina waseishi bushwa n'ekinwa kiti nchi chebange Ongo.›1»

Kuruma nampo, Mushumbu wámwenja murubungu rwashurukara rwa ku Yerusaremu. Wamusimanya hamambio eNumba ya Ongo, n'imwire mbu: «Kuba ǒngo nge Musike wa Ongo, irekere ekwansi. Bushwa raandikwa mu Mitiro Yashurukara mbu:

‹Ongo waseere ebamaraika bae

mbu bakurie mu mine yabo

kongo emwindi wabe utasitari mwikoi.›2»

Yesu wamusako mbu: «Raandikwa mu Mitiro Yashurukara tu mbu: ‹Ang'ienda wereka Nyere Kuritu Ongo wabe.›3»

Kuruma nampo, Mushumbu wamwenja tu hiyo n'erou ruma rore nguru. Wamushea emami ati echuo hima n'ebutumba bwao. Wamwire mbu: «Ebiti mbi nasekuninka byo kuba unikomere emaru n'inisimanike.» Ina Yesu wamwire mbu: «Tuka mpo, ǒngo Mushumbu! Bushwa raandikwa mu Mitiro Yashurukara mbu: ‹Wenda usimanike Nyere Kuritu Ongo wabe n'imukore iwe kisine.›4»

Nampo ke, Mushumbu wamureke. Hiha-hiha, ebamaraika beya kakore Yesu.

Yesu wabucha emurimo wae ku Ngariraya

(Mar 1.14-15; Ruk 4.14-15)

Yesu wakianga wamarukira mbu Yohana wamamɨnwa mu mwiyororo, wenda mu chuo cha ku Ngariraya. Watukanga ku Nasareti n'ienda karika ku Kaperenaumu. Erubungu ndo rurikire mwendende n'enyansa ya ku Ngariraya, mu chuo cha Saburoni hima na cha Nafutari.5 Ebinwa mbyo byetanga mbo kongo chabererera ekinwa nchi chebanga emutahwa Isaya mbu:

«Echuo cha Saburoni hima n'echuo cha Nafutari,

ieta munse nji yenda ekunyansa,

muo mwiri wa Yorondani,

mu chuo cha ku Ngariraya, kunko nge kurikanga ebea mbi nti Bayuta!

Ebea mbo babesenga mu mwirimya,

bamasunga chaka kikiri!

Imbi babesenga mu mwirimya mukiri w'erikwa,

nabo echaka chamasaire bo!»6

Itukire ematu ngo, Yesu wabucha ihubiri ebea mbu: «Mubunduke n'ireke esansambi sinu, bushwa mbu eBwami bwa mu mbingu ngie buri kwihi!»

Yesu warondora ebanafunsi bae baroso

(Mar 1.16-20; Ruk 5.1-11)

Otu ruma, Yesu wabesenga utambange mwendende n'enyansa ya ku Ngariraya. Nampo wasunga barobi babi ba bura buma. Uma nge Simoni ingu wabikirwa mbu Petero, n'eumpe nge Nderea. Babesenga barobange mwirekera ekakira kábó mu nyansa. Yesu were bo mbu: «Munimise, niseburonja ibese barobi ba bea.» Hiha-hiha, basia etukira twabo n'imumisa.

Yesu wakianga wamakensere kakeke kubusondori, wasunga bampe bea babi nabo hotu bana ba bura buma. Uma nge Yakobo n'eumpe nge Yohana, basike ba Sebendayo. Babesenga batunganyange etukira twabo mu mutumbu uma hima n'ishe wabo Sebendayo. Nabo hotu, Yesu wábikira bo. Hiha-hiha, basia emutumbu ngo, basia n'ishe wabo, n'imisa Yesu.

Yesu uhanange bea n'iramya bakoni

(Ruk 6.17-19)

Kuruma nampo, Yesu wabesenga wetange mu chuo kiti cha ku Ngariraya. Wabesenga uhanange ebea hotu mu masinangoki abo n'iture bo eMwasi Wakonda w'eBwami bwa mu mbingu. Wabesenga uramyange bea emakoni abo ati n'eburema bwabo buti.

Emwasi wae wenda nkuru mu chuo kiti cha ku Suria. Bushwa nancho, ebea babesenga bamurishiengi ebakoni bati mbi barinuba na kira bukoni, n'ebifwasi, n'erungu, n'ebea b'erumbonsa. Ebati mbo, iwe wabesenga uramyange bo. Bushwa nancho, bikembe bingi bya bea byabesenga bimumisange. Ebea mbo babesenga basaange ku Ngariraya, mu chuo chabikirwa mbu mbungu ikumi7, ku Yerusaremu, ku Yundea, na mu chuo cha muo mwiri w'erʉsɨ rwa Yorondani.

Source notes (7)
  1. Footnote Soma Isub 8.3.
  2. Footnote Soma Sab 91.11-12.
  3. Footnote Soma Isub 6.16.
  4. Footnote Soma Isub 6.13.
  5. Footnote Saburoni na Nafutari ito nganda sibi kumunda n'esanganda ikumi na sibi s'eBaisiraeri
  6. Footnote Soma Isa 8.23—9.1.
  7. Footnote Mu bimpe bitabo, esambungu ikumi nso sabikirwa mbu Ndekapori.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.