TRADUCTION BILBE EN KINYANGA
Matthew 3
Emahubiri a Yohana Murubiki
(Mar 1.1-8; Ruk 3.1-18; Yoh 1.19-28)
Mu matu ngo, Yohana Murubiki wasungwa mu bweru bwa ku Yundea nt'uhubiringi mbu: «Mubunduke n'ireke esansambi sinu, bushwa mbu eBwami bwa mu mbingu ngie buri kwihi!» Yohana ngo nge washembwanga n'emutahwa Isaya mbu:
«Mwea uma ukuange mu bweru mbu:
Mutunganyanyii Nyere Kuritu ense!
Muombore ekusetayo we1!»
Yohana wabesenga umbaranga nchangi yatunganyiwa na bosa bwa nyama yabikirwa mbu ngamia. Wabesenga uminanga mukaba w'ohu mu mangati.2 Wabesenga urisanga tukuku na buki bwa busara. Ebea babesenga benderenga Yohana isaɨre ku Yerusaremu, na mu chuo kiti cha ku Yundea, n'esambungu siti sa mwendende erusi Yorondani. Ebea mbo babesenga baungamange esansambi sabo munkati n'ebea, na Yohana wenda urubikange bo muri Yorondani. Ina Yohana wakianga usungange Bafarisayo na Basandukayo bingi bamweyerengi mbu warubike bo, washisha bo mbu: «Banu kisasa cha nsoka!3 Inye ngwakubutonde mbu mubeke ebusubuke bwa Ongo imbu bweyange? Bushwa nancho, mwendi mushea mu mikorere yinu mbu mumabunduka n'ireke esansambi sinu. Kiro mwendi mwiebesha mbu: ‹Iburahimu nge titanku witu.› Nibwirengi mbu Ongo wamubundura emakoi ano ibese bana ba Iburahimu! Emwanda ngie uri ho murikonda emiti h'itina nayo. Kinsi muti ngu utabutanga byuma byakonda usekerwa n'itawa mu kasha. Ani niburubikange mu mecha mwishea mbu mumabunduka n'ireke esansambi sinu. Ina ingu weyange kuruma nani, iwe uri na maa inirenga, na ntinakomenwa nakuba imukungura ebirato byae. Iwe useburubika mu Mutima Washurukara na mu kasha. Iwe watinge erweri mu mine yae mwifufura engano. Wasetuma engano n'ibika yo mu mwiso. Ina esampafa, waseshika to mu kasha inki katarimanga.»
Erirubikwa ra Yesu
(Mar 1.9-11; Ruk 3.21-22)
Mu matu ngo, Yesu watukanga mu chuo cha ku Ngariraya n'ieya muri Yorondani kongo Yohana wamurubika. Ina Yohana watina n'imwire mbu: «Ani nge nakomenwa rero irubikwa nabe! Bushwa nki ǒngo tu nge weya kuri ani?» Yesu wamusako mbu: «Risia kasa bibesi mbo enompena, bushwa mbu twakomenwa ironja bikai biti mbi byaombokara mu makako a Ongo.» Nampo Yohana wasimira. Yesu wakianga wamarubikwa, watuka kumunda n'emecha. Hiha-hiha, embingu yoboka. Wasunga eMutima wa Ongo uhitange buri pisho n'irika hambasiro nae. Na murenge uma warukirwa ituka mu mbingu n'ieba mbu: «Uno nge Musike wani, ewashima ani. Nakushima nguru.»4
Source notes (4)
- Footnote
- Footnote Soma 2Bam 1.8.
- Footnote Yohana werenga ebea mbo bumbo bushwa mbu eBayuta nabo babesenga bosi mbu ensoka isuanga ina tu ibesenga mwenge.
- Footnote Soma Sab 2.7; Isa 42.1.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.