TRADUCTION BILBE EN KINYANGA
Matthew 2
Bea ba bwenge beya kasimanike Yesu
Yesu wabutwanga mu ubungu ndu rwabikirwa mbu Beterehemu mu chuo cha ku Yundea. Mu matu ngo, Herote nge wabesenga wasimanire echuo ncho. Kuruma n'eributwa ra Yesu, ebea b'ebwenge batuka nku ekusairenga emwishi n'ieya ku Yerusaremu. Ebea b'ebwenge mbo bashisha mbu: «Kwakubutwa mwana mbu nge mubake w'eBayuta! Mbeni emwana ngo uri kuni? Bushwa mbu twakusunga enkekeni yae ekusairenga emwishi, na bate twameya kamusimanike.»
Emubake Herote wakianga wamarukira ebinwa mbyo, warengwarengwa hima n'ebea bati ba ku Yerusaremu. Nampo wábikira ebakwakare bati b'ebakuhani hima n'ebahani b'eMyomba n'ishisha bo mbu: «Mbeni Kirisitu wakomenwanga ibutwa kuni?» Nabo bamusako mbu: «Ku Beterehemu, mu chuo cha ku Yundea. Bushwa emutahwa waandikanga mbu:
‹Ǒngo Beterehemu, mu chuo cha ku Yundea,
ǒngo nt'ubungu rukeke mu sambungu sa ku Yundea,
bushwa mbu ǒngo nge ukutukayo mo emwami ngu wasesimanire ebea bani Baisiraeri1.›»
Nampo Herote wabikira ebea b'ebwenge mbo mu siri kongo bamushisha muriira ematu ngi asungwanga mo enkekeni njo. Kuruma nampo, watuma bo ku Beterehemu n'iere bo mbu: «Mwendi karorota emyasi y'eriira bushwa n'emwana ngo. Kuba mumusunga, muniturenga emwasi kongo nani hotu nenda kamusimanike.»
Ebea mbo barekia bamarukira mbu bwameba emubake, benda. Barekia bendange, enkekeni nji yasunganga bo ekusairenga emwishi yabesenga yasondore bo. Na yakianga yameya mpi harikire emwana, yasimana. Bakianga bamasunga tu enkekeni njo, bamoa nguru. Bakime kumunda n'enumba, basunga emwana hima na nina, Maria. Bakomere emwana maru n'imusimanike. Kuruma nampo, bobora emirio yabo n'imusaba noro, mwaka na marashi. Kuruma n'ebinwa mbyo, Ongo watonde bo mu nsori mbu kiro bakuruke tu kwa Herote. Nampo, betere mu impe nse murikuruka mu chuo chabo.
Yosefu wabekere n'enkumo yae ku Misiri
Ebea b'ebwenge mbo barekia bamenda, maraika wa Nyere Kuritu wasaire Yosefu mu nsori. Wamwire mbu: «Simana, tinge emwana hima na nina, na mubekeri ku Misiri. Murikanga nko ieya n'erotu ndu rusebwireyo ani mbu mukuruke, bushwa mbu Herote usondekanyange emwana kongo wamushura.»
Nampo, Yosefu wasimana, watinge emwana hima na nina, n'ibekere nabo mu mutu ku Misiri. Warikanga nko ieya n'erotu ndu rwakwanga Herote. Ebinwa mbyo byabesenga mbo kongo chabererera ekinwa nchi chakianga Nyere Kuritu weba ietere emutahwa mbu: «Nabikiranga emwanani mbu watuke ku Misiri.»2
Herote washiria ebana
Herote wakianga wamasʉnga mbu ebea b'ebwenge mbo bamamuhusa, wasubuka nguru. Nampo, watuma bea ku Beterehemu n'esambungu siti sa mwendende kashura ebana bati ibuchie mu myaka ibi ihita. Washirenga mu bana b'eruero ndo, itukana n'ematu ngi akianga ebea b'ebwenge bamuture. Nampo, chabererera ekinwa nchi chebanga emutahwa Yeremia mbu:
«Ku Rama kwarukirwanga murenge, kiro na minsori mingi.
Raheri nge urirengi ebana bae,
ntiwashima ibonganyiwa,
bushwa mbu ebana bae mbo bamashirira.»3
Yosefu watuka ku Misiri n'ienda ku Nasareti
Herote wakianga wamakind'ikwa, maraika wa Nyere Kuritu wasaire tu Yosefu mu nsori ku Misiri. Wamwire mbu: «Simana, tinge emwana hima na nina. Kuruka nabo mu chuo cha ku Isiraeri, bushwa mbu ebabesenga bahunange ishura emwana bamakwa.»
Nampo Yosefu wasimana, watinge emwana hima na nina n'ikuruka mu chuo cha ku Isiraeri. Ina wakianga warukirǎ mbu Arikerao nge wamasia mu kitumbi ch'ishe Herote mu chuo cha ku Yundea, wasubaha ienda ko. Bakianga bamamutonde mu nsori, nampo ke Yosefu wenda ku Ngariraya. Wakianga wameya ko, wenda karika murubungu rwa ku Nasareti. Ebinwa mbyo byabesenga mbo kongo chabererera ekinwa nchi chakianga Nyere Kuritu weba ietere ebatahwa mbu: «Wasenda ubikirwange mbu mwea wa ku Nasareti.»
Source notes (3)
- Footnote Soma Mik 5.1.
- Footnote Soma Ose 11.1.
- Footnote Soma Yer 31.15.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.