Skip to content
BibleKenya

TRADUCTION BILBE EN KINYANGA

Matthew 18

Inye nge mukwakare mu Bwami bwa mu mbingu?

(Mar 9.33-37; Ruk 9.46-48)

Mu ntambi njo, ebanafunsi beyere Yesu n'imushisha mbu: «Mbeni inye nge mukwakare nguru mu Bwami bwa mu mbingu?» Nampo Yesu wabikira mwana mukeke uma, wamutereka mu makako abo n'ieba mbu: «Nibwirengi muriira: kuba ntímukocha ibundura emikorere yinu n'ibese buri bana bakebake, mutukimiyo mu Bwami bwa mu mbingu. Bushwa nancho, kinsi mwea ngu wihicha buri emwana mukeke uno, iwe nge wasebese mukwakare mu Bwami bwa mu mbingu. Na kinsi ngu wakoke emwana mukeke buri uno mu rina rani, ntwamanikoke.»

Erikwiranga n'esansambi

(Mar 9.42-48; Ruk 17.1-2)

«Ina, kuba mwea wasingwa uma mu bana bakebake bano mbi banisimira wakire mu nsambi, emwea ngo rakomenwa kuri we iminwa osho rukiri mu rikoti rae n'imutaa mu nyansa. Buhanya mu chuo bushwa mbu murikire binwa bingi mbi bisingwangǎ ebea bakire mu sansambi! Ebinwa byerikiria ebea mu sansambi bitakoche irukwa! Ina buhanya kuri emwea ngu urishange byo!

«Kuba emwine wabe abe emwindi wabe wasingwa ukire mu nsambi, kera o n'itaa o kore! Rakomenwa kuri ǒngo ikime mu Bwami bwa mu mbingu na mwine uma abe mwindi uma kukia ubesi na mine ibi na mindi ibi n'itawa mu kasha k'ematu ati. Kuba eriso rabe naro risingwange ukire mu nsambi, kura ro n'itaa ro kore nabe! Bushwa mbu rahunda kuri ǒngo ikime mu buingo bweriira na riso rima, kukia ubese na meso abi n'itawa mu marunga.»

Mushinga w'emburi nji yariminanga na yashekana

(Ruk 15.3-7)

«Mwendi mukohya, kiro mwendi munena uma mu bana bano! Nibwirengi muriira mbu ebamaraika babo barikangǎ esantambi siti hima na Tita wani ingu uri mu mbingu. [ Bushwa mbu ani eMwana w'eMwea neyanga kashukaya imbi barerimina.]

«Banu mwanikirange buni? Kuba mwea uri na mburi sae iyana, nima muto yamarimina, mbeni watamukocha isia kasa emakumi mwenda na mwenda hiyo erou n'ienda kasonda inji yakurimina? Nibwirengi muriira mbu kuba washee yo, wasemoere yo nguru irenga emakumi mwenda n'emwenda ngi ntiakuriminanga. Na ngebumbo, Tita winu ngu uri mu mbingu, watianenga uma mu bana bano bakebake warimina.»

Buni bwamuronja ǒngo kuba munakinu wakuhote

«Kuba munakinu wakuhote, umwenderenga kongo umushea ebubi bwae banu nae. Kuba wakurisia, ukubese nt'umashee munakinu ngo. Ina kuba watina ikurukira, umuhierenga tu na umpe mwea abe babi, kongo babese bakariho.1 Ebea mbo nabo, kuba watina irukira bo, uturenga emwasi ngo kuri ekikembe ch'ambi basimira Ongo. Ina kuba watina isimira bo nabo, kai umutingenga buri entí Muyuta abe mukongori wa horo.

Eritina n'eririsia ebinwa

«Nibwirengi muriira mbu ebiti mbi bisenda bisimiranengi banu hano mu chuo, bisenda birisiwange na mu mbingu. N'ebiti mbi bisenda bitinange banu hano mu chuo, bisenda bitinwange hotu na mu mbingu.

«Nibwirengi tu muriira mbu hano mu chuo, kuba bea babi mu banu barisiana ikonga kikai kiti-kiti, Tita wani ngu uri mu mbingu waseninka bo cho. Bushwa mbu impi hakumanana bea babi abe bashatu mu rina rani, nani niri munkati nabo.»

Erisasira mwea

Kuruma nampo, Petero wakensere hari Yesu n'imushisha mbu: «eNyere Kuritu, kuba munakitu unikorengi bibí, mbeni nahwa imusasira meta anga? Mbeni ihiere meta arinda?»

Yesu wamusako mbu: «Anga! Ntinakwire mbu umusasire meta arinda ho, ina sirinda seta meta makumi arinda.

Emushinga w'emukori ngu watinanga ikwire mine bonso

«Bushwa nancho, eBwami bwa mu mbingu bwasusanyiwa na mwami uma ngu wasondanga isiba eminda nji yahwanga imutua ebakori bae. Wakianga wamabucha iansa, bamurishie mukori wae uma ngu wabesenga na mwinda wa behe bingi bya taranta erefu ikumi.2 Nampo, bushwa mbu emukori ngo ntwabesenga n'ekara k'eritua emwinda ngo, nyere kurwabo weba mbu emukori ngo wachuke, na mukari, n'ebana bae, hima n'ebiti mbi byabesenga nae, kongo watua emwinda wae. Emukori ngo wakome emaru mu makako a nyere kurwabo n'imwire mbu: ‹Nirindiri tu kasa, nasetuwa emwinda wabe uti!› Nyere kurwabo wamukwire bonso nguru. Wámusasira mu mwinda ngo n'imureke wendi.

«Emukori ngo watuka mpo, wakumana mine uma wa mu murimo wabo, wabesenga uri na mwinda wae mukeke wa bikoroto iyana bya behe. Nampo, emukori ngo woke mine mu rikoti n'imunia-nia, wamwire mbu: ‹Ntuwe emwinda wani!› Mine ngo wamukomere emaru n'imuhema mbu: ‹Nirindiri tu kasa, nasetuwa emwinda wabe uti!› Ina emukori ngo watina, wenda kataa mine mu mwiyororo mbu warike mo mupaka watuwe emwinda wae.

«Ebakori babine bakianga bamasunga mbo, basunga bubi nguru. Ebinwa biti mbyo, benda kature byo nyere kurwabo.

«Nampo nyere kurwabo wabikira emukori ngo n'imwire mbu: ‹Ǒngo mukori wema! Nakukusasira emwinda wabe uti bushwa ukunihemanga mbu nikukwiri bonso. Mbeni utumukwirengi rero minu bonso imbu bwakukukwirenga ani hotu bonso?› Nyere kurwabo ngo wasubuka nguru. Nampo weba mbu bamutae mu mwiyororo kongo wanuba mupaka watuwe emwinda wae uti.»

Kuruma nampo, Yesu weba tu mbu: «Ngebumbo busekiayo hotu Tita ngu uri mu mbingu wabukore banu, kuba kira mwea mu banu watendi usasirange munachabo mu mutima wae uti.»

Source notes (2)
  1. Footnote Soma Isub 19.15.
  2. Footnote eBayuta babesenga bakoreshangǎ behe byabikirwa mbu taranta. Etaranta nima yabesenga ichuranga nkambu isanu.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.