Skip to content
BibleKenya

TRADUCTION BILBE EN KINYANGA

Matthew 17

Ensusanya ya Yesu yabunduka

(Mar 9.2-13; Ruk 9.28-36)

Kuruma na matu mutuba, Yesu waringa Petero, Yakobo na Yohana musikyabo Yakobo. Wataya nabo bisine mu ou ruma rore. Bakianga bakiri hiyo n'erou ndo, ensusanya ya Yesu yabunduka mu meso abo. Embaso yae yanyenya buri mwishi. N'enchangi sae nato sasana buri chaka.

Hiha-hiha, Musa bana Eria basaa n'ibucha ishambara na Yesu.

Petero were Yesu mbu: «eNyere Kuritu, rahunda turike hano. Kai kuba ushima, nasûmba hano hema ishatu: nima yabe, impe ya Musa, na impe ya Eria.»

Petero wakianga ukiri webange, hiha-hiha kwasaa utundo ruri na chaka, rwahita n'ibumbe bo. Kumunda n'erutundo ndo kwarukirwa murenge webange mbu: «Uno nge musikyani, namushima, iwe namumoere. Mwendi mumurukire!» Ebanafunsi bakianga bamarukira emurenge ngo, bakwa boba nguru, bakirire mu sambaso ekwansi. Ina Yesu wakensere kwihi nabo, waturana mubo, n'ieba mbu: «Kiro mukwa boba, musimane!» Murikukuma emeso, ntibasunganga tu umpe mwea, ina Yesu iwe kisine ho. Yesu n'ebanafunsi bae bakianga bahitange erou ndo, waninka bo momba mbu: «Ebyamasunga banu, kiro muture byo mwea uti-uti, ieya n'erotu ndu rusekiayo ani eMwana w'eMwea nafuka.»

Kuruma nampo ebanafunsi ba Yesu bamushisha mbu: «Bushwa nki ebahani b'eMyomba bebange mbu Eria wahwa kasa ieya?»1 Yesu wasako bo mbu: «Muriira, Eria wahwa kasa ieya katunganya ebikai biti. Ina ani nibwirengi mbu: Eria warikinda rero ieya, n'ebea ntí barimusiba, ina barimukore ebiti mbi byashima bo. Na ngebumbo hotu buseninubya bo ani eMwana w'eMwea.»

Nampo ebanafunsi mbo bateerera ke mbu Yesu wakukianga webange bushwa Eria, webange rero bushwa na Yohana Murubiki.

Yesu wahambura kifwasi cha rungu ituka mu mwana uma

(Mar 9.14-29; Ruk 9.37-43a)

Yesu n'ebanafunsi bae benda n'ieya mpi hari ekikembe ch'ebea. Mwea uma wakensere kwihi na Yesu n'ikome emaru mu makako ae, n'imwire mbu: «eNyere Kuritu, kwire emwanani bonso, bushwa mbu wanubiwa nguru n'ebukoni bwerungu. Kira ntambi ukiraengi mu kasha na mu mecha. Nakumurishienga ebanafunsi babe, ina ntíbakukocha imuramya.»

Yesu wasako mbu: «Banu ebea ba runotu nti musimira Ongo, na banu bea bema tu! Mbeni naserikayo hima ninu n'irukira ebinwa byinu mupaka inye otu? Ndishii emwana ngo hano!»

Yesu wafine ekifwasi ncho, nacho chatuka mu mwana ngo. Mu ntambi iya-iya, emwana ngo warama.

Kuruma nampo, ebanafunsi ba Yesu bamuhiere kwahehe n'imwire mbu: «eNyere Kuritu! Ekifwasi ncho, mbeni bushwa nki bate ntítwakukocha ihambura cho?»

Yesu wasako bo mbu: «Erisimira rinu rikeke! Muriira, nibwirengi mbu nakiro mbu erisimira rinu rikeke nguru buri kuma ka harandari2, mumukocha iere erou runo mbu: ‹Tuka hano, enda hiha›, naro rusenda. Na kutamubese tu kikai kiti-kiti nchi chamuhundusana. [ Ina ekifwasi chasusa buno, kitakoche ihamburwa kuba kusira mahemo na mafungo.»]

Yesu watura tu emwasi w'erikwa n'erifuka rae

(Mar 9.30-32; Ruk 9.43b-45)

Otu ruma, ebanafunsi ba Yesu bakianga bamakumanana hima mu chuo cha ku Ngariraya, Yesu were bo mbu: «Ani eMwana w'eMwea nasesiburwa mu mine y'ebea. N'ebea basenishura, ina mu matu ashatu, nasefuka.»

Ebanafunsi bae bakianga bamarukira mbo, barisha bonso nguru.

Petero na Yesu batuwa ehoro y'eNumba ya Ongo

Kuruma nampo, Yesu n'ebanafunsi bae benda murubungu rwa ku Kaperenaumu. Bakianga bameya ko, ebakongori b'ehoro y'eNumba ya Ongo bendere Petero n'imushisha mbu: «Era, mbeni emuhani winu nae utuanga ehoro y'eNumba ya Ongo?»3 Petero wasako bo mbu: «Nanki, utuwanga yo.» Petero wakianga wamakime mu numba, Yesu wabesa waroso mwimushisha mbu: «eSimoni, uanikira buni? Ebami b'echuo kino, kuba batuanyange ehoro n'emikongoro, mbeni batuanyangǎ yo kuri bisa echuo, abe kuri ebeni?»

Petero wamusako mbu: «Batuanyangǎ ebeni.» Nampo Yesu wamwire mbu: «Bisa echuo ntibahwa itua horo! Ina nakiro mbo, ntitwashima isubucha ebea bano. Kai enda ekunyansa, utaanga ebuoba kumunda n'emecha. N'ekikwa kisetinge ongo charoso, woboranga cho ebunu, ukukumana mo kikoroto kima cha behe. Ekikoroto ncho, uninkanga bo cho muritua ehoro yabe na yani.»

Source notes (3)
  1. Footnote Eria weye kasa: eBayuta babesenga baanikiranga mbu emutahwa Eria wahwanga ieya kasa kubusondori na Masiya. Soma Mar 4.5-6.
  2. Footnote ekuBaisiraeri, ekuma k'eharandari kabesenga nge kasibirwe mbu kakeke irenga etuma tuti.
  3. Footnote ekuBayuta, kira wabume ngu wako wabesenga uripishiwanga faranga sibi nsi sabikirwa mbu ndarakimu, bushwa n'emurimo w'eNumba ya Ongo. Esafaranga sibi nso sabesenga sikorerwa mibisi ibi, na sabesenga situanyiwanga mu kira mwaka. Soma Ituk 30.13.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.